EZEQUIEL 11 - Dios Rimashcata Quillcashcami

Mandaccunata llaquichinamanta

¹ Diospac Espiritumi Diospac huasi inti llucshina ladoman cac punguman aparca. Chai pungu yaicunapica ishcai chunga pichca runacuna shayacuctami ricurcani. Chai runacunapurapica Azurpac churi Jaazaniasta, Benaiaspac churi Pelatiastami ricurcani. Paicunaca pueblopi causaccunata mandacmi carca.

² Mandac Diosca: «Huañunalla runa, paicunami cai pueblopica millaita ruhuashpa, mana alli yuyaita cun.

³ Paicunaca: “Llaquicunaca manarac chayamungachu, huasicunata ruhuashunchiclla. Cai puebloca manga shinami canga, ñucanchicca aicha shinami cashun” nincunami.

⁴ ¡Chaimanta huañunalla runa, paicunata llaquichina cashcata huillai!» nirca.

⁵ Mandac Diospac Espíritu ñucapacman shamushpaca: «Mandac Diosca: “Israelcunalla, cancunaca chashnami rimashcanguichic. Ñucaca cancuna imata yuyacushcatapish yachanimi.

⁶ Cai llactapica yallitami cancunaca huañuchishcanguichic, ñancunapish huañushca cuerpocuna jundami.

⁷ Chaimantami, Mandac Dios ñucaca: Cai llacta chaupipi cac huañushcacunaca aicha shina, cutin cai puebloca manga shinami canga nini. Shina cacpipish, cancunataca cai llactamanta llucchishami.

⁸ Cancunaca jatun macanacuitami manchanguichic. Chaimantami jatun macanacuita cancunata llaquichichun cachasha. Chaitaca Mandac Dios ñucami nini.

⁹ Cancunataca cai pueblomanta llucchishpami, caru llacta runacunapac maquipi churasha. Chashnami cancunataca llaquichisha.

¹⁰ ¡Cancunaca jatun macanacuipimi huañunguichic! Israel llacta linderocunapimi cancunataca taripashpa llaquichisha. Chashna ruhuacpimi, ñucataca Mandac Dios cashcata yachanguichic.

¹¹ Cai puebloca mana manga shinachu canga. Cancunapish mana aicha shinachu canguichic. ¡Israel llacta linderopimi cancunata taripashpa llaquichisha!

¹² Chashna ruhuacpimi, ñucataca Mandac Dios cashcata yachanguichic. Cancunaca ñuca mandashcacunata mana cazushpami purircanguichic. Pactachichun mandashcacunatapish mana cazushpami causarcanguichic. Ashtahuanpish cancunapac muyundi llactacunapi causaccuna shinami causarcanguichic nini” ninmi ningui» nirca.

¹³ Chashna tucunata ñuca huillacucpimi, Benaiaspac churi Pelatiasca huañurca. Chaimantami ñucaca pambacaman cumurishpa: «¡Mandac Dioslla! ¿maijan saquirishca israelcunatapish tucuchigringuichu?» nishpa mañarcani.

Mandac Dios ari nishcata mushucyachinamanta

¹⁴ Mandac Dios ñucata rimashpaca:

¹⁵ «Huañunalla runa, cambac quiquin huauquicuna, israelcunata, Jerusalenpi causaccunata rimashpaca: “¡Mandac Diosmanta caruyaichic! ¡Ñucanchicmanmi cai llactataca curca!” ninmi.

¹⁶ Chaimanta canca: “Mandac Diosca: Paicunata caru llactacunapi causagrichun cachashpapish, ñucallatacmi ñucata yuyarina huasi shinaca casha” ninmi.

¹⁷ Chaimanta canca: “Mandac Diosca: Caita, chaita rishpa, causacucpimi, chai llactacunamanta tandachishpa, Israel llactata cusha.

¹⁸ Cai Israel llactaman cutishpami ruhuashcalla dioscunatapish, millaita ruhuanatapish saquinga.

¹⁹ Paicunamanca mushuc yuyaita, mushuc shungutami cusha. Rumi shunguta anchuchishpami, aicha shunguta churasha.

²⁰ Chashna ruhuacpimi, ñuca mandashcacunatapish, pactachichun mandashcacunatapish cazushpa causanga. Paicunaca ñuca acllashcacunami canga. Ñucaca paicunapac Diosmi casha.

²¹ Ashtahuanpish ruhuashcalla dioscunata adorana yuyaihuan, millaita ruhuana munaihuan puriccunataca, taripashpami llaquichisha nini” ninmi ningui» nirca.

Sumaimana achic nicuc Jerusalenmanta anchurishcamanta

²² Chai quipaca, querubincuna alasta alzashpa jahuata ricpica, ruedacunapish paicunahuanmi rirca. Israelcunapac Mandac Diospac sumaimana achic nicucpish paicunapac jahuapimi carca.

²³ Mandac Diospac sumaimana achic nicucca pueblo chaupimanta huichai rishpami, inti llucshina ladoman cac urcu jahuapi tiyarirca.

²⁴ Chai quipa, Mandac Diospac Espiritumi ñucataca muscuipi shina cutinllatac prezu apashca gentecuna causacuc caldeocunapac llactaman pusharca. Chai quipaca ña mana muscuipi shinataca ricurcanichu.

²⁵ Chaiman rishpaca, Mandac Dios tucui imalla ricuchishcatami chaipi cac prezucunaman huillarcani.