ÉXODO 28 - Dios Rimashcata Quillcashcami

Curacuna churarinamanta

¹ Israelcunapuramanta cambac huauqui Aarontapish, paipac churi Aarontapish, Nadabtapish, Abiutapish, Eleazartapish, Etamartapish ñucapac curacuna tucushpa, ñucata servichun cambac ñaupaman cayangui.

² Cambac huauqui Aaronman ñucapac chicanyachishca tucuimanta yalli sumac jagan nicuc churanata ruhuangui.

³ Canmi Aaronman churanacunata ruhuachun alli yuyaiyuc, yachac espirituyuc runacunahuan parlana cangui. Chashna ruhuashpa churachicpimi, ñucapaclla chicanyachishca cura canga.

⁴ Cai churanacunata ruhuangui: Pectoraltapish, efodtapish, tunicatapish, cuadrado churanatapish, mitratapish shinallatac chumbitapish ruhuangui. Cura tucushpa, ñucata servichun, cambac huauqui Aaronmanpish, paipac churicunamanpish ñucapaclla chicanyachishca churanacunata ruhuachingui.

⁵ Chaicunataca curimanta, azul, morado, sani pucata, shinallatac lino puchcamantami ruhuanga.

⁶ Efodtaca curimanta ruhuashpami, azul, morado sani puca puchcahuan, lino puchcahuanmi sumacta bordashpa ruhuanga.

⁷ Efodca ishcai suni paño, ishcai lado hombros jahuata churashpa ñaupamanpish, huashamanpish tupanacuchishpa, chumbillinami canga.

⁸ Efod jahuata huatallina chumbica efod ruhuashca puchcallamantatacmi canga. Chaica curihuan, azul, morado, sani puca, shinallatac lino puchcahuanmi ruhuashca canga.

⁹ Ishcai ónice rumipi Israelpac huahuacunapac shuticunata quillcangui.

¹⁰ Huacharishcata catishpa, shuc rumipica suctapac shuticunata, caishuc rumipica caishuc suctapac shuticunata quillcangui.

¹¹ Rumipi rallashpa quillcac runa, sellota churac runa shinallatac ishcai rumipi Israelpac huahuacunapac shutita quillcangui. Chai rumi muyundipica curi engastecunata churangui.

¹² Chai rumicunata sumacta ruhuashpa, Israelpac huahuacunata yuyaringapac, efod churashca ishcai hombros jahuapi churangui. Chashnami Aaronca Mandac Dios ñucapac ñaupapi Israelpac huahuacunapac shuticunata yuyaringapac paipac ishcai hombros jahuapi apanga.

¹³ Curi engastecunata churashpa,

¹⁴ curillamantatac ishcai huatucunata jimbashca shinata chaicunapi churangui.

¹⁵ Chashnallatac allita ricushpa mandacucta ricuchic pectoraltapish sumacta bordashpa ruhuangui. Efodta ima shinami curihuan, azul morado, sani puca, lino puchcahuan ruhuarcangui, chashnallatac chaitapish ruhuangui.

¹⁶ Chaica sunimanpish, anchomanpish shuc cuarta yalli shina, cuadradomi canga. Shinallatac patarishcami canga.

¹⁷ Chai cuadropica chuscu fila sumac rumicunata churangui. Shucniqui filapica rubíes, topacio, berilo rumicunata,

¹⁸ ishcainiqui filapica esmeralda, zafiro, shinallatac diamante rumicunata churangui.

¹⁹ Quimsaniqui filapica jacinto, ágata, amatista rumicunata,

²⁰ chuscuniqui filapica crisólito, ónice shinallatac jaspe rumicunata churangui. Tucui chaicunataca curi engastecunapi churangui.

²¹ Chai rumicunaca Israelpac huahuacunatami ricuchicunga. Chai rumicunaca Israelpac aillucuna shinallatacmi chunga ishcai rumi canga. Tucui rumicunami Israel aillucunapac shutiyuc, selloyuc canga.

²² Chai pectoral jahuapi churangapacca alli curimanta jimbashpa huatucunata ruhuangui.

²³ Pectoral ishcai puntapi churangapacca curimanta ishcai argollata ruhuangui.

