ÉXODO 8 - Dios Rimashcata Quillcashcami

Sapocunahuan llaquichishcamanta

¹ Mandac Diosca Moisestaca: —Faraonpacman rishpa: “Mandac Diosca: ‘Ñuca acllashca israelcuna ñucata servingapac richun saqui.

² Can paicunata mana cacharicpica, ñucami cambac tucui llactacunata sapocunahuan llaquichisha.

³ Jatun yacupica sapocunaca yallitami miranga. Chaimanta llucshishpami, can mandashpa tiyana huasimanpish, can sueñuna ucumanpish yaicunga. Cambac cama jahuapipish, canta serviccunapac huasipipish, hornocunapipish, tandata ruhuana bateacunapipishmi jundanga.

⁴ Sapocunaca cambac, cambac gentecunapac, shinallatac tucui canta serviccunapac cuerpoman huichicushpami puringa’ ninmi” ningui— nirca.

⁵ Mandac Diosca Moisestaca: —Aarontaca yacu jahuata, cucha jahuata, tucyac yacu jahuata, paipac varata chutachun mandai. Chashna chutacpica, tucui Egipto llactapimi sapocunaca jundaringa— nirca.

⁶ Chaimantami Aaronca tucui Egipto llacta yacucuna jahuata paipac varata chutarca. Shina ruhuacpica, sapocuna yacumanta llucshishpami, tucui Egipto llactapi jundarca.

⁷ Brujocunaca paicuna ruhuac cashca shinallatacmi tucui Egipto llactapi sapocunata jundachirca.

⁸ Shina ruhuacpimi, Faraonca Moisestapish, Aarontapish cayashpaca: —Ñucamantapish, ñucapac gentecunamantapish sapocuna anchurichun, Mandac Diosta mañaichic. Shina ruhuacpica, cambac gentecuna animalta huañuchishpa, Diosman cugrichun saquishallami— nirca.

⁹ Chaimantami Moisesca Faraontaca: —Can mandashpa tiyana huasimantapish, canta serviccunamantapish, cambac gentecunamantapish sapocuna anchurishpa, yacullapi causachunca, ¿ima horatac mañachun ningui? Chaita huillailla— nirca.

¹⁰ Shina nicpimi Faraonca: —Cayallata mañashpa cui— nirca. Shina nicpimi Moisesca: —Ñucanchicta Mandac Diosca, pai shina pi shuctac mana tiyashcata yachachunca, can nishca shinallatacmi ruhuanga.

¹¹ Sapocunaca canmantapish, cambac huasimantapish, canta serviccunamantapish, cambac gentecunamantapish anchurishpa, jatun yacullapi saquiringa— nirca.

¹² Chai quipami Moisespish, Aaronpish Faraonpac ñaupamantaca llucshirca. Moisés llucshishpaca, Faraonta llaquichichun cachashca sapocunata anchuchichunmi, Mandac Diosta mañarca.

¹³ Mandac Diosca Moisés mañashca shinallatacmi ruhuarca. Chaimantami huasi ucupipish, canzhapipish tucui sapocunaca huañurca.

¹⁴ Chai huañushca sapocunataca tandashpami, caipi chaipi montonarca. Chai sapocunaca yallitami ashnacurca.

¹⁵ Ña llaquicuna mana tiyacpica, cutinllatacmi Faraonca sinchi shungu tucurca. Chaimantami Moisestapish, Aarontapish Mandac Dios nishca shina, mana cazurca.

Piliscunahuan llaquichishcamanta

¹⁶ Chaimantami Mandac Diosca Moisestaca: —Aarontaca: “Tucui Egipto llactapi piliscuna jundachun, varahuan ñuto allpapi huactai” ningui— nirca.

¹⁷ Moisés nicpica, Aaronca paipac varahuan ñuto allpapi huactarcami. Chaimantami ñuto allpaca piliscuna tucushpa gentecunapipish, animalcunapipish jundarca.

