ÉXODO 26 - Dios Rimashcata Quillcashcami

Dios-huan tupana huasimanta

¹ Ñucahuan tupana huasitaca caupushpa alli lino puca, morado puchcahuan ahuashpa, chunga pañota ruhuangui. Chaipica querubincunata bordashpa ruhuangui.

² Chai pañocunataca sunimanca chunga ishcai metro chaupi, anchomanca shuc metro pusac chunga centimetrota ruhuangui. Tucui pañocunami igual canga.

³ Shinallatac pichca pañocunaca tandachishpa sirashcami canga. Caishuc pichca pañopish chashnallatacmi tandachishpa sirashca canga.

⁴ Chai pañocunataca tandachishpa sirangui. Shuc ladopica azul puchcahuan tuclla ringrita ruhuangui. Caishuc ladopipish chashnallatac ruhuangui.

⁵ Punta paño puntapica pichca chunga tucllata ruhuangui. Caishuc catichina paño ladopipish pichca chunga tucllata ruhuangui. Chai tucllacunaca caishuc ladohuan, chaishuc ladohuan chimbapurashcami canga.

⁶ Chai quipaca pichca chunga ganchota curimanta ruhuangui. Chai ganchocunahuanmi caishuc lado pañohuan, chaishuc lado pañohuan tandachishpa, Dios-huan tupana huasica shuclla carpahuan catashca canga.

⁷ Dios-huan tupana huasi jahuata tapangapacca, chivo millmamanta chunga shuc pañota ruhuangui.

⁸ Chai pañocunaca sunimanca chunga quimsa metro chaupi, anchomanca shuc metro pusac chunga centimetromi canga. Tucui pañocunami igual canga.

⁹ Shuc pañopacca pichca pañotami sirashpa ruhuangui. Cutin caishuc pañopacca sucta pañota sirashpa ruhuangui. Suctaniqui pañotaca Dios-huan tupana huasi ñaupapi patarishpa churangui.

¹⁰ Punta sirashca paño ladopica pichca chunga huatanata ruhuangui. Quipa sirashca paño ladopipish pichca chunga huatanata ruhuangui.

¹¹ Shinallatac broncemanta pichca chunga ganchota ruhuangui. Chaicunataca huatanapi churachishpami, Dios-huan tupana huasitaca shuclla shinata ruhuangui.

¹² Catashcamanta chai puchushca pañotaca chai huasi canzhaman huarcuchingui.

¹³ Suniman catashca puchutaca shuc ladomanpish, caishuc ladomanpish pichca chunga centímetro yallichingui. Chai puchutaca shuc ladomanca huarcuchingapac, shuc ladomanca catangapac yallichingui.

¹⁴ Ñucahuan tupana huasita catangapacca oveja carata pucahuan tiñishpa ruhuangui. Jahuata catangapacca delfín carata ruhuangui.

¹⁵ Ñucahuan tupana huasita shayachingapacca acacia caspimanta tablacunata ruhuangui.

¹⁶ Chai tablacunaca sunimanca chuscu metro canchis chunga centímetro, anchomanca canchis chunga centimetromi canga.

¹⁷ Chai tablacunaca sumacta canichishpa shayachingapacmi ishcai espigata charinga. Chashna tucui tablacunata ruhuangui.

¹⁸ Ñucahuan tupana huasi ura ladotaca ishcai chunga tablahuan ruhuangui.

¹⁹ Tablacunapac chaquipi churangapacca chuscu chunga cullqui basata ruhuangui. Chai tablacunapica ishcai basata, ishcai espigata shuc tablata ishcai basapi shayachingui. Caishuccunatapish chashnallatac ruhuangui.

²⁰ Ñucahuan tupana huasi jahua lado quingraitaca ishcai chunga tablahuan ruhuangui.

²¹ Chai tablacunapi churangapacca chuscu chunga cullqui basata ruhuangui. Tabla chaquicunapica tucui tablapi ishcai basata churangui.

²² Ñucahuan tupana huasi huasha ladomanpish, inti tigrana ladomanpish churangapacca sucta tablata ruhuangui.

²³ Ashtahuanpish ñucahuan tupana huasi huasha lado ishcai esquinapi churangapacca ishcai tablata ruhuangui.

²⁴ Chai tablacunataca uramanpish, jahuamanpish bisagrahuan tinguishpa shayachingui. Chashnami ishcai esquinapi tablacuna shayachishca canga.

²⁵ Chaica, pusac tablatami chunga sucta cullquimanta ruhuashca basapi shayachishca canga. Tabla chaquicunapica tucui tablapimi ishcai basata churashca canga.

²⁶ Acacia caspimanta quingraipi churana pichca caspitapish, ñucahuan tupana huasi shuc ladopi churangapac ruhuangui.

²⁷ Ñucahuan tupana huasi huasha lado tablacunapacpish, chashnallatac quingraipi churana pichca caspicunata ruhuangui. Caishuc pichca quingrai caspicunataca ñucahuan tupana huasi inti tigrana lado tablacunapac cachun ruhuangui.

²⁸ Tablacuna chaupita shuc caspica quingraiman, caishuc puntamanta chaishuc puntacaman churangui.

²⁹ Tablacunatapish, quingraiman caspicunata churana argollacunatapish curihuan jahuata cahuishpa ruhuangui.

³⁰ Ñucahuan tupana huasitaca urcupi ricuchishca shinallatac ruhuangui.

³¹ Tapangapacca azul, morado, sani puca caupushca alli lino puchcahuan shuc telata ruhuangui. Chai telapica querubincunata sumacta bordashpa ruhuangui.

³² Chai telataca acacia caspimanta ruhuashca, curihuan jahuata cahuishca chuscu pilar jahuapi churangui. Chai pilarcunapac ganchocunata curimanta ruhuangui. Chai pilarcunataca cullqui basacunapac jahuapi churangui.

³³ Chai telataca ganchocunahuan huarcuchishpa churangui. Chai tela huashapica mandashcacunata huacaichina cajonta churangui. Chai telami ñucapaclla chicanyachishca ucuhuan, ñucapac caishuc ucuhuan chicanyachinga.

³⁴ Tapataca ima shina causanata yachachishcata huacaichina, ñucapac Arca jahuapi churangui.

³⁵ Mizataca jarcashca tela canzha ladoman churangui. Candelerotaca miza chimbapurapi carpa huasi ura ladoman churangui. Chaipimi mizaca jahua ladoman saquiringa.

³⁶ Ñucahuan tupana huasi punguta jarcangapacca azul, morado, sani puca alli lino puchcahuan shuc pañota ruhuangui. Chaitaca alli sumacta bordashpa ruhuangui.

³⁷ Chai pañopacca acaciamanta pichca pilarcunata ruhuangui. Chai pilarcunataca curihuan jahuata cahuingui. Ganchocunatapish curimanta ruhuangui. Caspicunata shayachingapacca bronceta yacuyachishpa, pichca basata ruhuangui.