²⁴ Chai ishcai curimanta ruhuashca argollapica curimanta ruhuashca ishcai huatuta pasachingui.

²⁵ Chai ishcai huatucunataca curi ishcai engastecunahuan efod ishcai hombros jahuapi churashpa ñaupa ladoman huatangui.

²⁶ Shinallatac ishcai argollata curimanta ruhuangui. Chaicunataca efod jahuallapitac pectoral ucu lado ishcai lado esquinapi churangui.

²⁷ Curimanta ishcai argollatapish ruhuangui. Chaicunataca Efod churana ishcai hombros ucu ladoman churangui. Efodta tupanacuchishpa, chumbillichishca jahuapi churangui.

²⁸ Chashna pectoralpi churashca argollacunahuan, Efod churashca argollacunahuan azul puchcahuan huatangui. Chashna ruhuacpimi, pectoralca efodmanta mana chicanyashpa, chumbillina jahuapi canga.

²⁹ Chashnami Aaronca ñucapaclla carpa huasimanca allita ricushpa, mandacucta ricuchic pectotalpi Israelpac huahuacunapac shuticunata pechopi churashpa yaicunga. Chashnami ñucapac ñaupapi punzhanta yuyaringapac apashca canga.

³⁰ Allita ricushpa, mandacucta ricuchic pectoralpica Urimta, Tumimta churangui. Chashnami ñucapac ñaupaman Aarón yaicushpaca, paipac pechopi charinga. Chashnami Aaronca pechopi israelcunapac shuticunata apashpa, ñucapac ñaupapi punzhanta canga.

³¹ Efodhuan churarina tunicata azul colorta ruhuangui.

³² Chai túnica chaupipica uma yaicuna jutcuta ruhuangui. Chai jutcu muyunditaca ama lliquirichun patarishpa ahuangui.

³³ Chai túnica chaqui ladopica azul, morado, sani puca puchcahuan granadacunata huarcuchingui. Chai jahuapica muyundita curimanta ruhuashca campanillacunata churangui.

³⁴ Chai túnica chaqui muyunditami curi campanillata, quipaca shuc granadota, quipaca curi campanillata, quipaca granadota churangui.

³⁵ Aaronca ñucata servingapac yaicushpaca, chai churanahuanmi canga. Yaicushpapish, llucshishpapish chai uchilla campanacuna chilin nishpami, Mandac Dios ñucapac ñaupapica canga. Chashna uyaricpica, mana huañungachu.

³⁶ Chashnallatac alli curimanta shuc sisalaya placata ruhuangui. Chaipica fierrohuan aspishpa, Mandac Dios ñucapaclla chicanyachishcami nishpa sellota quillcangui.

³⁷ Chaitaca azul puchcahuan umapi churana mitra ñaupa ladoman churangui.

³⁸ Chashnami Aaronca chai placataca paipac frentepi apashpa puringa. Chaimi israelcuna ofrendata ñucaman cushpa rupachicushpa, ima pandarishcataca pai apanga. Shina paipac frentepi placata churashca cacpimi, ofrendataca chasquisha.

³⁹ Tunicatapish, mitratapish lino puchcahuan sumacta bordashpa ruhuangui. Chumbitapish chashnallatac sumacta ruhuangui.

⁴⁰ Aaronmanpish, paipac churicunamanpish tunicata, chumbita shinallatac mitratapish sumac jagan nicucta ruhuangui.

⁴¹ Aaronmanpish, paipac churicunamanpish chai churanacunata churachingui. Chai quipaca ñucapaclla chicanyachishca cura, mandac cachunca aceiteta umapi churangui.

⁴² Chashnallatac cinturamanta mucucaman lluchullata jarcarichun, lino puchcacunamanta calzonta ruhuangui.

⁴³ Chai churanahuanmi Aaronpish, paipac churicunapish ñucahuan tupana huasipi tandanacungapac, mana cashpaca altarpi servingapac yaicunga. Mana chashna yaicushpaca, juchallishpa huañungami. Cai mandashcacunami huiñaipac Aaronmanpish, quipa miraicunamanpish can.