EZEQUIEL 10 - Dios Rimashcata Quillcashcami

Diospac huasimanta sumaimana achic nicuc anchurishcamanta

¹ Querubincunapac uma jahuapica shuc zafiro rumimanta ruhuashca mandashpa tiyarinaman ricchatami ricurcani.

² Chaimantami Mandac Diosca lino churanata churarishca runataca: «Querubincunapac ucupi tiyacuc rueda ucuman yaicushpa, rupacuc carbonta maqui jundata japishpa, pueblo jahuata shic-huai» nirca. Shina nicpimi, chai runaca ñuca ricucucpi yaicurca.

³ Chai runa yaicucpica, querubincunaca Diospac huasi ura ladopimi carca. Shinallatac ucupi tiyac canzha pambapica puyumi jundarca.

⁴ Mandac Diospac sumaimana achic nicucca querubincunapac jahuamantaca pungupimi tiyaringapac huichai rirca. Diospac huasipica puyu, cutin ucupi tiyac canzha pambapica Mandac Diospac sumaimana achic nicucmi jundarca.

⁵ Shinallatac querubincunapac alascuna patac nishcapish Mandac Dios rimashca shinami, paipac huasi ucupi tiyac canzha pambacaman uyarirca.

⁶ Shinallatac Mandac Diosca lino churanata churashca runataca: «Querubincunapac ruedacuna ucumanta ninata japi» nirca. Chaimantami chai runaca ninata japingapac yaicushpa, ruedacuna ladopi shayarirca.

⁷ Chai querubincunapuramanta shucca paicunapac chaupimanta ninata japishpami, lino churanata churashca runapac maquipi churarca. Chai runa ninata japishpaca llucshircami.

⁸ Querubincunapac alascuna ucupica gentepac maqui shinatami ricurcani.

⁹ Chai querubincunapac cuchupica chuscu ruedacunatami ricurcani. Cada querubincunapac cuchupimi shuc rueda carca. Chai ruedacunaca crisólito rumi shina jagan nicucmi carca.

¹⁰ Tucui ruedacunami chailayallatac carca. Shuc rueda ucupi shuctac rueda churashca shinami carca.

¹¹ Chai ruedacunaca chuscu ladomantami mana muyurishpa, ric carca. Punta rueda maiman ricpica, caishuc ruedacunapish caticmi carca. Maijan ladoman ricushpapish mana muyuricchu carca.

¹² Chai querubincunaca cuerpopipish, huashapipish, maquicunapipish, alascunapipish, muyundita ñahui jundami carca.

¹³ Ñucaca chai ruedacunata: “¡Carreta!” nishpa, shutichictami uyarcani.

¹⁴ Tucui querubincunami chuscu ladoman ñahuita charirca. Shuc lado ñahuica querubinpac, caishuc lado ñahuica gentepac, caishuc lado ñahuica leonpac, caishuc lado ñahuica aguilapac ñahui shinami carca.

¹⁵ Chai querubincunaca Quebar jatun yacu cuchupi ñuca ricushca causaita chariccuna shinami carca. Chai querubincunaca jatarishpa rircami.

¹⁶ Paicuna puri callaricpica, ruedacunapish puri callarircami. Chai querubincuna jahuata jataricpica, chai ruedacunapish jatarircami.

¹⁷ Paicuna shayaricpica, ruedacunapish shayarircami. Paicuna jahuata ricpica, ruedacunapish jahuatami paicunahuan rirca. Chai ruedacunapica causaita chariccunapac espiritullatacmi carca.

¹⁸ Chai quipami huasi umbral jahuapi tiyacuc Mandac Diospac sumaimana achic nicucca querubincunapac jahuapi tiyarirca.

¹⁹ Ñuca ricucucpimi, chai querubincunaca alascunata alzashpa allpamanta rirca. Paicuna jatarishpa ricpica, ruedacunapish jatarishpa rircami. Chaimantaca Mandac Diospac huasiman rishpa, inti llucshina ladoman cac pungupimi shayarirca. Israelcunapac Diospac sumaimana achic nicucca paicunapac jahuapimi carca.

²⁰ Chaicunaca Quebar jatun yacu cuchupi israelcunapac Dios tiyacuc ucupi ricushca causaita chariccunallatacmi carca. Chaipimi querubincunallatac cashcata ricsircani.

²¹ Tucuimi chuscu ñahuita, chuscu alasta charirca. Paicunapac alas ucupica gentepac maquiman ricchami carca.

²² Paicunapac ñahuicunaca Quebar jatun yacu cuchupi ricushca shinallatacmi carca. Tucuimi mana muyurishpa, ñaupaman purirca.