ÉXODO 34 - Dios Rimashcata Quillcashcami

Mandashcacunata quillcashca mushuc rumicunamanta

¹ Mandac Diosca Moisestaca: —Utcapi ruhuashca tabla rumicunata cutin ruhuai. Chaipica can paquishca rumicunapi quillcashca rimashcacunallatatac quillcai.

² Cayandi utca jatarishpa, Sinaí urcu jahuapi ñucahuan tupangapac huichai shamui.

³ Canhuanca pi ama shamuchun. Urcu quingraicunapipish pi ama ricurichun. Urcu chimba ladopipish ovejacunata, huagracunata ama pi michichun— nirca.

⁴ Shina nicpimi, Moisesca utcapi ruhuashca shinallatac ishcai tabla rumicunata ruhuarca. Chaimantaca Mandac Dios nishca shinallatacmi cayandi utca jatarishpa, ishcai tabla rumicunata apashpa, Sinaí urcuman huichai rirca.

⁵ Moisés ña chaipi cacpimi, Mandac Diosca puyupi urai shamushpa, Moises-huan tuparca. Chaipica paillatacmi, Mandac Dios cashcata huillarca.

⁶ Mandac Dios Moisespac ñaupata pasashpaca: —Mandac Diosmi cani. Mandac Diosmi cani. Ñucaca yallita llaquic, cuyac, mana utca piñaric, shinallatac cashcata ruhuacmi cani.

⁷ Huaranga huaranga huahua huahuacunacaman cuyac, mana cazushpa juchata ruhuacpipish, perdonacmi cani. Shina cacpipish, mana allita ruhuaccunataca manatac perdonashachu. Taitacuna millaita ruhuashcamantaca quimsa huahua huahuacaman, mana cashpa chuscu huahua huahuacaman llaquichicmi cani— nirca.

⁸ Chashna nicpimi, Moisesca pambacaman cumurishpa Mandac Diosta mañashpaca:

⁹ —Mandac Dioslla, cambac ñahuipi alli ricurishca cacpica, cai gentecuna yallimana millaita ruhuac, sinchi shungu cacpipish, ñucanchic-huan jaculla. Juchata ruhuashpa, mana alli cashcataca perdonashpa, cambacllata ruhuashpa, chasquiyari— nirca.

Mushuc ari ninacuita ruhuashcamanta

¹⁰ Mandac Diosca Moisestaca: «Riqui, ñucaca tucuipac ñaupapimi ari ninacuita ruhuani. Cai pachapipish, mai llactacunapipish mana ruhuashca jatun mancharinacunatami ruhuashpa ricuchisha. Tucui canhuan cac gentecunami chashna Mandac Dios mancharinacunata ruhuashcata ricunga. Ñuca ruhuashcacunaca mai sumacmi canga.

¹¹ Cunan, canman ñuca cushca mandashcacunata huacaichingui. Cancunapac chaupimantami amorreocunatapish, cananeocunatapish, heteocunatapish, ferezeocunatapish, heveocunatapish, jebuseocunatapish llucchishpa cachasha.

¹² Can maipi causangapac rigricushca llacta gentecunahuan ama ari ninacunguichu. Chaimanta cuidaringui. Chaica mitcachic shinami urmachinga.

¹³ Ashtahuanpish paicunapac altarcunata urmachishpa shitangui. Adorana rumi dioscunatapish paquingui. Asera huarmi diosta yuyarina yuracunatapish pitingui.

¹⁴ Ama shuctac dioscunata adoranguichu. Mandac Dios ñucaca ñucapaclla cachunmi munani. Ñucaca, ñucapaclla cachun munac Diosmi cani.

¹⁵ Chai allpapi causaccunahuanca imata yuyarinacungapac ama ari ninacunguichu. Chai shina ruhuacpica, yangalla dioscunata mañangapacmi allimanta aisashpa catinga. Chai dioscunaman cushpa, huañuchishca animal aichata micungapac cayacpi, chaita can micushpaca, chai dioscunahuan huainayashca shinami tucungui.

¹⁶ Cambac churicunahuan paicunapac ushicunata cazarachishpa, paicunapac dioscunata adorana yuyaita cushpa urmachingacunami. Shina tucushpaca, chai dioscunahuan huainayashca shinami tucunga.

¹⁷ Cancunaca ama fierrota yacuyachishpa, yanga dioscunata ruhuanguichicchu.

