EZEQUIEL 2 - Dios Rimashcata Quillcashcami

Mandac Dios Ezequielta cayashcamanta

¹ Chashna rimashpaca: «Huañunalla runa, jatarishpa shayari. Canhuanmi parlasha nini» nirca.

² Shina nicucpimi, Diospac Espirituca ñuca shunguman shamurca. Chaitaca ñucata sinchiyachishpa jatarichicpimi uyarcani.

³ Chaipi rimarishpaca: «Huañunalla runa, ñucami cantaca israelcunapacman cachani. Paicunaca ñucata mana cazushpami cariyarcacuna. Paicunapish, paicunapac taitacunapish cunan punzhacamanmi mana cazushpa causancuna.

⁴ Ñucami cantaca piña ñahui, sinchi shungu runacunapacman cachani. Paicunataca: «Mandac Diosca cashnami nin» ningui.

⁵ Paicunaca mana cazuc gentecunami. Shina cacpipish, tucui causaipi ñucamanta shuc huillac tiyashcata yachachunca, uyachunpish, mana uyachunpish paicunaman huillanguilla.

⁶ Huañunalla runa, paicunaca mana cazuccunami. Shina cacpipish, ama manchanguichu. Paicuna rimashcatapish ama manchanguichu. Zarza casha chaupipi cashpapish, alacrancunapac chaupipi causacushpapish ama manchanguichu.

⁷ Paicunaca mana cazuccunami, chaimanta uyachunpish, mana uyachunpish ñuca nishcataca huillacunguilla.

⁸ Huañunalla runa, canca ñuca ima nishcata uyai. Canpish ama chai mana cazuccuna shina caichu. Ñuca imata carashcataca shimita pascashpa micuilla» nirca.

⁹ Shinallatac pillushca quillcata maquipi japishpa ñucaman ricuchicuctami ricurcani.

¹⁰ Chai quillcataca ñuca ñaupapimi pascarca. Chai quillcaca ñaupamanpish, huashamanpish quillcashcami carca. Chaipica yallita llaquipi cantana cantota quillcashcami carca.