ÉXODO 32 - Dios Rimashcata Quillcashcami

¹ Moisés urcumanta mana utca shamucpimi, israelcuna Aaronpacman cuchuyashpaca: —Egiptomanta llucchicmuc Moisesca, imachari tucurca. Mana yachanchicchu. Jatari, ñucanchicta pushachun, shuc diosta ruhuai— nirca.

² Shina nicpimi Aaronca: —Cancunapac huarmicuna, churicuna, ushicuna ringripi churashca curi zarcillocunata apamuichic— nirca.

³ Shina nicpica, tucui israelcunami paicunapac ringrimanta curi zarcillocunata llucchishpa, Aaronman curca.

⁴ Aarón chaicunata japishpa, yacuyachishpami, beci diosta ruhuarca. Shina ruhuacpimi paicunaca: —¡Caimi, israelcunata Egiptomanta llucchic diosca!— nirca.

⁵ Aarón chaita ricushpa, shuc altarta becipac ñaupapi ruhuashpaca: —¡Cayaca, Mandac Diosmanmi shuc fiestata charishun!— nishpa caparirca.

⁶ Cayandi tutamantaca utca jatarishpami, chai beciman animalta cushpa, tucui rupachirca. Shinallatac paihuan alli tucungapacpish ofrendata curcami. Chai quipaca israelcunaca micungapac, ubiangapacmi tiyarirca. Ña micushca quipaca cushicungapacmi jatarirca.

⁷ Chaimantami Mandac Diosca Moisestaca: —Cunanca utcashpa urai rilla. Egipto llactamanta can llucchimushca gentecunaca mana allitami ruhuacun.

⁸ Paicunaca ñuca mandashca ñanmanta caruyashpami, shuc curi becita ruhuashpa alli nishpa, animalta cushpa rupachishpaca: “¡Caimi, israelcunata Egipto llactamanta llucchic diosca!” nishcacuna.

⁹ Cai israelcuna sinchi shungu cashcatami yachani.

¹⁰ Cunanca, paicunahuanca yallita piñarishpa, huañuchishpa tucuchichun saqui. Shina cacpipish, canmantaca shuc jatun llactatami ruhuasha— nirca.

¹¹ Shina nicpimi, Moisesca Mandac Diosta tucui shunguhuan mañashpaca: —Mandac Dioslla, ¿ima nishpatac Egipto llactamanta cambac poderhuan llucchishca, can acllashca gentecunahuanca piñaringuiyari?

¹² Egipto runacunaca: “Israelcunapac Diosca urcucunapi huañuchishpa, cai pachamanta chingachingapacmi israelcunataca llucchishca” ningacunamari. Chaimanta ama ña ashtahuan piñarichu. Paicunata llaquichinataca cungarilla.

¹³ Canta servic Abrahamman, Isaacman, taita Israelman: “Cancunapac huahua huahuacunataca jahua pachapi tiyac lucerocunata shinami mirachisha. Cancunapac huahua huahuacunaman cusha nishca cai llactapish cushami. Caica huiñaitami paicunapac canga” nishpa, cambac shutipi ari nishcataca yuyariyari— nirca.

¹⁴ Chaimantami Mandac Diosca pai acllashca gentecunata llaquichisha nicushpapish mana llaquichishpa saquirca.

¹⁵ Moisesca Dios cushca chunga mandashcacunata ishcai tabla rumipi quillcashpami urcumanta urai shamurca. Chai tabla rumicunapica ishcai ladomanmi quillcashca carca.

¹⁶ Chai tabla rumicunapish, chaipi quillcashcapish Diosllatac quillcashcami carca.

¹⁷ Josué israelcuna sinchita caparinacucta uyashpaca: —¡Carpa huasipica macanacushpa caparinacuimari uyarin!— nishpami, Moisesman huillarca.

¹⁸ Shina huillacpimi Moisesca: —Cai caparishcaca mana macanacuita mishashpa cushicushpa caparishcachu, shinallatac mana macanacuita shuccuna atishcamanta llaquihuan caparishcachu. Ashtahuanpish ñucaca cantacuctami uyani— nirca.