Huatapi quimsa cutin fiestata ruhuanamanta

¹⁸ Levadura illac tandata micuna fiestata huacaichingui. Chaita ruhuashpaca, ñuca mandashca shinallatac levadura illac tandata canchis punzhacaman micungui. Abib quillapimi Egiptomantaca llucshircangui.

¹⁹ Tucui cancuna charishca punta cari churicunaca ñucapacmi. Punta huacharishca cari huagracunapish, ovejacunapish, chivocunapish ñucapacmi.

²⁰ Punta huachashca burropac randica, cari chivota mana cashpaca, cari ovejatami cuna can. Ashtahuanpish chaita mana cushpaca, chai animalpac cungata pitingui. Shinallatac cancunapac huahuacunapac punta cari churicunapac randica, ofrendata cunguichic. Ñuca ñaupapica pipish chushac maquillaca mana ricuringachu.

²¹ Sucta punzhata trabajanguichic. Ashtahuanpish canchisniqui punzhapica samarinami. Tarpuna punzhacunapipish, cosechana punzhacunapipish samaringui.

²² Punta pucushca trigo cosechana pentecostés fiestatapish, huata tucuri cosechana fiestatapish ruhuangui.

²³ Israelcunata Mandac Dios ñucapac ñaupapica huatapi quimsa cutinmi, tucui can pushacushca gentecunaca ricurina can.

²⁴ Cambac ñaupamantaca tucuitami shuctac llacta gentecunataca llucchishpa cachasha. Chashnami cancunapac causana llactaca ashtahuan mirachisha. Chashna huatapi quimsa cutin ñuca ñaupapi ricuringapac shamucpica, pi mana cambac allpata quichushpa, japisha ningachu.

²⁵ Ñucaman cushpa huañuchishca animal yahuartaca ama levadurahuan ruhuashca tandahuan cunguichu. Pascua fiestapi huañuchishca puchu animal aichatapish cayapacca ama huacaichinguichu.

²⁶ Cambac allpapi pucushca granomantaca punta ashtahuan alli granota ñucata yuyarina huasiman apamungui. Ama malta chivo aichata mama chivopac lechellahuantac yanunguichu» nirca.

Mandashcacunata Moisés quillcashcamanta

²⁷ Mandac Diosca Moisestaca: «Cai rimashcacunata quillcai. Cai rimashcacunami israelcunahuan, canhuan ari nishcata ricuchicca» nirca.

²⁸ Moisesca mana micushpa, mana yacuta ubiashpami, chaipica chuscu chunga punzhata, chuscu chunga tutata Mandac Dios-huanca carca. Chaipimi Moisesca tabla rumicunapi ari nishca chunga mandashcacunata quillcarca.

²⁹ Chai quipami Moisesca Dios mandashcacunata quillcashpa, ishcai tabla rumicunata apashpa, Sinaí urcumanta urai shamurca. Dios-huan tupashpa, parlanacushcamanta paipac ñahui achic nicuc cactaca Moisesca mana yacharcachu.

³⁰ Paipac ñahui achic nishpa, jagan nicuctaca Aaronpish, israelcunapish ricurcami. Chaimantami paipacman cuchuyanataca mancharca.

³¹ Chashna manchacucpipish, Moisesca Aarontapish, tucui israelcunata mandaccunatapish paipacman cuchuyachunmi cayarca. Paicuna cuchuyacpica, paicunahuanmi parlarca.

³² Quipaca tucui israelcunami paipacman cuchuyarca. Chaipimi Moisesca Mandac Dios Sinaí urcupi tucui ima nishcacunata ruhuachun mandarca.

³³ Moisesca paicunahuan parlashca quipaca shuc pañohuanmi paipac ñahuita jarcarirca.

³⁴ Moisesca Mandac Dios-huan tupana huasiman parlanacungapac yaicushpaca, ñahuita jarcarishcata anchuchishpami parlanacushpa, llucshingacaman caclla carca. Chaimanta ña llucshishpaca, tucui israelcunamanmi Dios imata ruhuachun mandashcata huillac carca.

³⁵ Moisesca paipac ñahui achic nicucta israelcuna ricushcamantami cutin paipac ñahuita pañohuan jarcaric carca. Moisesca Mandac Dios-huan parlanacungapac cutin yaicungacamanmi, ñahuita pañohuan jarcarishca cac carca.