EZEQUIEL 12 - Dios Rimashcata Quillcashcami

Prezu apanata Ezequiel ricuchishcamanta

¹ Mandac Dios ñucata rimashpaca:

² «Huañunalla runa, canca mana cazuccunapac chaupipimi causacungui. Paicunaca mana cazuccuna cashpami, ñahuita charishpapish mana ricun, ringrita charishpapish mana uyan.

³ Huañunalla runa, quipita allichishpa, paicuna ricucucpi, can causacushcamanta punzha pacha llucshishpa ringui. Chaita ricushpaca entendingapishchari. Paicunaca mana cazuccunami.

⁴ Canca punzha pacha, paicuna ricucucpi, shitashca pamban apana imacunata llucchingui. Chashna llucchishpaca prezushca riccuna shina, quipita apashpa, tucui ricucucpi chishita ringui.

⁵ Paicuna ricucucllapitac pircata jutcushpa llucshingui.

⁶ Paicuna ricucucpi, quipita apashpa amsayanata llucshingui. Llactata mana ricungapacca ñahuita taparingui. Cantaca israelcunapac jatun llaqui shamuna cashcata ricuchichunmi churarcani» nirca.

⁷ Shina nicpica, pai mandashca shinami, punzha pacha prezucuna shina, quipita apashpa llucchircani. Ña amsayanatami ñuca quiquin maquihuan pircata jutcushpa, paicuna ricucucpi, quipita humbroschishpa llucshircani.

⁸ Cayandi tutamanta Mandac Dios ñucata rimashpaca:

⁹ «Huañunalla runa, ¿manachu chai mana cazuc israelcunaca: “¿Imatatac ruhuacungui?” nishpa tapuncuna?

¹⁰ Shina nicpica canca: “Mandac Diosca: Cai ricuchishcaca Jerusalenta mandacpish, chaipi causac israelcunapish, ima tucunatami ricuchin” ninmi ningui.

¹¹ Shinallatac: “Ñucami cancuna ima tucunata ricuchicca cani. Ima shinami ñuca ruhuarcani, chai shinallatacmi cancunatapish ruhuanga. Cancunaca prezumi ringuichic.

¹² Cancunata mandacca amsayanata quipita humbroschishpami, pircata jutcushpa llucshi ringa. Llactata mana ricungapacca, ñahuitami taparinga.

¹³ Ashtahuanpish paipac jahuapi linchita shitashpami, ñuca tucllapi urmachisha. Chaimantaca caldeocuna causana Babilonia llactaman apachunmi saquisha. Llactataca mana ricungachu. Chaipimi huañunga.

¹⁴ Paipac muyundipi causac paita ayudaccunatapish, paipac soldadocunatapish espadahuan llaquichishpami caita, chaita cachasha.

¹⁵ Chashna caita, chaita cachacpimi, ñucataca Mandac Dios cashcata yachanga.

¹⁶ Paicunapuramantaca ashallatami jatun macanacuipi yarcaihuan, ungüihuan huañunamantaca quishpichisha. Paicunami mai llactaman rishpa, yalli millana juchacunata ruhuashcata huillanga. Shina huillacpimi, ñucataca Mandac Dios cashcata yachangacuna” ninmi ningui» nirca.

¹⁷ Mandac Dios ñucata rimashpaca:

¹⁸ «Huañunalla runa, chucchushpa micunata micuiyari, manchaihuan, llaquihuan yacuta ubiaiyari.

¹⁹ Mandac Dios ñuca Israel llactapi causaccunatapish, Jerusalenpi causaccunatapish rimashpaca: “Micunataca llaquihuanmi micunga, yacutaca manchaihuanmi ubianga. Paicuna millaita ruhuashcamantami llactaca tucuchishca saquiringa.

²⁰ Gentecuna causacuc llactacunapish tucuimi tucuchishca canga. Pambacunaca llaquinayaitami shitashca saquiringa. Chashna ruhuacpimi, ñucataca Mandac Dios cashcata yachangacuna nini” ninmi ningui» nirca.

²¹ Mandac Dios ñucata rimashpaca:

²² «Huañunalla runa, cancunaca: “Punzhacunaca pasanmi. Muscuipi shina ricushcaca mana pactanchu” nishpaca, ¿imatatac nisha ninguichic?

²³ Canca: “Mandac Diosca: Yuyachic shimicunataca chingachishami. Chaitaca cai Israel llactapica jaicapi mana rimangachu. Ashtahuanpish punzhacunaca ñami chayamushca, muscuipi shina ricushcapish tucuimi pactamushca.

²⁴ Israelcunapurapica yanga muscuipi shina ricuccunapish, llullashpa huillaccunapish jaicapi mana tiyangachu.

²⁵ Imalla tucunataca Mandac Dios ñucami rimagrini. Chai rimashcaca utcami pactanga. Mana cazuc israelcunalla, cancunaman huillashcataca cancuna causacucpiracmi pactachisha nini” ninmi ningui» nirca.

²⁶ Shinallatac Mandac Dios ñucata rimashpaca:

²⁷ «Huañunalla runa, israelcunaca: “Cai runa muscuipi shina ricushcapish, ima tucunata huillashcapish unai huatacunapimi pactanga” nincunami.

²⁸ Chaimanta canca: “Mandac Diosca: Ñuca huillashcaca ña mana ashtahuan unayangachu, ashtahuanpish ñuca huillashcaca pactangatacmi” ninmi ningui» nirca.