EZEQUIEL 14 - Dios Rimashcata Quillcashcami

Ruhuashcalla dioscunata adoraccunata llaquichinamanta

¹ Israelcunata pushac yuyaccunapuramanta ñucapacman shamushpa, ñuca ñaupapi tiyacucpi,

² Mandac Dios ñucata rimashpaca:

³ «Huañunalla runa, cai runacunaca ruhuashcalla dioscunata yallita adorashpami, juchapi urmashcacuna. Chashna ruhuashca jahua ñucata tapungapac shamuchunca, ¿maitatac saquishayari?

⁴ Chaimanta canca: “Mandac Diosca: Israelcunapuramanta maijan ruhuashcalla dioscunata tucui shunguhuan adorashca jahua, shinallatac juchapi urmachicta ricushca jahua ñuca ima nishcata huillacman tapungapac shamuc runataca pai ruhuashcalla dioscunata charishca shinallatacmi llaquichisha.

⁵ Ruhuashcalla dioscunata adorangapac ñucamanta anchuric israelcunata paicunapac shungupi yuyachingapacmi chashnaca ruhuasha” ninmi ningui.

⁶ Chaimanta canca: “Israelcunata Mandac Diosca: Cancunapac ruhuashcalla dioscunata saquishpa, ñucapacman cutimuichic. Cai tucui millanacunata ruhuashcataca ama ashtahuan ricuichicchu.

⁷ Maijan israelcunapish, Israel llactapi causac shuctac llacta runacuna ñucata saquishpa, ruhuashcalla dioscunata adorashpa, juchapi urmashpa, ñuca ima nishcata huillacta tapungapac shamucpica, ñuca quiquinmi cutichisha.

⁸ Chai runata chashna llaquichishpami tucuipac yuyarina cachun, shuc señalta ruhuasha. Chashnami ñuca acllashcapuramanta anchuchisha. Shina ruhuacpimi, ñucataca Mandac Dios cashcata yachanguichic.

⁹ Ñuca ima nishcata huillac llullashpa huillachunca, ñucallatacmi cacharcani. Paicunataca llaquichishpami, ñuca acllashca israelcunapac chaupimanta anchuchisha.

¹⁰ Ñuca ima nishcata huillacpish, paiman tapuc runapish juchanchishpa, llaquichishcami canga.

¹¹ Chashnami, tucui israelcuna ñucamanta ama anchurichun, ama ashtahuan mana cazushpa mapayachun llaquichisha. Paicunaca ñuca acllashcacunami canga, ñucaca paicunapac Diosmi casha” ninmi ningui» nirca.

Jerusalenpi causaccunata llaquichinamanta

¹² Mandac Dios ñucata rimashpaca:

¹³ «Huañunalla runa, cai llactapi causaccuna ñucata saquishpa, juchata ruhuacpica, ñucallatacmi ñuca maquita alzashpa llaquichisha. Micunata mana cushpami, yarcaihuan tucuchisha. Chashnami yalli yarcaihuan gentecunatapish, animalcunatapish tucuchisha.

¹⁴ Noé, Daniel, Job cai llactapi causanman carca, cai quimsa runacunallami paicuna cashcata ruhuaccuna cashcamanta quishpirinman. Chaitaca Mandac Dios ñucami nini.

¹⁵ Cai llactaman piña animalcunata cachashpa, llaquinayaita tucuchicpica, chai llacta chaupitaca pipish mana pasai pudinmanchu, cai llactaca shitashcami saquirinman.

¹⁶ Mandac Dios ñuca shutipimi nini: Chai quimsa runacuna cai llacta chaupipi causacucpica, paicunapac churicunapish, ushicunapish mana quishpiri pudinmanchu. Ashtahuanpish paicunallami quishpirinman. Cai llactaca llaquinayaitami shitashca saquirinman.

¹⁷ Jatun macanacuita cai llactapi callarichishpaca gentecunatapish, animalcunatapish tucuchimanmi.

¹⁸ Mandac Dios ñuca shutipimi nini: Chai quimsa runacuna cai llacta chaupipi causacucpica, paicunapac churicunapish, ushicunapish mana quishpiri pudinmanchu, ashtahuanpish chai quimsa runacunallami quishpirinman.

¹⁹ Mana cashpaca, ñuca yallita piñarishpa, jatun ungüita cai llactaman cachashpaca, gentecunatapish, animalcunatapish huañuchimanmi.

²⁰ Mandac Dios ñuca shutipimi nini: Noé, Daniel, Job chaipi cacpipish, shuc churillapish, shuc ushillapish mana quishpirinmanchu. Ashtahuanpish paicunallami cashcata ruhuac cashcamanta quishpirinman.

²¹ Mandac Dios ñucaca: “Jerusalenpi causacuc gentecunata, animalcunata tucuchingapacca, jatun macanacuitapish, yarcaitapish, piña animalcunatapish, ungüicunatapishmi cachasha. Chai chuscu llaquicunahuanmi tucuchisha.

²² Chai pueblopica asha churicuna, ushicunallami saquiringa. Shina cacpipish, paicunataca llucchishpami apanga. Paicuna cancunapacman shamucpimi, paicuna ima shina causashcatapish, imata ruhuashcatapish ricunguichic. Chaita ricushpami, Jerusalenpi causaccunata ñuca ima shina llaquichishcamanta cushicunguichic.

²³ Paicuna ima shina causashcata, imata ruhuashcata ricushpami cushicunguichic. Chaimantami chai pueblopi causaccunataca mana yangamanta llaquichishcata yachanguichic. Chaitaca Mandac Dios ñucami nini” ninmi» nirca.