ÉXODO 6 - Dios Rimashcata Quillcashcami

¹ Shina nicpimi, Mandac Diosca Moisestaca: —Cunanmi ñuca Faraonta imata ruhuacta ricungui. Ñuca poderhuan llaquichicpimi cacharinga. Sinchita llaquichicpimi, paipac llactamanta llucchishpa cachanga— nirca.

² Cutinllatac Diosca Moisestaca: —Ñucaca Mandac Diosmi cani.

³ Ñucami tucui imatapish ruhuaclla Dios cani. Ñucami Abrahammanpish, Isaacmanpish, Jacobomanpish ricurircani. Shina cashpapish, ñucaca Mandac Dios shuti cashcataca paicunamanca mana ricsichircanichu.

⁴ Canaán llactata cusha nishpami, paicunahuan ari ninacurcani. Chai llactapimi paicunaca pozashpalla causarca.

⁵ Shinallatac Egipto runacuna israelcunata achcata servichicpi, paicuna llaquihuan caparishcata uyarcanimi. Paicunahuan ari nishcatapish yuyarircanimi.

⁶ Chaimanta israelcunataca: “Ñucami Mandac Dios cani. Ñucami Egiptomanta, shinallatac chaipi llaquita trabajacushcamanta llucchisha. Egipto gentecuna llaquichishpa charicushcamanta maquita alzashpa, mancharinacunata ricuchishpa llucchisha.

⁷ Ñucapaclla acllashca llactata ruhuashpami, cancunapac Dios casha. Chaimantami Egiptopi sinchi trabajacushcamanta llucchic, shinallatac cancunata Mandac Dios cashcata yachac chayanguichic.

⁸ Abrahammanpish, Isaacmanpish, Jacobomanpish cungapac, ñuca maquita alzashpa ari nishca llactamanmi cancunataca pushasha. Ñucaca Mandac Diosmi cani” ningui— nirca.

⁹ Tucui chaitami Moisesca israelcunamanca huillarca. Shina huillacpipish sinchi trabajocunahuan llaquilla cashcamantami Moisés nishcataca mana uyashun nircacuna.

¹⁰ Chaimantami Mandac Diosca Moisestaca:

¹¹ —Egipto llactata jatun mandac Faraonpacman rishpa, israelcunata chai llactamanta richun saqui nigri— nirca.

¹² Shina nicpimi, Moisesca Mandac Diostaca: —Israelcunapish mana uyacpica, ¿ima shinatac Faraoncarin uyangayari? Ñucaca mana alli rimacchu cani— nirca.

¹³ Shina cacpimi, Mandac Diosca israelcunata Egiptomanta llucchichun, Moisestapish, Aarontapish Egipto llactata jatun mandac Faraonta, israelcunata rimachun cunarca.

Moisespac, Aaronpac ñaupa taitacunamanta

¹⁴ Caicunami ñaupa taitacunapac aillucunata mandaccunaca: Israelpac punta churi Rubenpac churicunaca: Hanoc, Falú, Hezrón, Carmimi carca. Paicunaca Rubenpac churicunami carca.

¹⁵ Simeonpac churicunaca: Jemuel, Jamín, Ohad, Jaquín, Zohar, cananea huarmipac huahua Saulmi carca. Paicunaca Simeonpac churicunami carca.

¹⁶ Levica patsac quimsa chunga canchis huatatami causarca. Levipac churicunaca punta churimanta quipa churicamanca: Gersón, Cohat, Merarimi carca.

¹⁷ Gersonpac churicunaca: aillu ima shina cashca shina Libni, Simeimi carca.

¹⁸ Cohatpac churicunaca: Amram, Izhar, Hebrón, Uzielmi carca. Cohatca patsac quimsa chunga quimsa huatatami causarca.

¹⁹ Meraripac churicunaca: Mahli, Musimi carca. Paicunami Levipac huahua huahuapura ima shina cashca shina yupashca carca.

²⁰ Amramca paipac tia Jocabedhuanmi cazararca. Chai huarmica Aarón, Moisés huahuacunatami charirca. Amramca patsac quimsa chunga canchis huatatami causarca.

²¹ Izharpac churicunaca: Coré, Nefeg, Zicrimi carca.

²² Uzielpac churicunaca: Misael, Elzafán, Sitrimi carca.

²³ Aaronca Aminadabpac ushi Elisabethuanmi cazararca. Elisabetca Naasonpac panimi carca. Chai huarmica Nadab, Abiú, Eleazar, Itamar huahuacunatami charirca.

²⁴ Corepac churicunaca: Asir, Elcana, Abiasafmi carca. Paicunaca coreíta aillumi carca.

²⁵ Aaronpac churi Eleazarca Futielpac ushicunamanta shuc huarmihuanmi cazararca. Chai huarmica Finees huahuatami charirca. Paicunami levitacunapac huahuacuna ima shina cashca shinallatac mandashpa causarca.

²⁶ Mandac Dios Aarontapish, Moisestapish rimashpaca: «Cancunami israelcunataca Egiptomanta sumacta tandachishpa llucchimugringuichic» nirca.

²⁷ Paicunami Egiptomanta israelcunata llucchingapac, chai llactata jatun mandac Faraonhuan parlangapac rirca.

²⁸ Mandac Dios Egiptopi Moisesta rimashpaca:

²⁹ —Ñucami Mandac Dios cani. Tucui ñuca canman huillashcacunata Egipto llactata mandac Faraonman huillagri— nirca.

³⁰ Chashna nicpimi, Moisesca Mandac Diostaca: —Ñucaca mana alli rimacchu cani. ¿Maitatac Faraonca ñuca nishcataca uyangayari?— nirca.