EZEQUIEL 1 - Dios Rimashcata Quillcashcami

Diospac sumaimana achicta Ezequiel ricushcamanta

¹ Quimsa chunga huata, chuscu quilla, pichca punzha cacpimi ñucaca prezu rishcacunahuan Quebar yacu patapi carcani. Chaipi cashpami, jahua pacha pascaricpi, Dios ricuchishcata muscuipi shina ricurcani.

² Jatun mandac Joaquinta prezu apashcaca ñami pichca huata, pichca quilla tucurca.

³ Chaipimi Mandac Diosca caldeocunapac llactapi cac Quebar yacu patapi ñucaman huillarca. Ñucaca Buzipac churi Ezequielmi cani. Chaipimi Mandac Diosca ñucata rimarca.

⁴ Ñucaca jahua ladomanta acapana huaira shamucucta, achca puyu jahuata nina pillurishca shamucuctami ricurcani. Cutin chai chaupipica sumaimana achiclla bronceman riccha jagan nicuctami ricurcani.

⁵ Chai chaupipica causaita chariccunami chuscu ricurirca. Paicunaca genteman ricchami carca.

⁶ Cada shucmi chuscu ñahuita, chuscu alasta charirca.

⁷ Paicunapac chaquica rectomi carca. Chaquica becipac chaqui shina, bronce jagan nicuc shinami carca.

⁸ Paicunapac alas ucupica chuscu ladomanmi gente maquita charirca. Chuscu ladomanmi ñahuitapish, alastapish charirca.

⁹ Alascunaca caishucpac, chaishucpac alascunahuanmi tupanacushca carca. Maijan ladoman ringapacpish, mana chicanyarishpami ñaupaman purirca.

¹⁰ Paicunapac ñahuicunaca cashnami carca: Ñaupa ladomanca gentepac ñahui shina, alli ladomanca leonpac ñahui shina, lluqui ladomanca huagrapac ñahui shina, huasha ladomanca aguilapac ñahui shinami carca.

¹¹ Chashnami paicunapac ñahuica carca. Paicunapac ishcai alastaca jahuata chutashcami carca. Alaspura tupanacushcami carca. Chaishuc ishcai alascunahuanca paicunapac cuerpotami tapashca carca.

¹² Tucui paicunami ñaupallaman purircacuna. Paicunaca maijan ladoman espíritu pushacpica, mana muyushpami purircacuna.

¹³ Causaita chariccunaca carboncuna jagan nicuc shinami carca. Paicunapac chaupipica mechacuna rupacuc shinami, caiman chaiman cuyuricurca. Chai ninaca yallitami achicyachicurca, shinallatac relampa jagan nicucmi llucshicurca.

¹⁴ Causaita chariccunaca relampa shinami, caiman chaiman volashpa puricurca.

¹⁵ Ñuca ricushpaca, chai causaita chariccunapac chuscu ladoman ruedacuna allpa jahuapi cactami ricurcani.

¹⁶ Chai ruedacunaca crisólito rumi shinami carca. Tucui chai chuscu ruedacunami chashnallatac carca. Chaupi ruedapi shuc ruedata quingraiman ruhuashca shinami carca.

¹⁷ Chai ruedacuna purishpaca, mana chicanyarishpami chuscu ladoman purirca.

¹⁸ Chai rueda arocunaca yallita mancharinami carca. Tucui chai chuscu ruedacunami muyundita ñahuicuna junda carca.

¹⁹ Causaita chariccuna puricpica, ruedacunapish purircami. Cutin jahuata jataricpica, chai ruedacunapish jatarircami.

²⁰ Maiman espíritu pushacpica, chai ruedacunapish rircallami. Causaita chariccunapi cac espiritullatacmi ruedacunapipish carca.

²¹ Causaita chariccuna puricpica, ruedacunapish purircami. Paicuna shayaricpica, ruedacunapish shayarircami. Cutin jahuata jataricpica, ruedacunapish jatarircami. Causaita chariccunapac espirituca ruedacunapimi carca.

²² Causaita chariccunapac uma jahuapica sumaimana cristalman riccha pambami ricurirca.

²³ Chai pamba ucupica, paicunapac alascunataca caishuc-huan chaishuc-huan tupanacuchishcami carca. Shinallatac tucui paicunami ishcai alas-huan paicunapac cuerpota tapashca carca.

²⁴ Paicuna puri callaricpi, alascunaca achca yacu huaj nicuc shina, Tucuita Ruhuac rimashca shina, achca runacuna puricuc shina, soldadocuna puricuc shinami uyarirca. Paicuna shayarishpaca, uraimanmi alascunataca churarca.

²⁵ Chashna alascunata uraiman churacpica, paicunapac uma jahuapi cac pambamanta rimashcami uyarirca.

²⁶ Chai pamba jahuapica, zafiro rumimanta ruhuashca mandangapac tiyarina tiyacuctami ricurcani. Chai tiyarinapica genteman ricchami tiyacurca.

²⁷ Chai genteman ricchaca, bronce jagan nicuc shinami carca. Paipac chaupipish, paipac muyundipipish nina jagan nicuc shinami carca. Cinturamanta huichaimanpish, urimampish nina rupacuc shinami, tucui muyundita carca.

²⁸ Tamya punzhacunapi cuichi puyupi ricuric shinami muyundi sumaimana achicta ricurcani. Mandac Dios sumac cashcami muscuipi shina ricurirca. Chaita ricushpaca, allpacaman cumurircanimi. Chaipica shuc rimashcatami cungailla uyarcani.