ÉXODO 37 - Dios Rimashcata Quillcashcami

Dios-huan tupana huasipi imacunalla tiyanacunamanta

¹ Bezaleelca acacia caspimantami shuc Arcata ruhuarca. Chai Arcaca sunimanca shuc metro, anchomanca chaupi metrotami carca. Cutin altomanca sucta chunga pichca centimetromi carca.

² Chai Arcataca ucutapish, jahuatapish alli curihuanmi cahuirca. Muyunditaca curimantami moldurata ruhuarca.

³ Curita nuyuchishpami, chuscu argollata ruhuashpa, chuscu esquinapi churarca. Chaicunataca ishcaitaca caishuc ladoman, ishcaitaca chaishuc ladomanmi churarca.

⁴ Acacia caspimantami curihuan jahuata cahuishpa huanduna varacunata ruhuarca.

⁵ Chai varacunataca Arca esquinacunapi churashca argollacunapimi churachishpa, maimanpish huandungapac churarca.

⁶ Arca tapataca ashtahuan alli curimantami ruhuarca. Chai tapaca sunimanca shuc metro yalli, anchomanca chaupi metro yallimi carca.

⁷ Curita martillohuan huactashpami, ishcai querubinta ruhuarca. Chaicunataca ishcai lado tapapimi churarca.

⁸ Shuc querubintaca shuc ladoman, caishuc querubintaca caishuc ladomanmi churarca. Ishcai ladopi churashca querubincunaca Arca tapahuan shuclla shinata ruhuashcami carca.

⁹ Chai querubincunaca tapa jahuapimi alascunata chutashpa, tapata quillpashca, ñahuipura ricushpa tiyacurca.

¹⁰ Shinallatac acacia caspimantami shuc mizata ruhuarca. Chai mizaca sunimanca iscun chunga centímetro, anchomanca chaupi metro, altomanca chaupi metro yallimi carca.

¹¹ Chai mizataca alli curihuan jahuata cahuishpami, muyundi filocunapica sumacta curihuan ruhuarca.

¹² Shinallatac chai miza muyunditaca canchis centímetro alto molduratami curimanta ruhuarca.

¹³ Chuscu esquina miza chaquipi churangapacca chuscu curi argollatami ruhuarca.

¹⁴ Chai argollacunaca molduracunapimi churashca carca. Chai argollacunaca varacunata churachishpa huandungapacmi miza muyundi ucu ladopi churarca.

¹⁵ Mizata huandungapacca acacia caspimantami varacunata ruhuashpa, curihuan jahuata cahuirca.

¹⁶ Miza jahuapi imalla tiyac lavacaracunatapish, cucharacunatapish, cuchillocunatapish, jatun lavacaracunatapish alli curimantami ruhuarca.

Curi candelerota ruhuashcamanta

¹⁷ Chashnallatac alli curita martillohuan huactashpami, candelerotapish ruhuarca. Chai candeleroca chaquipish, tucuita aparic troncopish, vasocunapish, manzanacunapish, sisacunapish shuc shinalla ruhuashcami carca.

¹⁸ Chai candelero troncomantaca sucta maquicunami llucshirca. Quimsa maquicunaca shuc ladoman, caishuc quimsa maquicunaca caishuc ladomanmi carca.

¹⁹ Troncomanta llucshic maquicunapica cada maquipimi botonman riccha vaso, almendro sisa shina quimsa vaso carca. Caishuc lado maquipipish chashnallatacmi botonman riccha vaso, almendro sisa shina vasocuna carca. Sucta maquipitacmi chashnallatac carca.

²⁰ Candeleropac troncopica almendro sisaman riccha chuscu vasocunatami manzanacunahuan, sisacunahuan ruhuarca.

²¹ Candeleropac ishcai maqui ucu ladopica shuc manzana, catic ishcai maqui ucu ladopica shuc manzana, catic ishcai maqui ucu ladopipish shuc manzanatami ruhuarca. Chashnami troncomanta llucshishca sucta maqui ucupitac ruhuarca.

²² Manzanacunapish, maquicunapish candeleropica shucllata ruhuashcami carca. Tucui chaicunataca martillohuan alli curita huactashpami ruhuarca.

²³ Canchis lamparacunatapish, mechata pitinacunatapish, uchupa tandanacunatapish alli curimantami ruhuarca.

²⁴ Chashnami candelerotapish, chaipi tiyaccunatapish quimsa chunga quimsa kilo alli curimanta ruhuarca.

Inciensota rupachina altarta ruhuashcamanta

²⁵ Acacia caspimantami inciensota rupachina altartapish ruhuarca. Chai altarca cuadrado, sunimanpish, anchomanpish chuscu chunga pichca centimetromi carca. Altomanca iscun chunga centimetromi carca. Chai altarpac chuscu esquinacunapi tiyac gachucunaca altarhuan shuclla shinata ruhuashcami carca.

²⁶ Chai altar tapatapish, chai ladocunatapish, gachucunatapish, alli curihuanmi jahuata cahuirca. Tucui muyundi filocunatapish sumactami jahuata curihuan cahuirca.

²⁷ Curimanta ruhuashca ishcai argollatapish altar filo ishcai esquina ucu ladopimi churarca. Chai argollacunapi varacunata churachishpa, huandungapacmi chashnaca ruhuarca.

²⁸ Chai varacunaca acacia caspimanta ruhuashca, jahuata curihuan cahuishcami carca.

²⁹ Shinallatac Diospacllata chicanyachishca cachun ruhuana aceitetapish, mishquilla ashnacuc inciensotapish ruhuarcami. Ima shina mishquilla ashnacuc aceiteta ruhuaccuna shinallatacmi ruhuarca.