ÉXODO 5 - Dios Rimashcata Quillcashcami

Moisespish, Aaronpish Faraonpacman rishcamanta

¹ Chaimanta Moisespish, Aaronpish Faraonpacman yaicushpaca: —Mandac Diosca Israeltaca: “Ñuca acllashca israelcuna shitashca pambapi ñucata jatunyachishpa cushicugrichun saqui” ninmi— nirca.

² Shina nicpimi Faraonca: —Pai rimashcata uyashpa richun saquingapacca, ¿pitac Mandac Diosca? Mandac Dios nishcataca mana ricsinichu. Israelcuna richunpish mana saquishachu— nirca.

³ Chashna nicpimi paicunaca: —Israelcunapac Diosmi ñucanchicman ricurirca. Chaimantami cunanca quimsa punzhata purishpa, chai shitashca pambapi animalta rupachishpa, Mandac Diosman cugrinchic. Ñucanchic mana chaita ruhuacpica, ungüihuan, mana cashpaca espadahuan huañuchingami— nirca.

⁴ Chaimantami Egipto llactata jatun mandacca: —Moisespish, Aaronpish, ¿ima nishpatac alli trabajacuc gentecunata jarcachisha ninguichic? Cancunapac trabajollamantac catichic.

⁵ Ari, cai llactapica gentecunaca achcami. Shina cacpipish, cancunaca cai gentecuna alli trabajacuctami jarcachisha ninguichic— nirca.

⁶ Chai punzhallatacmi Faraonca paipac mayoralcunatapish, israelcunata trabajachiccunatapish rimashpaca:

⁷ —Paicuna ladrillota ruhuachunca, ama utcapi cushca shina, ucshata cunguichicchu. Ashtahuanpish paicunallatacmi ucshata mashcagrina can.

⁸ Utcaman mashna ladrillota ruhuac cashca shinallatacmi cunanpish ruhuana can. Quillamantami paicunaca: “Animalcunata rupachishpa, ñucanchic Diosta yuyaringapac jacuchic” nishpa caparicun.

⁹ Paicunaman ashtahuan achca trabajota cuichic. Chashna ruhuacpimi, chai llullashpa rimashcataca mana uyangacuna— nirca.

¹⁰ Shina nicpimi, Faraonpac mayoralcunapish, israelcunata trabajachiccunapish chaimanta llucshishpaca: —Faraonca: “Ñucaca ña mana ucshata cugrinichu.

¹¹ Cunanca, cancunallatac mashcangapac richic. Shina cashpapish utcapi mashna ladrillota ruhuac cashca shinallatacmi ruhuana canguichic” ninmi— nirca.

¹² Chaimantami israelcunaca tucui Egipto llactata rishpa, ucshapac randica tamota mashcangapac rirca.

¹³ Trabajachiccuna llaquichishpaca: —Utcapi ucshata cucpi, mashna ladrillota ruhuac cashca shinallatacmi cunanpish ruhuana canguichic— nirca.

¹⁴ Chaipac jahuapica, Faraonpac trabajachiccunaca, Israel mayoralcunataca: —¿Ima nishpatac cainapish, cunanpish utcapi mashna ladrillota ruhuac cashca shinallatac mana ruhuanguichic?— nishpami macarca.

¹⁵ Chaimantami Israel mayoralcuna Faraonpacman rishpaca: —¿Ima nishpatac canta servic ñucanchictaca cashna llaquichinguiyari?

¹⁶ Canta servic ñucanchicmanca ucshata mana cunchu. Shina cashpapish utcapi mashna ladrillota ruhuac cashca shinallatac, ¡cunanpish ruhuai nincunami! Chashnami canta servic ñucanchicta macashpa llaquichincuna. Chashna mana ucshata cushcamantaca cambac mandaccunallatacmi juchayuc— nirca.

¹⁷ Shina nicpimi Faraonca: —¡Cancunaca quilla gentecunami canguichic! Chashna cashpami: “Animalta rupachishpa, Mandac Diosman cugrishun” ninguichic.

¹⁸ Utca ladrillota ruhuangapac richic. Ucshata mana cucpipish, ladrillotaca utcapi mashna ruhuac cashca shinallatac ruhuagrichic— nirca.

¹⁹ Paicunata: “Utcapi mashna ladrillota ruhuac cashca shinallatac punzhanta ruhuaichic” nishpa mandacpimi, Israel mayoralcunaca llaquilla tucurca.

²⁰ Paicuna Faraonpacmanta llucshishpaca, Moises-huan, Aaronhuanmi tuparca. Paicunaca shayashpami shuyacurca.

²¹ Shina tupashpaca: —Cancunallatacmi ñucanchictaca Faraonpac ñaupapi millanata ruhuashcanguichic. Cancunallatacmi ñucanchicta huañuchichun, espadata paicunapac maquipi churac shina ruhuashcanguichic. Chaita ruhuashcamantaca Mandac Diosllatac ricushpa taripashpa llaquichichun— nirca.

Mandac Diosta Moisés mañashcamanta

²² Chaimantami Moisesca Mandac Diostaca: —Mandac Dioslla, ¿ima nishpatac israelcunataca cashna llaquichingui? ¿Imapactac ñucataca cacharcangui?

²³ Ñuca Faraonpacman rishpa, cambac shutipi huillacpica, israelcunataca yallitami llaquichi callarin. Shina cacpipish, can acllashcacunata cacharichichunca, canca imata mana ruhuanguichu— nirca.