EZEQUIEL 21 - Dios Rimashcata Quillcashcami

Jerusalenta llaquichinamanta

¹ Mandac Dios ñucata rimashpaca:

² «Huañunalla runa, Jerusalenta ricushpa, ñucata yuyarina huasitapish, Israel llactatapish llaquichina cashcata

³ huillashpa: “Mandac Diosca: Riquichic, cancunahuan yallita piñarishpami espadata llucchishpa, cashcata ruhuaccunatapish, ñucata mana manchaccunatapish huañuchigrini.

⁴ Cashcata ruhuaccunatapish, ñucata mana manchaccunatapish anchuchingapacmi ñuca espadataca llucchircani. Neguev llactamanta jahua lado llactacamanmi tucuchigrini.

⁵ Chaimantami tucui gentecunaca ñucallatac espada llucchishcata yachangacuna. Chai espadataca mana cutin huacaichishachu” ninmi ningui.

⁶ Huañunalla runa, shungupi llaquirishpa, paicunapac ñaupapi llaquillata huacai.

⁷ Chashna huacacpi: “¿Imamantatac huacacungui?” nicpica: “Jatun llaquimi tiyagrin. Chai llaqui shamucpica, maquicunapish fuerza illacmi saquiringa. Mucucunapish yacu shinami chucchunga. Pipish imata mana ruhuai pudingachu” ningui. ¡Chai llaquica ñami chayamugrin! Chaitaca Mandac Dios ñucami nini» nirca.

⁸ Mandac Dios ñucata rimashpaca:

⁹ «Huañunalla runa, llaquichinata huillashpa: “Mandac Diosca: ¡Espadaca alli mulashcami, espadaca jagan nicunmi!

¹⁰ Huañuchingapacmi alli mulashca. Jagan nishpa achicyachicunmi. ¿Ñuca churi mandana varata imapish caspita shina ruhuashcamantaca cushicushunchu?

¹¹ Chai espadataca huañuchicpac maquipi churangapacmi alli mulashpa, jagan nicucta ruhuarca” ninmi ningui.

¹² Huañunalla runa, yallita caparishpa huacaiyari. Chai espadaca ñuca acllashcacunatapish, Tucui Israel llactata mandaccunatapish llaquichingapacmi tiyacun. Chaihuanmi mandaccunatapish, ñuca acllashcacunatapish espadahuanmi huañuchinga. Chaimanta cambac changata huactariyari.

¹³ Ñucami chai llactapi causaccuna ima shina cashcata ricuni. ¿Chai espadachu mandana varata mana ricunayachin? Chaitaca Mandac Dios ñucami nini.

¹⁴ Huañunalla runa, chai espadaca ishcai cutin, quimsa cutincamanmi llaquichinga. Chai espadami tucuita huañuchishpa pasanga. Chaimanta maquita huactashpa huillaiyari.

¹⁵ Shungupi yallita mancharichun, huañuicunapish ashtahuan mirachunmi, chai manchana espadataca tucui paicunapac pungucunapi churarcani. ¡Tucuchingapacmi jagan nicun, huañuchingapacmi allichishca tiyacun!

¹⁶ ¡Espadalla, lluqui ladomanpish, alli ladomanpish muyurishpa chugrichilla! ¡Maijan ladoman muyurishpapish chashnallatac ruhuailla!

¹⁷ Ñucapish maquita huactashpami, ñuca piñarishcata pasachisha. Chaitaca Mandac Dios ñucami nini» nirca.

¹⁸ Mandac Dios ñucata rimashpaca:

¹⁹ «Huañunalla runa, Babilonia llactata jatun mandacpac espada shamuchun, ishcai ñanta ruhuangui. Shuc llactamantami ishcai ñan llucshinga. Maijan puebloman richunca, ñan callaripi shuc señalta churangui.

²⁰ Shuc ñanca amonitacuna causacuc Rabá llactaman, shuc ñanca Judá llactapi tiyac muyundi pircashca Jerusalenman, espada rinami canga.

²¹ Babilonia llactata jatun mandacca yachaccunaman tapungapacmi ishcai ñan callaripi shayarirca. Paica flechata cuyuchishpa, paipac ruhuashcalla dioscunaman tapushpa, animalpac shungupi ricushpami, maita rinata yacharca.

²² Chashna tapucpica, jatun mandacca paipac alli lado maquihuanmi Jerusalén ladota ricuchirca. Chaica macanacuchun, huañui tiyachun, caparinacuchun, pungu ladocunapi ariete nishcata shayachichun, macanacuna pushtucunata ruhuachun, muyundi torrecunata shayachichunmi ricuchirca.

²³ Jerusalenpi causaccunahuan ña ari nishca cashcamantami chai huillashcaca yangalla carca. Ashtahuanpish, chai mandacca paicuna mana allita ruhuashcata yuyachishpami prezu japinga.

²⁴ Chaimantami Mandac Dios ñucaca: “Cancuna tucui mana allita ruhuashcatami yuyachishcanguichic. Cancuna millaita ruhuashcacunaca ricunallami. Chaica tucuipac ñaupapimi ricurishca. Chaimantami prezu japingapac shamunga. Chashnami paipac maquipi churashca canguichic.

²⁵ Israel llactata mandaclla, canca millai runami cangui. Canta llaquichishpa tucuchina punzhaca ñami pactashca.

²⁶ Mandac Diosca: ¡Turbantetapish, coronatapish anchuchi! ¡Ña mana ashtahuan churaringuichu! Yangalla gentecunami jatunyachishca canga. Jatun tucushca gentecunaca pingaichishcami canga.

²⁷ ¡Cutin, cutin llaquichishpami tucuchisha! ¡Pai mandanata japingapac shamungacamanmi chashna llaquicunaca caticunga! ¡Pai shamucpica, paipac maquipimi churasha!” ninmi.

Amonitacunata llaquichinamanta

²⁸ Huañunalla runa, canca: “Mandac Dios amonitacuna mana allita rimashcamanta rimashpaca: Cancunata huañuchingapacmi espadaca huacaichinamanta llucchishca tiyacun. Tucui tucuchishpa jagan nicungapacmi alli mulashca tiyacun.

²⁹ Paicunaca llullashpami huillan. Yangallami adivinan. Paicuna mana allita ruhuashcamanta huañuchishpa tucuchina punzhami chayamushca.

³⁰ Espadataca mana huacaichingachu. Cancuna huiñashca pushtupi, maipi causashca llactallapitacmi taripashpa llaquichisha.

³¹ Ñucaca nina japiric shina yallita piñarishpami llaquichisha. Cancunata yallita llaquichichunmi millaita ruhuac runacunaman cusha.

³² Cancunaca nina japichina chaquishca cupa shinami tucunguichic. Cancunapac yahuarca allpa chaupipimi saquiringa. Cancunamantaca ima yuyarinapish mana tiyangachu. Chaitaca Mandac Dios ñucami nini” ninmi ningui» nirca.