ÉXODO 29 - Dios Rimashcata Quillcashcami

Aaronpish, paipac churicunapish Diospaclla tucuna cashcamanta

¹ Ñucapaclla chicanyachishca cura cangapacca caicunatami ruhuana cangui: Ima mana tucushca shuc becita, ishcai cari ovejata,

² alli harinahuan, aceitehuan ruhuashca levadura illac tandata, tortata, levadura illac galletata aceitehuan cahuishpa apamungui.

³ Chaicunataca shuc uchilla tazapi churashpa, ishcai cari ovejahuan, becihuan apamungui.

⁴ Aarontapish, paipac churicunatapish ñucahuan tupana huasi yaicunaman pushashpa, armachishpa,

⁵ Aaronmanca curacuna churana tunicata, efodta, pectoralta churachingui. Efodtaca chumbihuan huatachingui.

⁶ Umapica ñucapacta ruhuac cura cashcata ricuchic quillcata mitrata churachingui.

⁷ Quipaca aceitehuan Aaronpac umapi cahuingui. Chashna ruhuacpimi, ñucapaclla saquiringa.

⁸ Aaronpac churicunata cayashpa, paicunamanpish tunicata churachingui.

⁹ Aarontapish, paipac churicunatapish chumbihuan huatachishpa, mitrata churachingui. Chashna ruhuacpimi, huiñaita ñucapaclla cura cachun mandashca canga.

¹⁰ Chaimantaca becita ñucahuan tupana huasi ñaupaman apamungui. Chaipimi Aaronpish, paipac churicunapish becipac umapi maquita churanga.

¹¹ Becitaca ñucahuan tupana huasi ñaupapi, Mandac Dios ñucapac ñaupapi huañuchingui.

¹² Yahuartaca cambac dedohuan altarpac gachucunapi cahuingui. Puchu yahuartaca altar chaquipi tallingui.

¹³ Yana shunguta, chunzhullita tapashca huiratapish, ishcai riñón huiratapish llucchishpa, altar jahuapi rupachingui.

¹⁴ Ashtahuanpish beci carata, aichata, huanutaca carpa huasimanta llucchishpa rupachingui. Chai ofrendaca juchamanta cushcami.

¹⁵ Ishcaimanta shuc ovejata apamungui. Chashna apamucpimi, Aaronpish, paipac churicunapish oveja uma jahuapi maquita churangacuna.

¹⁶ Chai oveja yahuartaca altar jahuapipish, quingraipipish chirapangui.

¹⁷ Chai cari oveja aichata pitinacushpa, chunzhullita jahuashpa, chaqui maquihuan, umahuan chai pitinacushca jahuapi churangui.

¹⁸ Chai oveja aichataca Altar jahuapi churashpa, ñucaman cushpa, rupachingui. Chashna rupachishcami ñucamanca mishquilla ashnanga.

¹⁹ Quipaca shuctac cari ovejata apamungui. Chai oveja uma jahuapimi Aaronpish, paipac churicunapish maquita churangacuna.

²⁰ Ovejata huañuchishpaca, chai yahuarta japishpa Aarontapish, paipac churicunatapish alli lado ringri puntapi cahuingui. Shinallatac alli maqui mama dedopi, alli chaqui mama dedopi cahuingui. Chai puchu yahuartaca altar jahuapipish, quingraipipish chirapangui.

²¹ Altar jahuapi cac yahuartapish, aceitetapish japishpa Aaronpac, paipac churicunapac jahuapi shinallatac paicunapac churanapi chirapangui. Shinami Aaronpish, paipac churicunapish ñucapaclla chicanyachishca canga.

²² Chai ovejaca ñucapaclla cura cachun chicanyachingapac cushca ovejami, chaimanta oveja chupata, chunzhulli tapashca huirata, yana shungu huirata, ishcai riñón huirata, alli lado rigrata apamungui.

²³ Mandac Dios ñucapac ñaupapi tiyacuc tazamanta aceitehuan masashca levadura illac tandata, tortata, galletata apamungui.

²⁴ Chaitaca Aaronpac shinallatac paipac churicunapac maquipi churangui. Shina churacpimi, paicunaca cuyuchishpa ñucaman cunga.

²⁵ Quipataca paicunapac maquimanta japishpa, ñucaman cushca tucui rupacuc jahuapi churashpa rupachingui. Chashna rupachishcami Mandac Dios ñucamanca mishquilla ashnanga. Chaica ñucaman cushpa rupachishcami canga.

