EZEQUIEL 15 - Dios Rimashcata Quillcashcami

Jerusalenpi causaccunaca mana pucuc uvas yura shina cashcamanta

¹ Mandac Dios ñucata rimashpaca:

² «Huañunalla runa, ¿uvas ramaca shuctac ramata yallichu?

³ Chai uvas ramataca, ¿imatapish ruhuangapac apangachu? Chai ramataca, ¿imatapish huarcunata ruhuangachu?

⁴ Riquichic, chai ramaca ninapi rupachingapacllami alli. Chashna puntacuna rupacpica, caspi chaupipish rupangami. Chaica, ¿imapactac valinga?

⁵ Manarac rupashpapish imapac mana valircachu. Ninapi rupashpa, tucurishcacarin, ¿imapactac valingayari?

⁶ Chaimantami Mandac Dios ñucaca: Ima shinami sacha yuracunapac chaupimanta uvas ramata japishpa, ninapi tucui rupachircani, chashnallatacmi Jerusalenpi causaccunatapish ruhuasha.

⁷ Paicunata llaquichingapacmi shayarisha. Ninamanta quishpirishca cacpipish, ninallatacmi tucuchinga. Paicunata chashna piñarishpa llaquichicpimi ñucataca Mandac Dios cashcata yachanguichic.

⁸ Ñucata mana cazushcamantami cai llactataca llaquinayaita tucuchishpa saquisha» nirca.