ÉXODO 40 - Dios Rimashcata Quillcashcami

Dios-huan tupana huasita Moisés shayachishcamanta

¹ Chai quipami Mandac Diosca Moisestaca:

² «Callari quilla, callari punzhapica ñucahuan tupana huasita shayachingui.

³ Ñucahuan tupana huasipica ari nishca quillcata huacaichina Arcataca pañohuan catangui.

⁴ Mizata ucuman yaicuchishpa, sumacta allichishpa churangui. Candelerotapish ucuman yaicuchishpa, lamparacunapi luzta japichishpa churangui.

⁵ Dios ari nishca quillcata huacaichina Arca ñaupapica inciensota rupachina curi altarta churangui. Ñucahuan tupana huasiman yaicuna pungu ñaupapi pañocunata huarcungui.

⁶ Chai quipaca ñucaman cushpa rupachina altartaca ñucahuan tupana huasi pungu yaicuna ñaupapi churangui.

⁷ Chaimantaca jatun pailataca ñucahuan tupana huasi altar chaupipi churashpa, yacuta jundachingui.

⁸ Ña tucuchishpaca, canzha pamba muyundita allichishpa, pañota canzha pambaman yaicunapi churangui.

⁹ Chai quipaca cahuina aceiteta japishpa, ñucahuan tupana huasitapish, chaipi tiyaccunatapish aceitehuan cahuingui. Chashna ruhuashpami, tucui chaipi imalla tiyaccunatapish ñucapaclla cachun chicanyachingui. Chashnami ñucapaclla canga.

¹⁰ Shinallatac tucuita rupachina altartapish, chaipi tucui ima tiyaccunatapish aceitehuan cahuishpa, ñucapaclla cachun chicanyachingui. Chashnami ñucapaclla canga.

¹¹ Pailatapish, pailata tiyachina basatapish, aceiteta tallishpa, ñucapaclla cachun chicanyachingui.

¹² Aarontapish, paipac churicunatapish ñucahuan tupana huasi punguman pushashpa, yacuhuan armachingui.

¹³ Aarontaca ñucapaclla chicanyachishca churanacunata churachishpa, aceiteta tallishpa chicanyachingui. Chashna ruhuacpimi, ñucapaclla cura canga.

¹⁴ Chai quipaca paipac churicunata pushamushpa, tunicata churachingui.

¹⁵ Shinallatac Aaronta ima shinami aceitehuan cahuishca shinallatac, paipac churicunatapish ñucapaclla chicanyachishca curacuna cachun aceitehuan cahuingui. Chai aceitehuan cahuicpica, paicunapac huahua huahuacunapish huiñaitami ñucapaclla curacuna canga» nirca.

¹⁶ Moisesca Mandac Dios mandashca shinallatacmi tucuita ruhuarca.

¹⁷ Quipa huata, callari quilla, callari punzhapimi Dios-huan tupana huasitaca shayachirca.

¹⁸ Chai punzhapimi Dios-huan tupana huasita shayachingapac Moisesca basacunata tiyachishpa, tablacunata shayachishpa, barracunata churarca. Shinallatac pilarcacunatapish shayachircami.

¹⁹ Moisesca Mandac Dios mandashca shinami Dios-huan tupana huasita catarca. Chai jahuataca ashtahuan alli carpahuanmi catarca.

²⁰ Chai quipami ari nishca quillcata japishpa Arca ucupi churarca. Huanduna varacunatapish, Arca tapatapish churarcami.

²¹ Quipaca Dios-huan tupana huasiman Arcata yaicuchishpami, Moisesca Mandac Dios mandashca shinallatac ari nishca quillcata huacaichina Arcataca shuc pañohuan taparca.

²² Dios-huan tupana huasi ucupimi mizatami churarca. Chaitaca Diospaclla cac ucuta jarcashca paño jahua ladomanmi churarca.

²³ Moisesca Mandac Dios mandashca shinallatacmi chai miza jahuapica Diosman cuna tandata allichishpa churarca.

²⁴ Dios-huan tupana huasi ucupi churana candelerotaca paño ura lado miza ñaupapimi churarca.

²⁵ Moisesca Mandac Dios mandashca shinallatacmi lamparacunataca Diospac ñaupapi japichirca.

²⁶ Shinallatac Dios-huan tupana huasi ucupimi curi altartaca Diospaclla ucuta jarcashca paño ñaupapi churarca.

²⁷ Chai altarpica Mandac Dios Moisesta mandashca shinallatacmi mishquilla ashnacuc inciensota rupachirca.

²⁸ Chashnallatac Dios-huan tupana huasi yaicunapica pañotami churarca.

²⁹ Chaiman yaicuna pungupica tucuita rupachina altartami churarca. Chaimi Mandac Dios mandashca shinallatac animalcunatapish, ofrendacunatapish Diosman cushpa rupachirca.

³⁰ Dios-huan tupana huasihuan, altarhuan tupanacuipipimi pailapi maquita jahuaringapac yacuta jundachirca.

³¹ Chai yacupimi Moisespish, Aaronpish, paipac churicunapish maquicunata, chaquicunata jahuac carca.

³² Dios-huan tupana huasiman yaicungapac, altarman cuchuyangapacca Mandac Dios Moisesta mandashca shinallatacmi jahuarirca.

³³ Ña tucuchishpaca Dios-huan tupana huasi canzha pamba muyunditapish, altar canzha pamba muyunditapish jarcarcami. Canzha pambaman yaicuna pungupipish pañota churarcami. Chashnami Moisesca tucui ruhuana cashcata tucuchirca.

Mandac Dios-huan tupana huasipi sumaimana achic nicuc jundashcamanta

³⁴ Chai quipami Dios-huan tupana huasitaca puyu taparca. Shinallatac Dios-huan tupana huasipica Diospac sumaimana achicmi jundarca.

³⁵ Dios-huan tupana huasi jahuata puyu tapashcamantapish, Mandac Diospac sumaimana achiclla jundashcamantapishmi Moisesca mana chaiman yaicui pudirca.

³⁶ Dios-huan tupana huasi jahuamanta puyu anchuricpimi, israelcunaca puri callarirca.

³⁷ Ashtahuanpish puyu anchuringacamanmi paicunaca maiman mana cuyurircacuna.

³⁸ Dios-huan tupana huasi jahuapica punzhaca puyumi carca. Tutaca ninami achicyachishpa, tucui israelcunapac purinapi carca. Chashnami tucui ñanta pusharca.