ÉXODO 27 - Dios Rimashcata Quillcashcami

Bronce altarmanta

¹ Acacia caspimanta shuc cuadrado altarta ruhuangui. Chai altarca sunimanpish, anchomanpish ishcai metro quimsa chunga centímetro, cutin altomanca ishcai metro quimsa chunga centimetromi canga.

² Chai altar chuscu esquinapica chuscu gachuta ruhuangui. Chai gachucunaca altarhuan shuc shinalla ruhuashcami canga. Chai altar jahuataca broncehuan cahuingui.

³ Altarmanta uchupata pallana mangatapish, paletocunatapish, lavacaracunatapish, garfio fierrocunatapish, carbonta churana mangatapish broncellamanta ruhuangui.

⁴ Shuc rejillatapish broncemanta ruhuangui. Chuscu esquina rejilla jahuapica broncemanta chuscu argollata ruhuangui.

⁵ Chai rejillataca chaupi altarcamanlla churangui. Chai rejillaca altar chaupicamanllami chayanga.

⁶ Altar huanduna varacunataca acacia caspimanta ruhuashpa, jahuataca broncehuan cahuingui.

⁷ Chai varacunataca altar argollacunapi pasachishpa churangui. Chai varacunaca altarta huandungapac altarpac ishcai ladoman pasachishpa churangui.

⁸ Chai altarca urcupi ñuca ricuchishca shina tablacunamanta chushac cajonmi canga.

Dios-huan tupana huasi canzha pambamanta

⁹ Chashnallatac ñucahuan tupana huasi canzha pambatapish ruhuangui. Chai ura ladoca chuscu chunga pichca metromi canga. Lino puchcahuan ahuashca pañohuan jarcashcami canga.

¹⁰ Ishcai chunga pilar caspitapish, ishcai chunga basatapish broncemanta ruhuangui. Ganchocunatapish, varillacunatapish cullquimanta ruhuangui.

¹¹ Jahua ladopi cac pañoca sunimanca chuscu chunga pichca metromi canga. Shinallatac ishcai chunga pilarcunahuan, ishcai chunga bronce basacunatami charinga. Ganchocunatapish, varillacunatapish cullquimanta ruhuangui.

¹² Inti tigrana lado canzha pambaca anchomanca ishcai chunga ishcai metro chaupimi canga. Chunga pilarcunahuan, chunga basacunahuan shayachishcami canga.

¹³ Inti llucshina lado canzha pambapish ishcai chunga ishcai metro chaupimi canga.

¹⁴ Chai huasi yaicuna pungu shuc ladoca canchis metromi canga. Shinallatac quimsa pilarhuan, quimsa basahuanmi canga.

¹⁵ Caishuc ladomanpish canchis metromi canga. Quimsa pilarhuan, quimsa basahuanmi canga.

¹⁶ Canzhaman yaicuna pungutaca azul, morado, sani puca lino puchcahuan bordashca, iscun metromi canga. Chaipish chuscu pilarhuan, chuscu basahuanmi canga.

¹⁷ Tucui canzha pamba muyundi pilarcunaca cullquihuan jahuata cahuishca, cutin ganchocunaca cullquimanta, basacunaca broncemantami canga.

¹⁸ Chai canzha pambaca sunimanca chuscu chunga pichca metro, anchomanca ishcai chunga metro chaupi, altomanca ishcai metro canchis chunga centimetromi canga. Chaica lino puchcahuan ahuashca pañohuanmi canga. Cutin basacunaca broncemantami canga.

¹⁹ Ñucahuan tupana huasi ucupi ima tiyashcacunapish, carpa huasita charic ishtacacunapish, pañota charic canzha pamba ishtacacunapish broncemantami canga.

Lamparacunapi churana aceitemanta

²⁰ Lamparacunata punzhanta japichishpa charingapac olivosmanta ashtahuan alli aceiteta apamuchun mandangui.

²¹ Chai lamparacunataca Aaronmi paipac churicunandi Mandac Dios ñucapac ñaupapi, ñucahuan tupana ucupi mandashcacunata huacaichishca paño canzhapi, chishimanta tutamantacaman japichishpa charinga. Caicunataca tucui israelcunapish, paicunapac huahua huahuacunapish huiñaita pactachichunmi, mandashpa quillcashca.