EZEQUIEL 18 - Dios Rimashcata Quillcashcami

Juchayuc runa huañuna cashcamanta

¹ Mandac Dios ñucata rimashpaca:

² «Israel llactapi yuyaita cuc rimaicunata rimashpaca: “Taitacuna jayac uvasta micushcamantami churicunaca quiruta nanachin” nincunami. Chaica, ¿imatatac yuyachin?

³ Mandac Dios ñuca shutipimi nini: ¡Israel llactapica cai rimaicunataca ña mana ashtahuan rimanguichicchu!

⁴ Riquichic, taitapish, churicunapish ñucapacmi. Maijanpish juchayuc runami huañunga.

⁵ Cashcata ruhuac runaca, allitami ruhuan. Chaimantami

⁶ lomacunapi tiyac altar ladopi mana micun. Israelcuna ruhuashca dioscunatapish mana mañanchu, shucpac huarmita mana japirinchu, quilla ungüihuan cac huarmipipish mana chayarinchu.

⁷ Pitapish mana llaquichinchu, debimanta prendashcatapish cutichinmi. Mana shuhuanchu, yarcaihuan caccunamanpish caranmi, churana illaccunamanpish churachinmi.

⁸ Cullquita mañachishpapish interestaca mana japinchu. Pitapish mana millaita ruhuanchu. Runacunapura piñanacucucpipish, cashcata ruhuashpami allichin.

⁹ Ñuca mandashcacunatapish quillcachishcacunatapish tucuita pactachishpami causan. Paica cashcata ruhuac cashcamantami mana huañunga. Chaitaca Mandac Dios ñucami nini.

¹⁰ Ashtahuanpish paipac churica shuhuac, huañuchic, ima millaita ruhuac,

¹¹ lomacunapi tiyac altarcunapi micuc, shucpac huarmita japiric,

¹² huacchacunatapish, imata mana chariccunatapish llaquichic, shuhuac, debimanta prendashcatapish mana cutichic, ruhuashcalla dioscunata adorac,

¹³ cullquita mañachishpapish interesta japic runaca, ¿causangachu? ¡Paica mana causangachu! Cai tucui millaita ruhuashcamantaca huañungatacmi. Chashnami paipac juchamanta huañunga.

¹⁴ Ashtahuanpish chai millai runapac churi paipac taita ruhuashca juchacunata ricushpapish, chai juchacunata mana ruhuashpa,

¹⁵ lomacunapi tiyac altarcunapi mana micushpa, israelcuna ruhuashca dioscunata mana adorashpa, shucpac huarmita mana japirishpa,

¹⁶ pitapish mana llaquichishpa, debimanta prendata mana japishpa, mana shuhuashpa, yarcaihuan caccunaman carashpa, churana illaccunaman churachishpa,

¹⁷ huacchata llaquishpa, cullquita mañachishpapish, mana interesta japishpa, ñuca quillcachishcacunata huacaichishpa, ñuca mandashcacuna nishca shina causashpaca paipac taitapac juchacunamantaca mana huañungachu, ashtahuanpish causangami.

¹⁸ Paipac taitaca millaita ruhuac, shucpac charishcata quichuc, tucuipac ñaupapi imapish mana allita ruhuac cashcamantaca huañungami. Chaica, paipac juchamantami huañunga.

¹⁹ Cancunaca: “¿Imamantatac churica taitapac juchamanta llaquita mana apan?” nishpa tapunguichicchari. Shina cashpapish churica cashcata ruhuac cashcamantami allita ruhuarca. Chaimantami ñuca quillcachishcacunatapish tucuita cazurca. Chaimantami paica causanga.

²⁰ Maijanpish quiquin juchamantami huañunga. Churica taitapac juchamantaca mana huañungachu. Shinallatac taitapish churipac juchamantaca mana huañungachu. Cashcata ruhuac runaca allitami japinga. Mana allita ruhuac runaca llaquitami apanga.

Mandac Diosca cashcata ruhuac cashcamanta

²¹ Ashtahuanpish mana allita ruhuac runa cai tucui millaita ruhuashcamanta anchurishpa, ñuca quillcachishcacunata pactachishpa, causacca mana huañungachu.

²² Pai millaita ruhuashcacunataca mana yuyarishachu. Ashtahuanpish paica cashcata ruhuac cashcamantami causanga.

²³ Mandac Dios ñucaca, ñucata mana manchac runa huañuchunca mana munanichu. Millaita ruhuanata saquicca, ¿manachu causanga?

²⁴ Ashtahuanpish cashcata ruhuac runa, allita ruhuanata saquishpa millaita ruhuaccuna shina causashpaca, ¿causangachu? Pai cashcata ruhuac cashcataca mana yuyarishachu. Ashtahuanpish pai ñucata mana cazushpa, millaita ruhuashcamantaca huañungami.

²⁵ Ashtahuanpish cancunaca: “Mandac Diosca mana cashcata ruhuacchu” ninguichicmi. Israelcunalla, ñuca ruhuashcacunaca, ¿manachu cashcata ruhuashca? Ashtahuanpish cancunami mana allita ruhuanguichic.

²⁶ Cashcata ruhuac runa allita ruhuanata saquishpa, millaita ruhuashpaca huañungami. Paica mana allita ruhuashcamantami huañunga.

²⁷ Ñucata mana manchac runa mana allita ruhuanata saquishpa, cashcata ruhuai callarishpaca causangami.

²⁸ Tucui millaita ruhuashcamanta llaquirishpa, chaita saquishpaca causangami. Mana huañungachu.

²⁹ Israelcunalla, cancunaca: “Mandac Diosca mana cashcata ruhuacchu” ninguichicmi. Israelcunalla, Ñuca ruhuashcacunaca, ¿manachu cashcata ruhuashca? Ashtahuanpish cancunami mana allita ruhuanguichic.

³⁰ Israelcunalla, tucui cancuna ruhuashcatami taripasha. Tucui millaita ruhuashcamanta llaquirishpa, ñucapacman cutimuichic. Chashna cutimucpica, cancunapac juchamantaca mana llaquichishachu.

³¹ Juchacunata ruhuashpa, ñucata llaquichishcata yuyarishpa shungutapish, yuyaitapish mushucyachichic. Israelcunalla, ¿imamantatac huañunguichicyari?

³² Ñucaca pipish ama huañuchunmi munani. ¡Millaita ruhuashcamanta llaquirishpa, ñucapacman shamuichic. Causanguichicmi! Chaitaca Mandac Dios ñucami nini.