ÉXODO 33 - Dios Rimashcata Quillcashcami

Dios pushana cashcamanta

¹ Mandac Diosca Moisestaca: —Egipto llactamanta llucchishca israelcunata ñuca cusha nishca llactaman pushai. Chai llactata cungapacmi Abrahamman, Isaacman, Jacobomanca: “Chai llactataca cancunapac huahua huahuacunamanmi cusha” nishpa, ari nircani.

² Ñuca angelta cambac ñaupata cachashpami, cancuna japina llactamantaca cananeocunatapish, amorreocunatapish, heteocunatapish, ferezeocunatapish, heveocunatapish, jebuseocunatapish llucchishpa cachasha.

³ Lechepish, mishquipish yacu shina callpacuc llactaman richic. Cancuna yalli sinchi shungu cacpimi, ñucaca cancunahuanca mana risha. Ñuca cancunahuan rishpa, cancuna juchallicpica, tucuita chingachishami— nirca.

⁴ Chai llaquita uyashpami, israelcunaca llaquilla tucurca. Chaimantami pipish sumac churanacunata mana churarirca.

⁵ Mandac Diosca Moisestaca: «Israelcunataca: “Cancunaca yalli sinchi shungumi canguichic. Ñuca cancunapac chaupipi ashallatapish cashpaca, tucuitami huañuchishpa chingachiman. Cunanca churanacunata anchuchichic. Quipatami ñuca imata ruhuanataca yuyarisha” ninmi ningui» nirca.

⁶ Israelcunaca Horeb urcumanta llucshishpaca, sumac churanacunataca ña mana ashtahuan churarircachu.

⁷ Moisesca chai carpa huasitaca israelcunapac carpa huasimanta carupimi shayachirca. Chai huasitaca Dios-huan tupana huasitami shutichirca. Maijanpish Dios-huan tupasha nishpaca, chaimanta carupi shayachishca carpa huasimanmi rina carca.

⁸ Moisés chai huasiman ricucpica, tucui israelcunami jatarishpa, Dios-huan tupana huasiman yaicuna pungu chaquipi Moisés carpa huasiman yaicungacaman chapashpa shayacurca.

⁹ Moisés Dios-huan tupana huasiman yaicucpica, suni puyumi jahuamanta huasi punguman shamuc carca. Chaipimi Mandac Diosca Moises-huan parlac carca.

¹⁰ Israelcunaca chai suni puyu, Dios-huan tupana huasi punguta tapacta ricushpaca, tucuimi cungurishpa, quiquin huasi pungucunapi Diosta allimari cangui nic carca.

¹¹ Mandac Diosca Moises-huanca alli ricsishcahuan parlanacuc shinami, ñahui ñahui parlac carca. Chai quipami Moisesca israelcunapac carpa huasicunaman cutic carca. Ashtahuanpish paita servic Nunpac churi Josueca carpa huasi chaupimanta maiman mana anchuricchu carca.

¹² Moisesca Mandac Diostaca: —Riqui, canca ñucataca: “Israelcunata pushai” ninguimi. Shina cacpipish, ñucahuan pi rina cashcataca manamari huillanguica. Chashnallatac: “Ñucami cambac alli ricsishca cani. Canca, ñuca ñahuipica allimi ricurishcangui” nircanguimi.

¹³ Chashna cambac ñahuipi alli ricurishca cacpica, can imata ruhuasha nicushcataca huillaiyari. Chashna huillacpimi, can ñucahuan cashcataca yachasha. Riqui, cai gentecunaca can acllashcacunami— nirca.

¹⁴ Shina nicpimi, Mandac Diosca: —Ñucallatacmi canta pushashpa, cancunata samachisha— nirca.

¹⁵ Shina nicpimi Moisesca: —Can ñucanchicta mana pushana cashpaca, ñucanchictaca caimanta ama llucchichu.

¹⁶ Can mana ñucanchic-huan ricpica, ¿ima shinatac ñucapish, can acllashca gentecunapish cambac ñaupapi alli cashcataca yachashunyari? Ñucanchicca canhuan cashpamari cai allpapi causac shuctac gentecunamanta chican cashun— nirca.

¹⁷ Shina nicpimi, Mandac Diosca Moisestaca: —Ñucami cambac alli ricsishca cani. Ñuca ñahuipica allimi ricurishcangui. Ñuca nishcatapish canmanca ricuchishami— nirca.

¹⁸ Shina nicpimi Moisesca: —Shina cashpaca, cambac sumaimana achic nicucta ricuchiyari— nirca.

¹⁹ Shina nicpimi, Mandac Diosca: —Ñuca yallita cuyac cashcatami, canmanca ricuchigrini. Mandac Dios ñucaca mandac cashcatapishmi cambac ñaupapi huillasha. Maijanta yallita cuyasha nishpaca yallita cuyacmi cani. Maijanta llaquisha nishpaca llaquicmi cani.

²⁰ Shina cacpipish, ñucapac ñahuitaca mana ricui pudinguichu. Maijanpish ñucapac ñahuita ricushpaca, mana causangachu— nirca.

²¹ Chashnallatac Mandac Diosca: —Ñucapac cuchullapi shuc jatun rumi jahuapi shayari.

²² Ñucapac sumaimana achiclla pasacpica, ñucaca cantaca jatun rumi jutcupi churashpami, ñuca pasangacaman maquihuan tapasha.

²³ Ña pasashca quipa, ñuca maquita anchuchicpica, ñuca ñahuitaca mana ricunguichu, ashtahuanpish ñucapac huashallatami ricungui— nirca.