EZEQUIEL 19 - Dios Rimashcata Quillcashcami

Mandaccunata llaquishpa cantashcamanta

¹ Can Israel llactata mandaccunata llaquishpa cantana cantota

² cantashpa: “¡Cambac mamaca mama leonmi carca. Leoncunapac chaupipimi carca! Huahua leoncunapac chaupipi siricurca.

³ Huahua leoncunamantaca shuctami jatun tucungacaman huiñachirca. Chai leonmi animalcunata japinata yachacushpa, gentecunatapish micurca.

⁴ Llactacunapi causaccunapish pai ima shina cashcataca yacharcami. Chaimantami tucllahuan japishpa Egipto llactaman cadenahuan huatashpa aparca.

⁵ Unai huatacunata shuyacushpallami mamaca mana cutingachu yuyashpa, huahua leoncunamanta shuc leonta huiñachirca

⁶ Paica jatun leoncunapac chaupipi cashpami animalcunata japinata yachacushpa, gentecunatapish micurca.

⁷ Pueblo muyundi pircacunatapish urmachishpa, shitashca pambatami saquirca. Yallita caparishpami llactata cuyuchishpa llaquinayaita shitashca pambata saquirirca. Imapish ña mana tiyarcachu.

⁸ Llactacunapi causaccuna llaquichingapac jatarishpami, tucllahuan japishpa prezurca.

⁹ Cadenahuan huatashpa, jaulapi churashpami, Babilonia llactata jatun mandacpacman aparca. Israel llacta urcucunapi chai león huacashca ama ashtahuan uyarichunmi prezurca.

¹⁰ Mama leonca yacu cuchupi tarpushca uvas yura shinami, uvas chagra chaupipica carca. Achca yacu ladopi tarpushca shinami alli granota pucushpa, alli ramacunatapish charirca.

¹¹ Chai ramaca jatun mandaccunapac varacunapacmi alli carca. Chai yura yalli jatunta huiñashpami, achca ramacunahuan tucushpa, puyucaman chayashpa, ricunalla carca.

¹² Shina cacpipish, piñarishpami pitishpa pambaman shitarca. Inti llucshina ladomanta huaira shamushpami, granocunataca chaquichirca. Sinchi ramacunaca chaquichircami, shinallatac ninami rupachirca.

¹³ Cunanca yacu mana tiyac shitashca, chaquishca allpapimi tarpushca.

¹⁴ Chai tarpushca yurapac ñahuimanta nina llucshishpami ramacunatapish, granocunatapish rupachirca. Chai yurapica jatun mandaccunapac mandana sinchi varapish ña mana tiyarcachu” ninmi ningui. Caicunaca llaqui cantana cantomi. Llaquipi cantangapacmi alli can» nirca.