ÉXODO 35 - Dios Rimashcata Quillcashcami

Samana punzhamanta

¹ Moisés tucui tandanacushca israelcunata tandachishpaca: «Mandac Diosca:

² “Sucta punzhata trabajanguichic. Canchisniqui punzhaca Diospaclla chicanyachishca punzhami. Chai punzhaca samarina punzhami. Maijanpish chai punzhapi imata ruhuacca huañungami.

³ Samana punzhapica mai huasipipish ninata mana japichinachu” nishpami mandan» nirca.

Dios-huan tupana huasita ruhuangapac ofrendata cunamanta

⁴ Moisesca tandanacushca israelcunataca: «Mandac Diosca:

⁵ “Mandac Dios ñucaman cungapacca cancunapurallamanta ofrendata tandachichic. Tucui alli shunguyuc gentecuna curita, cullquita, bronceta,

⁶ azul, morado, sani puca puchcacunata, sumac lino puchcata, chivo millmata apamuichic.

⁷ Pucahuan tiñishca carnero oveja caratapish, tejón caratapish, acacia caspitapish apamuichic.

⁸ Lamparacunapi churana aceitetapish, ñucapaclla chicanyachishca cachun cahuina aceitetapish, inciensota ruhuangapac mishquilla ashnacuctapish apamuichic.

⁹ Cura churana efodta, pectoralta ruhuangapac ónice rumicunatapish, shuctac sumac jagan nicuc rumicunatapish apamuichic.

Dios-huan tupana huasimanta

¹⁰ Cancunapuramanta maijan artesanocuna Mandac Dios mandashcata ruhuangapac shamuichic.

¹¹ Paicunami Dios-huan tupana huasi cata carpatapish, chai catapi churana ganchocunatapish, tablacunatapish, quingraiman churana caspicunatapish, pilarcunatapish, basacunatapish,

¹² Arcatapish, chai tapatapish, huanduna varacunatapish, Arcata catana pañotapish,

¹³ mizatapish, chaita huanduna varacunapish, chaipi imalla churanapish, Mandac Dios ñucapaclla churana tandapish ruhuanga.

¹⁴ Achicyachic candelerotapish, lamparacunatapish, chaipi churana aceitetapish, chaipi imalla churanacunatapish,

¹⁵ inciensota rupachina altartapish, huanduna varacunatapish, Diospaclla chicanyachishca cachun cahuina aceitetapish, mishquilla ashnacuc aceitetapish, ñucahuan tupana huasiman yaicuna pungu jarcachina pañotapish ruhuanga.

¹⁶ Tucuita rupachina altartapish, bronce parrillacunatapish, huanduna varacunatapish, chaipi imalla tiyashcacunatapish, yacuta churana pailatapish, chaita churanatapish ruhuanga.

¹⁷ Chashnallatac ñucahuan tupana huasi canzha muyundita jarcachina pañotapish, pañota huarcungapac shayachinacunatapish, basacunatapish, canzha pambaman yaicuna pungupi jarcachina pañotapish,

¹⁸ ñucahuan tupana huasita catashca carpa huatana ishtacacunatapish, huasi canzha pañocunata huatana ishtacacunatapish, huascacunatapish ruhuanga.

¹⁹ Chashnallatac ñucahuan tupana huasipi ñucapacta ruhuaccunami churanacunatapish, Aarón churanatapish, paipac churicuna churanacunatapish ruhuanga” ninmi» nirca.

Israelcuna ofrendata cushcamanta

²⁰ Chaita uyashpami, israelcunaca Moisespac ñaupamanta rircacuna.

²¹ Shinami tucui alli shunguyuc gentecunaca ofrendata Diosman cuna yuyaihuan apamurca. Mandac Dios-huan tupana huasitapish, curacuna churarinata ruhuangapacpish apamurcami.

²² Alli shunguyuc caricunapish, huarmicunapish tucui munaihuanmi cadenacunata, sortejascunata, brazaletecunata, zarcillocunata, curimanta ruhuashca tucuilaya sumaccunata apamurca.

²³ Azul, morado, sani puca, sumac lino puchcacunatapish, chivo millmatapish, pucahuan tiñishca oveja caratapish, delfín caratapish apamurca.

²⁴ Pipish bronce ofrendata, cullqui ofrendata Diosman cungapac ari nishpaca, chaitami apamurca. Acacia caspita chariccunaca imata ruhuana cashcata ruhuangapacmi apamurca.

²⁵ Puchcac huarmicunaca paicunapac maquihuan puchcashpami azul, morado, sani puca, sumac lino puchcacunata apamurca.

²⁶ Allita puchcac huarmicunami chivo millmata sumacta puchcarca.

²⁷ Israelcunata mandaccunaca cura churana efodta, pectoralta ruhuangapacmi onicetapish, shuctac sumac achic nicuc rumicunatapish apamurca.

²⁸ Mishquilla ashnacuctapish, lámpara achicyachichun aceitetapish, Diospaclla chicanyarishca cachun cahuina aceitetapish, mishquilla ashnacuc inciensota ruhuana mishquilla ashnacuccunatapish apamurcami.

²⁹ Mandac Dios Moisesta mandashca shina ruhuarichunca, tucui alli shunguyuc israelcunami caricunapish, huarmicunapish tucui munaihuan Mandac Diosman cungapac apamurca.

Dios-huan tupana huasita ruhuaccunamanta

³⁰ Moisesca israelcunataca: «Riquichic, Mandac Diosca Judá aillupuramanta Uripac churi Bezaleeltami cayarca. Urica Hurpac churimi carca.

³¹ Paipac Espirituta cushpami, tucuipi alli yachachishpa, imata ruhuanapipish alli yuyaita cushpa, yuyaisapata ruhuashca.

³² Paica curimanta, cullquimanta, broncemanta paipac yuyaihuan tucui imatapish sumacta ruhuachun,

³³ rumicunata sumacta allichishpa, imapipish churana caspicunatapish sumacta allichichunmi acllarca.

³⁴ Paitaca alli yachachic cachunmi, paipac shungupi alli yuyaita curca. Dan aillupuramanta Ahisamacpac churi Aholiabtapish alli yachachic cachunmi churarca.

³⁵ Paicunatami imatapish sumacta ruhuachun, alli yachac cachun churarca. Azul, morado, sani puca puchcamanta, alli lino puchcamanta ahuashpa, sumacta bordashpa, tucuilaya ruhuanacunata paicunapac yuyaihuan ruhuaccunatami churarca.