ÉXODO 30 - Dios Rimashcata Quillcashcami

Inciensota rupachina altartamanta

¹ Inciensota rupachingapacca acacia caspimanta shuc altarta ruhuangui.

² Chaitaca sunimanpish, anchomanpish chuscu chunga pichca centimetrota ruhuangui. Cutin altomanca iscun chunga centimetrota ruhuangui. Altar chuscu esquinapi gachucunata altarhuan shuclla shinata ruhuangui.

³ Chai altar jahuatapish, lado quingraitapish, gachucunatapish curihuan cahuingui. Chai altar jahua muyundita canzhaman yallichishpa curihuan ruhuangui.

⁴ Chai yallichishca ucunicllapica ishcai ladomanta caspita churashpa, huandungapac ishcai curi argollata ruhuangui.

⁵ Acacia caspimanta ishcai varata ruhuashpa, jahuata curihuan cahuingui.

⁶ Chai altartaca ari nishca quillcata huacaichina Arca ucuta jarcachishca paño ñaupallapi churangui. Chaipimi ñucaca canhuan tupasha.

⁷ Aarón lamparacunata allichicushpaca, cada tutamantami mishquilla ashnacuc inciensota altarpi rupachinga.

⁸ Chashnallatac tutayacucta lamparacunata japichicushpapish inciensota rupachichun. Caitaca huiñaitami cancunapac huahua huahuacunaca Mandac Dios ñucapac ñaupapi rupachinga.

⁹ Cai altarpica shuctac inciensotapish, tucuita rupachinatapish, grano ofrendatapish, vinotapish ama rupachinguichu.

¹⁰ Cai altarca ñucapaclla chicanyachishcami canga. Chaimantami juchacunata perdonachunca, huatapi shuc cutin Aaronca animal yahuarta altar gachucunapi cahuinga. Shinallatac huatapi shuc cutinllami juchamantaca animal yahuarhuan cahuinga. Chaitaca huiñaitami ruhuana can» nirca.

Causaimanta paganamanta

¹¹ Mandac Diosca Moisestaca:

¹² «Tucui yupashca israelcunami causaimanta Mandac Dios ñucaman cullquita cuna can. Chashna paicunata yupacpica, mana huañui japingachu.

¹³ Tucui yupashca israelcunami carpa huasipi tiyac valishca cullquita chaupi siclosta pezashpa cunga. (Siclosca 20 gerasmi). Chaupi siclos cullquica ñucaman alzashpa cunami canga.

¹⁴ Chai yupashcacunaca ishcai chunga huatata charicmanta huichaimanca tucuimi ofrendata alzashpa ñucaman cuna can.

¹⁵ Paicunapac causaimanta Mandac Dios ñucaman cushpaca, chayucpish chaupi siclos yalli cullquitaca mana cungachu, shinallatac huacchapish chaupi siclosmanta menostaca mana cungachu.

¹⁶ Israelcuna paicunapac causaimanta cushca cullquita japishpaca, ñucahuan tupana huasipi ima illashcata ruhuangapac japingui. Cai cullquita cucpimi, israelcuna causaimanta Mandac Dios ñucapac ñaupapi animalcunata cucpica, paicunata yuyarasha» nirca.

Bronce pailamanta

¹⁷ Cutinllatacmi Mandac Diosca Moisestaca:

¹⁸ «Jahuangapac shuc pailatapish, tiyachinatapish broncemanta ruhuangui. Chaitaca ñucahuan carpa huasihuan, altarhuan chaupipi churashpa, yacuta jundachingui.

¹⁹ Chai yacuhuanmi Aaronpish, paipac churicunapish chaquita, maquitapi jahuanga.

²⁰ Paicunaca ñucata servingapac, ñucahuan tupana huasiman yaicushpa, altarpi rupachingapac cuchuyangapacca, chai yacuhuanmi jahuaringa. Chashna jahuashpami, mana huañunga.

²¹ Paicuna mana huañungapacca chaquitapish, maquitapish jahuarinami can. Caica, Aaronpish, paipac churicunapish huiñaita chashna ruhuachunmi mandashca» nirca.

Diospaclla aceitemanta

²² Mandac Diosca Moisestaca:

²³ «Sumac mishquilla ashnacucta acllai: Sucta kilo alli mirrata, quimsa kilo mishquilla ashnacuc canelata shinallatac quimsa kilo mishquilla ashnacuc calomata,

²⁴ sucta kilo casiata japingui. Ñucapac carpa huasipi tiyac valishca cullqui shina pezashcami canga. Shinallatac quimsa litro chaupi aceite olivostapish japingui.

²⁵ Tucui chaicunahuanca cahuishpa, ñucapaclla chicanyachina aceiteta ruhuangui. Chaimi ñucapaclla cachun chicanyachingapac cahuina aceiteca canga.

²⁶ Chai aceitehuan ñucahuan tupana huasitapish, ari nishca quillcata huacaichina Arcatapish cahuingui.

²⁷ Chai aceitehuan mizatapish, tucui chaipi tiyaccunandi, candelerotapish, tucui chaipi tiyaccunandi, inciensota rupachina altartapish,

²⁸ tucui rupachina altartapish, tucui chaipi tiyaccunandi, shinallatac bronce pailatapish, chaita tiyachinandi cahuingui.

²⁹ Chashna ruhuashpami, ñucapaclla cachun chicanyachingui. Chaicunaca ñucapacllami tucunga. Chaipi ima tuparicpica, ñucapacllami tucunga.

³⁰ Aarontapish, paipac churicunatapish cura tucushpa, ñucata servichun, chai aceitehuan cahuishpa, ñucapaclla cachun chicanyachingui.

³¹ Shinallatac israelcunataca: “Caimi tucui cancunapac huahua huahuacunapacpish, ñucapaclla cachun chicanyachina aceiteca canga.

³² Cai aceitehuanca ama yanga runacunata cahuinguichu. Shinallatac shuctac cai shina aceitetapish ama ruhuanguichu. Cai aceiteca ñucapacllami. Chaimantami ñucapaclla cashcata yuyashpa, causana canguichic.

³³ Maijanpish cai aceite shinata ruhuacpish, cai aceiteta yanga runapi cahuicpish israelpuramanta anchuchishcami canga” ningui» nirca.

Mishquilla inciensomanta

³⁴ Cutinllatacmi Mandac Diosca Moisestaca: «Mishquilla ashnacuc resinata, shillulaya alajata ashnacuc yuramanta ashtahuan alli inciensotapish, mishquilla ashnacuc galbanotapish chai shinallatac pezashpa japingui.

³⁵ Chaicunahuanca inciensota ruhuac runa shinallatac ñucapaclla chicanyachishca mishquilla ashnacuc inciensota, cachita churashpa ruhuangui.

³⁶ Chaicunamanta ashata ñututa tacashpa, ari nishca quillcata huacaichina cajón ñaupapipish, ñucahuan tupana huasipipish churangui. Chaipimi ñucaca canhuan tupasha. Chai inciensoca pi mana tuparina, ñucapaclla chicanyachishcami canga.

³⁷ Caica ñucapaclla chicanyachishca inciensomi canga. Cai shina inciensota pipish ama ruhuachun.

³⁸ Maijanpish shuctac cai shina inciensota ruhuashpa, mutquicca israelcunapuramanta anchuchishcami canga» nirca.