ÉXODO 4 - Dios Rimashcata Quillcashcami

¹ Chaimantami Moisesca: —Ñuca chashna nicpipish, paicuna mana crishpa, mana cazushpa: “Mandac Diosca, mana ricurishcangachu” nicpica, ¿imatatac nisha?— nirca.

² Shina nicpimi, Mandac Diosca: —¿Imatatac maquipi charicungui?— nirca. Shina nicpimi Moisesca: —Shuc taunatami charicuni— nirca.

³ Shina nicpica, Mandac Diosca: —Pambaman shitai— nirca. Chaita pambaman shitacpica, culebrami tucurca. Moisesca manchashpami, chaimanta anchurirca.

⁴ Chaimantami Mandac Diosca Moisestaca: —Maquihuan chupapi japiri— nirca. Moisés maquihuan chupapi japiricpica, taunami tucurca.

⁵ Shinallatac Mandac Diosca: —Caita ruhuacpimi, Abrahampac, Isaacpac, Jacobopac Mandac Dios ricurishcata cringacuna— nirca.

⁶ Cutinllatac Mandac Diosca: —Cunanca, cambac maquita quinzhupi sati— nirca. Chaipimi paica maquita quinzhupi satirca. Maquita quinzhumanta llucchicpica, sisu ungüihuan rasu shina yurac maquimi llucshirca.

⁷ Chaimantami Mandac Diosca: —Maquita quinzhupi cutin sati— nirca. Paica cutinllatacmi quinzhupi satirca. Maquita quinzhumanta llucchicpica, mana ima tucushca, alli maquimi llucshirca.

⁸ Cutinllatac Mandac Diosca: —Cunan pi mana ruhuaipacta ruhuashpa ricuchishcata mana crishpa, mana cazushpaca quipata pi mana ruhuaipacta ruhuashpa ricuchicpimi cringacuna.

⁹ Cai quipata ruhuashcata ricushpapish mana crishpa, mana cazucpica, jatun yacumanta yacuta huishishpa, allpapi tallingui. Shina tallicpica, yacuca yahuarmi tucunga— nirca.

¹⁰ Chaimantami Moisesca Mandac Diostaca: —Ñucata Mandac Dioslla, ñucaca alli rimacca jaicapi mana cashcanichu, cunanpish mana alli rimacchu cani. Ñucaca callu huataricunillami— nirca.

¹¹ Mandac Diosca: —¿Pitac runamanca shimita curca? ¿Pitac mana rimactapish, ringri mana uyactapish, ñahui mana ricuctapish ruhuarca? ¿Manachu Mandac Dios ñucallatac ruhuarcani?

¹² Chaimanta cunanca ri. Ñucami canhuanca casha, imata rimana cacpipish, ñucallatacmi rimachisha— nirca.

¹³ Chaimantami Moisesca: —¡Ñucata Mandac Dioslla, ñucapac randica shucta cachai!— nirca.

¹⁴ Shina nicpimi, Mandac Dios piñarishpa Moisestaca: —Ñucaca levitapuramanta cambac huauqui Aarón alli rimac cashcataca, ¿manachu yachani? Paica ñami canhuan tupangapac llucshinga. Ña llucshishpaca, tucui shunguhuan cushicungami.

¹⁵ Imata can ninataca paiman tucui huillangui. Ñucami can rimacpipish, pai rimacpipish imata rimanata yachachisha.

¹⁶ Cambac randica, paimi can shina gentecunamanca rimanga. Canca ñucapac randimi paimanca rimangui.

¹⁷ Cai taunata cambac maquipi apai, cai taunahuanmi mancharina ricuchinacunata ricuchingui.

Moisés Egiptoman cutishcamanta

¹⁸ Moisesca paipac suegro Jetropacman cutishpaca: —Ñuca huauquicunapacmanmi, paicuna causacushcata, mana causacushcata yachangapac Egiptoman cutirigrini— nirca. Shina nicpimi Jetroca: —Allilla ringui— nirca.

¹⁹ Madianpi cacpimi, Mandac Diosca Moisestaca: —Canta huañuchishun niccunaca tucuimi huañurca. Chaimanta Egiptoman cutishpa rilla— nirca.

²⁰ Moisesca paipac huarmitapish, huahuacunatapish burropi tiyachishpami Egiptoman cutirca. Dios cushca taunatapish apashpami cutirca.

²¹ Mandac Diosca Moisestaca: —Egiptoman cutishpa, Faraonpac ñaupapi tucui ñuca ruhuachun nishca ricuchinacunata ruhuashpa ricuchingui. Ashtahuanpish ñucaca paipac shunguta sinchiyachishami. Shina ruhuacpica, israelcunataca mana cacharingachu.

²² Chaimanta Faraontaca: “Mandac Diosca: ‘Israelca ñuca punta churimi.

²³ Ñuca huahuacuna ñucata servingapac richun saqui. Mana richun saquicpica, punta cari huahuacunatami huañuchigrini’ ninmi” ningui— nirca.

²⁴ Moisés cutishpa, ñanpi samaricucpimi, Mandac Diosca shuc tuta tupangapac llucshishpa, paita huañuchisha nirca.

²⁵ Chaimantami Seforaca rumi cuchillota japishpa, paipac churita circuncisionta ruhuashpa, Moisespac chaquipi tupachirca. Chashna tupachishpaca: «Cunanca ñuca quiquin yahuar cusami cangui» nirca.

²⁶ Chaimantami Mandac Diosca Moisesta cacharca. Seforaca: «Circuncisionta ruhuashcamantami ñuca quiquin yahuar cusa cangui» nishca carca.

²⁷ Mandac Diosca Aarontaca: —Shitashca pambapi Moisesta tupagri— nirca. Aarón tupangapac rishpa, Mandac Diospac urcupi Moises-huan tupashpa mucharca.

²⁸ Chaipimi Moisesca Mandac Dios imata nishcatapish, mancharina ricuchinacunata ruhuashpa ricuchichun cachashcatapish tucui huillarca.

²⁹ Moisespish, Aaronpish rishpami, tucui israelcunata pushac yuyaccunata tandachirca.

³⁰ Chashna tandachishpami, Aaronca Mandac Dios Moisesta imata nishcata tucui huillarca. Shinallatac mancharina ricuchinacunatapish ruhuashpa ricuchina cashcata ricuchirca.

³¹ Chai huillashcata uyashpaca, paicuna llaquita apacucta ricushpa, ayudangapac shamushcata yachashpami, israelcunaca crircacuna. Chaimantami Mandac Diostaca cumurishpa, allimari cangui nircacuna.