EZEQUIEL 17 - Dios Rimashcata Quillcashcami

Angahuanpish, uvas-huanpish chimbapurashcamanta

¹ Mandac Dios ñucata rimashpaca:

² «Huañunalla runa, chimbapurashpa israelcunaman shuc parlota

³ parlashpa: “Mandac Diosca: Jatun alasyuc, tauca color achca plumacunayuc shuc jatun angami Líbano urcumanta cedro yura ñahuita apangapac shamurca.

⁴ Chai yura puntapi cac llullu ñahuita pitishpami randishpa, catushpa causaccunapac llactaman aparca. Chashnami catuccunapac, randiccunapac pueblopi churarca.

⁵ Allpapi tarpushca muyutapish alli allpapi tarpungapacmi aparca. Chai muyutaca sauce yurata tarpuc shinami yacupi tarpurca.

⁶ Muyu huiñashpaca uchilla pangasapa uvas yurami tucurca. Chai yuraca sapiyashpa huiñashpami, jatun anga ladoman huiñarca.

⁷ Shinallatac jatun alasyuc plumasapa shuc jatun angapish tiyarcami. Chai jatun angapac ladomanmi uvasca sapiyashpa, ramacunaca huiñarca. Chai yura tarpushcapi ashtahuan yacu tiyachunmi, paipac ladoman huiñarca.

⁸ Chai uvas huiñashpa, pangasapa tucushpa, alli granota pucuchunmi, achca yacu tiyac alli allpapi tapurca” ninmi ningui.

⁹ Canca: “Mandac Diosca: ¿Chai yuraca allichu huiñanga? ¿Manachu jatun angucunata piticpica, yurapish chaquinga? Pangasapa sumac yura cashpapish anguyashpami, tucui chaquinga. Chai yurata sapindi anchuchingapacca, mana achca fuerza, mana achca gentecunachu minishtiringa.

¹⁰ Riqui, caipi tarpushca yuraca, ¿allichu huiñanga? Inti llucshina ladomanta huaira shamushpa huactacpica, ¿manachu anguyashpa chaquinga? ¡Verdinlla yura cashpapish, tarpushca pamballapitacmi chaquinga!” ninmi ningui» nirca.

¹¹ Mandac Dios ñucata rimashpaca:

¹² «Chai mana cazuc gentecunataca: “Cai parlo imata nisha nishcataca, ¿manachu entendinguichic?” ningui. Paicunataca: “Riquichic, Babilonia llacta jatun mandac Jerusalenman shamushpami, jatun mandactapish, quipa mandaccunatapish Babilonia llactaman prezu aparca.

¹³ Shinallatac jatun mandacpac huahuacunapuramanta shuc mandacta japishpami, paihuan ari ninacurca. Cai llactapi causac sinchi mandaccunatapish pusharcami.

¹⁴ Chaica Jerusalenta mandaccuna ama cutin jatarishpa mandachun, paihuan ari nishcata pactachishpa, cumurishpa causachunmi chashnaca ruhuarca.

¹⁵ Chashna ari nishca cashpapish mana cazushpami, maijan huillaccunata Egipto llactapi caballocunatapish, achca runacunatapish mañachun cacharca. Chashna ruhuashpaca, ¿allichu causanga? Ari nishcata paquic runaca, ¿quishpiringachu?

¹⁶ Mandac Dios ñuca shutipimi nini: Chai runa pai ari nishcata mana cazushcamantaca mandac cachun churashca jatun mandacpac Babilonia llactallapitacmi huañunga. Paihuan ari nishcata yangapi churashpami, pactachinacunatapish mana cazurca.

¹⁷ Achca gentecunata huañuchingapac macanacuna pushtuta ruhuacucpipish, torrecunata shayachicucpipish Egipto llactata jatun mandac Faraonca achca runacunahuan, achca soldadocunahuan cashpapish, imata mana ruhuai pudingachu.

¹⁸ Ari nishcata yangapi churashcamanta, mana allicunata ruhuashcamantaca mana quishpiringuichu.

¹⁹ Chaimantami Mandac Dios ñucaca: Ñucahuan ari nishcata yangapi churashpa, mana cazushcamantaca llaquichishatacmi. Chaitaca ñuca shutipimi nini.

²⁰ Ñucaca paipac jahuapi linchita shitashpami japisha. Ñucata mana cazushpa millaita ruhuashcamantaca Babilonia llactaman apashpami taripashpa llaquichisha.

²¹ Shinallatac cambac mai sinchi soldadocunapish tucuimi jatun macanacuipi huañunga. Cutin saquiriccunaca caita, chaitami ringa. Chashna ruhuacta ricushpami, Mandac Dios ñuca rimashcata yachanguichic.

²² Mandac Dios ñucaca: Ashtahuanpish paipac jahuapi linchita shitashpami, ñuca tucllapi urmachisha. Jatun cedro yura puntapi cac llullu retoñacuc ñahuita japishpami, sumac jatun urcu jahuapi tarpusha.

²³ Chai ramataca Israel llacta jatun urcupimi tarpusha. Chai ramacuna huiñashpaca granota pucushpami, sumac cedro yura tucunga. Tucuilaya zhutacuna shamushpami chai rama ucupi llanduringa.

²⁴ Mandac Dios ñuca jatun yurata urmachishpa, uchilla yurata jatunyachic cashcatapish, verdinlla yuracunata chaquichishpa, chaquishca yurata verdiyachic cashcatapishmi shuctac yuracunaca yachanga. Chaitaca Mandac Dios ñucami nini. Chaitaca pactachishatacmi” ninmi ningui» nirca.