ÉXODO 36 - Dios Rimashcata Quillcashcami

¹ Mandac Diosmi Bezaleelmanpish, Aholiabmanpish, yachac runacunamanpish paihuan tupana huasita ruhuachun, alli yachaita, alli yuyaita curca. Paicunami Mandac Dios mandashcata tucuita ruhuanga» nirca.

Ofrendata ama ashtahuan apamuchun nishcamanta

² Moisesca Bezaleeltapish, Aholiabtapish, Mandac Dios alli yuyaita cushca runacunatapish, shungumanta Diospacta ruhuana munaita charic runacunatapishmi cayarca.

³ Paicunami Dios-huan tupana huasita ruhuachun, israelcuna apamushca, ofrendataca Moisesmanta chasquirca. Cada tutamanta israelcuna ofrendata apamushpa caticpimi,

⁴ tucui chaipi trabajaccunaca quiquin ruhuaita saquishpa,

⁵ Moisespacman rirca. Chashna rishpaca: «Israelcunaca Mandac Dios mandashcamanta yallitami ofrendataca apamucuncuna» nirca.

⁶ Chaimantami Moisesca tucui carpa huasicunaman rishpa: «Caricunapish, huarmicunapish Dios-huan tupana huasita ruhuangapac ama ashtahuan ofrendata apamuichicchu» nishpa jarcarca. Chashnami tucui israelcuna apamucucta jarcachirca.

⁷ Dios-huan tupana huasita ruhuangapacca yalli yallitami charirca.

Dios-huan tupana huasita ruhuashcamanta

⁸ Dios-huan tupana huasita ruhuac alli yuyaiyuc runacunaca lino puchcahuan, ahuashpa chunga morado puca pañohuanmi ruhuarca. Chaipica querubincunatami bordashpa ruhuarca.

⁹ Chai pañoca sunimanca chunga ishcai metro chaupi, anchomanca ishcai metromi carca. Tucui pañocunami igual carca.

¹⁰ Chai pañotaca pichca pañocunata tinguishpami ruhuarca. Chashnallatacmi caishuc pañotapish ruhuarca.

¹¹ Chai pañopica ishcai pañopitacmi azul puchcamanta ringricunata ruhuarca.

¹² Chai paño esquinacunapica pichca chunga ringritami punta pañopipish, quipa pañopipish ruhuarca. Chai ringricunataca ringripura chimbanacushcatami ruhuarca.

¹³ Pichca chunga curi argollatapish ruhuarcami. Chaicunahuan tinguicpimi, shuclla shina Dios-huan tupana huasica saquirirca.

¹⁴ Dios-huan tupana huasi jahuapi churangapacpish chivo millmamantami chunga shuc pañota ruhuarca.

¹⁵ Chai pañoca sunimanca chunga quimsa metro, anchomanca ishcai metromi carca. Chai tucui pañocunaca igualmi carca.

¹⁶ Shuc pañotaca pichca pañota tinguishpa, cutin caishuc pañotaca sucta pañota tinguishpami ruhuarca.

¹⁷ Punta paño uraipipish, quipa paño uraipipish pichca chunga ringritami ruhuarca.

¹⁸ Broncemanta pichca chunga argollata ruhuashpami, ishcai uraipi tinguirca. Chashnami chai pañoca shuclla jatun paño saquirirca.

¹⁹ Chai huasi jahuata catangapacca oveja caratami pucapi tiñirca. Chai jahua catataca delfín caramantami ruhuarca.

²⁰ Chai huasita shayachingapacca acacia caspimantami tablacunata ruhuarca.

²¹ Chai tablacunaca sunimanca chuscu metro chaupi, anchomanca sucta chunga centimetromi carca.

²² Tucui tablacunami tablapura tupanacuchingapac ishcai espigayuc carca. Shinami chai huasita ruhuangapacca tucui tablacuna chai shinallatac carca.

²³ Chai huasimanta uraman churangapacca ishcai chunga tablatami ruhuarca.

²⁴ Chai tablacunata shayachingapacca cullquimantami chuscu chunga basata ruhuarca. Ishcai basataca shuc tabla ucupimi churarca. Chai basacunapimi tablapac ishcai espigata satichishpa shayachirca.

²⁵ Jahua lado quingraipi churangapacca ishcai chunga tablatami ruhuarca.

²⁶ Chai tablacunata shayachingapacpish chuscu chunga cullqui basatami ruhuarca. Chai basacunata cada tablapi ishcaita churangapacmi ruhuarca.

²⁷ Inti yaicuna ladopi churangapacca sucta tablatami ruhuarca.

²⁸ Ishcai lado esquinapica churangapacca ishcai tablatami ruhuarca.

²⁹ Chaicunaca uramanpish, jahuamanpish tupachinacushpa, alli churanallami carca. Chashnami ishcai tablataca ishcai esquinapacta ishcai ishcaita ruhuarca.

³⁰ Shinami pusac tablaca chunga sucta cullqui tablapi churashca carca. Cada shuc tablami ishcai basata charirca.

³¹ Dios-huan tupana huasi tablacunata charichunca, pichca quingrai caspicunatami acacia caspimanta ruhuarca.

³² Caishuc lado quingraiman cac tablacunata charichunpish, huashaiman cac tablacunata charichunpish, inti tigrana ladoman cac tablacunata charichunpish pichca caspitami quingraiman churangapac ruhuarca.

³³ Chaupi tabla quingraita ricuc caspitaca caishuc cuchumanta, chaishuc cuchumanmi churarca.

³⁴ Tablacunataca curihuanmi jahuata cahuirca. Quingrai caspicunata churana argollacunataca curimantami ruhuarca. Quingrai caspicunatapish curihuanmi cahuirca.

³⁵ Jarcachina pañotapish, azul, morado, sani puca pañota lino puchcamanta ahuashpami, chai jahuapica ishcai querubincunata bordarca.

³⁶ Chai telata huarcungapacca acacia caspimantami chuscu pilarta ruhuarca. Chai pilarcunatapish curihuanmi jahuata cahuirca. Chai pilarcunapi huarcungapacca curillamantatacmi capitelcunatapish ruhuarca. Chaicunata shayachingapacca cullquimantami chuscu basata ruhuarca.

³⁷ Huasi pungupi jarcachina pañotaca azul pañota, morado pañota, sani puca pañotami lino puchcamanta ahuashpa, sumacta bordashpa churarca.

³⁸ Pichca pilarcunatami ganchocunahuan ruhuarca. Chai pilarcunata shayachina basacunataca broncemantami ruhuarca. Chaicunataca curihuanmi pilar tucuritapish, capitelcunatapish cahuirca.