¹⁹ Carpa huasicunaman Moisés cuchuyashpaca, curimanta ruhuashca becitapish, israelcuna danzacuctapish ricushpami, yallita piñarishpa, pai charicushca ishcai tabla rumicunata urcu chaquipi ñuturicta shitarca.

²⁰ Chashna ruhuashpaca curimanta ruhuashca becita ninapi rupachishpa, ñutuchishpami polvota ruhuarca. Chai polvotaca yacupi churashpami, israelcunaman ubiachirca.

²¹ Shinami Moisesca Aarontaca: —Cai gentecunaca, ¿imatatac cantaca ruhuarcayari? ¿Ima nishpatac jatun juchata ruhuangacaman saquircanguiyari?— nirca.

²² Shina nicpimi Aaronca: —Ñuca amitolla, ama piñarichu. Cai gentecuna mana allita ruhuac cashcataca canllatac alli yachanguimi.

²³ Paicunallatacmi ñucataca: “Egipto llactamanta ñucanchicta llucchimuc Moisesca, ¡Imachari tucurca! Mana yachanchicchu. Ñucanchicta pushachun, diosta ruhuai” nirca.

²⁴ Shina nicpimi ñucaca: “Maijanpish curita chariccunaca apamuichic” nircani. Chaimantami curita ñucapacman apamucpica, ninapi shitarcani. Chashna shitacpica, becimi llucshirca— nirca.

²⁵ Aarón israelcuna millaita ruhuacucpi, mana jarcashpa, paicuna munashcata ruhuachun saquishcata shinallatac paita piñaccunapac chaupipi pingaichishcatami Moisesca ricurca.

²⁶ Chaimantami Moisesca carpa huasi yaicunapi shayarishpaca: —¿Maijancunallatac Mandac Diospac cagringuichic? Ñucahuan tandanacuichic— nirca. Shina nicpimi, Levipac churicunaca Moises-huan tandanacurca.

²⁷ Shina tandanacucpimi Moisesca: —Mandac Dios israelcunataca: “Tucui cancunapac espadata japishpa, carpa huasicunaman cutichic. Ucuman yaicushpa, cancunapac huauquitapish, cancunapac ricsishcatapish cancunapac familiatapish huañuchichic” ninmi— nirca.

²⁸ Shina nicpica, Levipac churicunaca Moisés mandashca shinallatacmi ruhuarca. Chai punzhapica quimsa huaranga israelcunami huañurca.

²⁹ Chashna ruhuashca quipami Moisesca: —Cunanmi, cancunaca Mandac Diospaclla tucushcanguichic. Cancunapac huahuacunatapish, huauquicunatapish mana llaquishpami, pai mandashcata pactachishcanguichic. Mandac Dios bendiciachunmi chashnaca ruhuashcanguichic— nirca.

³⁰ Cayandimi Moisesca israelcunataca: —Cancunaca jatun juchatamari ruhuashcanguichic. Ñucaca Mandac Dios maipi cashcamanmi huichai rigrini. Cancunapac juchata perdonangapishchari— nirca.

³¹ Chashna nishpa, Moisés Mandac Diospac ñaupaman rishpa mañashpaca: —Israelcunaca curimanta diosta ruhuashpami, jatun juchata ruhuashca.

³² Paicunapac juchata perdonachunmi mañac shamuni. Can mana perdonasha nishpaca, ñuca shutita cambac quillcashca libromanta anchuchingui— nirca.

³³ Shina nicpimi, Mandac Diosca Moisestaca: —Maijanpish juchallishpa piñachiccunatami ñuca libromantaca anchuchisha.

³⁴ Cunanca, ñuca maimanmi pusharichun nishcaman israelcunataca pushai. Ashtahuanpish ñuca cachashca angelmi cambac ñaupata pushashpa ringa. Shina cacpipish, taripashpa llaquichina punzha chayamucpimi, paicunapac juchamantaca llaquichisha— nirca.

³⁵ Aaronta ruhuashca curi becita alli nishcamantami Mandac Diosca israelcunata ungüihuan llaquichirca.