ÉXODO 31 - Dios Rimashcata Quillcashcami

Bezaleelta, Aholiabta cayashcamanta

¹ Mandac Diosca Moisestaca:

² «Riqui, ñucaca Judá aillupuramanta Uripac churi Urpac nieto Bezaleeltami acllarcani.

³ Ñucami, ñuca Espirituhuan paitaca tucuipi yuyaisapata, alli yachacta, quiquin yuyaihuan imatapish allita ruhuacta ruhuarcani.

⁴ Paitaca imatapish allita ruhuachunmi yachachircani. Paica broncemantapish, cullquimantapish, curimantapish tucuitami allita ruhuanga.

⁵ Paitaca rumicunatapish, caspicunatapish sumacta allichishpa ruhuachun, ima trabajopipish allita ruhuachunmi acllarcani.

⁶ Chashnallatac Dan aillupuramanta Ahisamacpac churi Aholiabtami Bezaleelta ayudachunca acllarcani. Tucui ñuca imata ruhuachun nishcacunata ruhuachunmi, tucui artesanocunaman yachai Espirituta curcani.

⁷ Paicunami ñucahuan tupana huasitapish, ari nishca quillcata huacaichina Arcatapish, chaita tapanatapish, carpa huasipi tucui tiyaccunatapish ruhuanga.

⁸ Mizatapish, chai jahuapi tiyaccunatapish, curi candelerotapish, chaipi tiyaccunatapish, inciensota rupachina altartapishmi ruhuanga.

⁹ Ñucaman cushpa tucui rupachina altartapish, chaipi tiyaccunatapish, pailatapish, pailata churanatapish ruhuanga.

¹⁰ Ñucata servingapac churanatapish, Aaronpish, paipac churicuna churarina ñucapaclla chicanyachishca churanatapish,

¹¹ ñucapaclla cachun chicanyachingapac cahuina aceitetapish, ñucapaclla carpa huasipi churana mishquilla ashnacuc inciensotapish paicunami ñuca ima shina mandashca shina ruhuanga» nirca.

Samana punzhamanta

¹² Mandac Diosca Moisestaca:

¹³ «Israelcunataca: “Cancunaca samana punzhata huacaichinguichic. Chai punzhataca tucui huahua huahuacunami huacaichina can. Chashnami ñucataca Mandac Dios cashcatapish, chai punzha ñucapaclla cashcatapish yachangacuna.

¹⁴ Chai punzhaca cancunapac jatun punzhami. Chaimantami huacaichina canguichic. Maijanpish chaita mana cazucca huañuchishcami canga. Chai punzhapi trabajacca israelpuramanta anchuchishcami canga.

¹⁵ Sucta punzhatami trabajana. Ashtahuanpish canchisniqui punzhaca ñucapaclla chicanyachishca samana punzhami. Chaimantami chai punzhapica ñucata yuyarina canguichic. Maijanpish chai punzhapi imatapish ruhuacca huañuchishcami canga.

¹⁶ Israelcunapish, paicunapac huahua huahuacunapish samana punzhataca ñucahuan ari nishcata yuyarishpami pactachinga. Chai samana punzhataca huiñaitami huacaichina can.

¹⁷ Samana punzhaca ñucahuanpish, israelcunahuanpish shuc señalmi can. Mandac Dios ñucaca sucta punzhapimi jahua pachatapish, cai pachatapish ruhuarcani. Ashtahuanpish canchisniqui punzhapica imata mana ruhuashpami samarircani” ninmi ningui» nirca.

Israelcuna curi becita ruhuashcamanta

¹⁸ Sinaí urcupi Mandac Dios Moises-huan parlanacushpaca, chunga mandashcacunatami paipac maqui dedohuan ishcai tabla rumipi quillcashpa, Moisesman curca.