¹⁸ Chaita ricushpaca, brujocunapish paicuna ruhuac cashca shinallatacmi piliscunata ruhuanata munarca. Ashtahuanpish chaita ruhuanataca mana pudircachu. Piliscunami gentecunapipish, animalcunapipish jundarca.

¹⁹ Chaimantami brujocunaca Faraontaca: —¡Caicunaca Dios ruhuashcami!— nirca. Shina nicpipish, Faraonca Mandac Dios nishca shinallatacmi sinchi shungu tucushpa, mana cazurca.

Chuspicunahuan llaquichishcamanta

²⁰ Mandac Diosca Moisestaca: —Tutamanta jatarishpa, Faraón yacuman llucshicpi, paihuan tupashpa: “Mandac Diosca: ‘Ñuca acllashcacuna ñucata servigrichun cachai.

²¹ Ñuca acllashcacunata mana cacharicpica, cantapish, canta serviccunatapish, cambac gentecunatapish chuspicunahuanmi yallita llaquichisha. Chai chuspicunami cambac huasicunapipish, Egiptopi causac gentecunapac huasipipish, tucui llactacunapipish yallita jundanga.

²² Chashna cacpipish, chai punzhallatacmi ñuca acllashcacuna causana Gosén llactata chicanyachishpa, chaimanca shuc chuspillapish mana yaicuchun saquisha. Chashna ruhuacpimi, cai llactapica Mandac Dios ñuca causacushcata yachanguichic.

²³ Ñuca acllashcacunataca cambac llactapi causaccunamanta chicanyachishami. Cayami chai ricuchinataca ricuchisha’ ninmi” ningui— nirca.

²⁴ Mandac Diosca chashnami ruhuarca. Chuspicunaca puyu shina shamushpami, Faraonpac, paita serviccunapac, tucui Egiptopi causaccunapac huasipipish jundarca. Chashnami tucui Egipto llactapi jundarca.

²⁵ Chaimantami Faraonca Moisestapish, Aarontapish cayashpaca: —Cancunapac Diosman animalta huañuchishpa cungapac richiclla. Ashtahuanpish cai llactapi chaitaca ruhuanguichic— nirca.

²⁶ Shina nicpimi Moisesca: —Mana chai shina ruhuanachu canchic. Chashna animalta huañuchishpa, Mandac Diosman cushpaca, Egipto runacunamanca millanatami ruhuashun. Chai shina paicunapac ñaupapi ruhuacpica, ¿manachu rumicunahuan shitashpa huañuchinga?

²⁷ Ñucanchicca quimsa punzhata purishpa, shitashca pambaman chayashpa, chaipimi Mandac Dios mandashca shina, paiman animalta huañuchishpa cushun— nirca.

²⁸ Shina nicpimi Faraonca: —Mana yalli caruyana cashpaca, shitashca pambapi animalta huañuchishpa, cancunata Mandac Diosman cugrichiclla. Chashnallatac ñucamantapish mañanguichic— nirca.

²⁹ Shina nicpimi Moisesca: —Ñucaca caimanta llucshishpami, Mandac Diostaca canmantapish, canta serviccunamantapish, tucui Egiptopi causaccunamantapish caya chuspicunata anchuchichun mañasha. Canca Mandac Diosman animalta cushpa, rupachigrichunca, mana jarcanachu cangui. Pacta llullashpa, ñucanchicta cashna nicunguiman— nirca.

³⁰ Chashna nishpami, Moisesca Faraonpacmanta rishpa, Mandac Diosta mañarca.

³¹ Mandac Diosca Moisés mañashcata uyashpami, Faraonpac, paita serviccunapac, tucui Egiptopi causaccunapac huasicunamantapish shucllapish mana saquishpa, tucui chuspicunata anchuchirca.

³² Chashna tucucpipish, Faraonca sinchi shungu tucushpami, cutinllatac Dios acllashcacuna richunca mana saquirca.