²⁶ Aaronta ñucapaclla cachun chicanyachingapac cushca oveja pecho aichata japishpa, Mandac Dios ñucaman cuyuchishpa cungui. Chai aichaca cambacmi canga.

²⁷ Aaronta, paipac churicunata ñucapaclla cachun chicanyachingapac cuyuchishpa cushca pecho aichata, alzashpa cushca rigra aichata chicanyachingui. Chai aichaca Aaronman, paipac churicunamanmi canga.

²⁸ Chaicunaca israelcuna alzashpa ñucaman cushcami. Chaimantami chai aichaca Aaronman, paipac churicunaman cuna can. Chaitaca huiñaita ruhuachunmi mandashca canga. Chaica israelcuna ñucahuan alli tucungapac alzashpa cushca aichami.

²⁹ Ñucapaclla chicanyachishca Aaronpac churanaca pai huañushca quipaca churicunamanmi canga. Paicunami ñucata servingapac aceitehuan cahuishca cashpaca churaringa.

³⁰ Chai churanataca Aaronpac churicuna taitapac randi cura tucushpa, ñucahuan tupana huasiman ñucata servingapac yaicushpaca, canchis cutincamanmi churaringa.

³¹ Ñucata servichun chicanyachishca cura cachun, cushca ovejataca ñucapaclla chicanyachishca ucupimi yanuna can.

³² Chai aichataca Aaronmi paipac churicunahuan ñucahuan tupana huasi pungu tazapi tiyac tandahuan micunga.

³³ Tucui chaicunaca ñucapaclla tucuchun, juchamanta ñucaman cushca aichami. Chaimanta pipish mana micunachu, ashtahuanpish paicunallami micuna can.

³⁴ Cayandipac puchushca aichataca mana micunachu, ashtahuanpish rupachinami. Chaica ñucapaclla chicanyachishcami.

³⁵ Aarontapish, paipac churicunatapish ñuca nishca shina, tucuita ruhuangui. Chaicunataca canchis punzhapi ruhuangui.

³⁶ Punzhanta juchamanta shuc becita ñucaman cushpa huañuchingui. Chashnami ñucapaclla altar juchahuan mapayashcataca pichangui. Shinallatac aceitehuan cahuishpa ñucapacllata ruhuangui.

³⁷ Canchis punzhacaman altar jahuapi ñucaman cushpa rupachingui. Chashna ruhuacpimi, ñucapaclla chicanyachishca altar saquiringa. Pipish chai altarpi tuparicca ñucapaclla chicanyachishcami saquiringa.

Punzhanta ofrendata cunamanta

³⁸ Altar jahuapica caicunatami punzhanta cuna cangui: Shuc huatayuc ishcai ovejatami ñucaman punzhanta cungui.

³⁹ Shuctaca tutamanta, shuctaca chishita cungui.

⁴⁰ Tutamantaca cada ovejahuan shuc litro yalli harinahuan, shinallatac shuc litrota chaupi olivos tacashca aceitehuan cungui. Ovejataca litrota chaupi vinohuan ñucaman cungui.

⁴¹ Shuctac ovejataca chishitami cungui. Chai ovejataca tutamanta cushca shinallatac aceitehuan, vinohuan chapushpa rupachingui. Shina ruhuashcami ñucamanca mishquilla ashnanga.

⁴² Cancunapac huahua huahuacunami ñucahuan tupana huasi yaicunapi ñucaman cushpa, ñucapac ñaupapi punzhanta rupachina can. Chaipimi ñucaca cancunahuan tupashpa rimasha.

⁴³ Chaillapitacmi israelcunahuanca tupasha. Chai pushtuca ñuca sumaimana achiclla cashcamantami ñucapaclla canga.

⁴⁴ Ñucahuan tupana huasipish, altarpish ñucapaclla cachunmi ruhuashca. Aarontapish, paipac churicunatapish ñucata serviccuna cachunmi, ñucapacllata ruhuashca.

⁴⁵ Ñucaca israelcunapac chaupipimi causasha, shinallatac ñucaca paicunapac Diosmi casha.

⁴⁶ Chashna ruhuacpimi, israelcunaca ñuca paicunapac chaupipi causangapac Egiptomanta llucchimushcata yachanga. Ñucaca paicunata Mandac Diosmi cani.