ÉXODO 25 - Dios Rimashcata Quillcashcami

Dios-huan tupana huasiman ofrendata apamushcamanta

¹ Mandac Diosca Moisestaca:

² «Israelcunataca ñucaman ofrendata cungapac maijanpish ñucaman tucui shunguhuan cuccunamanta japichun ni.

³ Paicunamantaca curita, cullquita, bronceta,

⁴ azul, sani puca, morado puchcata, yuranlla lino puchcata, chivo millmata,

⁵ pucapi tiñishca oveja carata, delfín carata, acacia caspita japingui.

⁶ Lámpara japichina aceiteta, cahuirina aceiteta, mishquilla ashnacucta, inciensota mishquillata ruhuactapish japingui.

⁷ Efodpi, pectoralpi churangapac ónice rumicunatapish, engastecunatapish japingui.

⁸ Cancunapac chaupipi ñuca causangapac ñucahuan tupana huasita shayachinguichic.

⁹ Chai huasitapish, chaipi tiyaccunatapish ñuca nishca shina ruhuanguichic.

Arcamanta

¹⁰ Chashnallatac acacia caspimanta shuc Arcata ruhuangui. Chaica sunimanca shuc metro yalli, cutin anchomanca canchis chunga centímetro, shinallatac altomanpish canchis chunga centimetromi canga.

¹¹ Chaitaca ucutapish, canzhatapish alli curihuan cahuingui. Shinallatac muyunditapish curihuan ruhuangui.

¹² Shinallatac curita nuyuchishpa, chuscu argollata ruhuashpa, chuscu esquinapi churangui. Shuc lado esquinapica ishcaita, caishuc lado esquinapica ishcaita churangui.

¹³ Shinallatac acacia caspimanta varacunata ruhuashpa, jahuataca curihuan cahuingui.

¹⁴ Chai varacunataca Arcata huandungapac argollacunapi churachingui.

¹⁵ Chai varacunaca argollacunapi churachingui. Chaicunataca mana anchuchinachu cangui.

¹⁶ Chai Arcapica ñuca mandashca quillcata churangui. Chaitaca ñucami cusha.

¹⁷ Chai Arca tapataca curimanta ruhuangui. Chaica sunimanca shuc metro yalli, anchomanca canchis chunga centimetromi canga.

¹⁸ Querubincunata curita martillohuan huactashpa, ruhuashpa ishcai ladopi churangui.

¹⁹ Shuc querubintaca shuc ladoman, caishuc querubintaca caishuc ladoman churashpa, tapahuan shuclla shinata ruhuangui.

²⁰ Chai querubincunaca tapa jahuapimi alascunahuan tapata quillpashca ñahuipura ricushpa tiyacunga. Chai querubincunaca chimbapurashpami, tapata ricushpa tiyacunga.

²¹ Arcataca tapahuan tapashpa, ucupica ñuca mandashca quillcata churangui. Chai mandashcataca ñucami cusha.

²² Chaipimi ñucaca canhuan tupasha. Dios-huan ari nishca quillcata huacaichina Arca tapa jahuamanta, chai tapa jahuapi tiyacuc ishcai querubincunapac chaupimantami israelcunata imata ninata huillasha.

Mizata ruhuanamanta

²³ Acacia caspimanta shuc mizata ruhuangui. Chai mizaca sunimanca iscun chunga centímetro, anchomanca chuscu chunga pichca centímetro, altomanca canchis chunga centimetromi canga.

²⁴ Chai tucui miza jahuataca curihuan cahuingui. Muyunditaca curihuan ruhuangui.

²⁵ Miza muyunditaca curihuan canchis centímetro anchota churangui.

²⁶ Shinallatac chuscu argollatapish curimanta ruhuashpa, chuscu esquinacunapi churangui.

²⁷ Chai argollacunaca miza muyundita churashca caspicunapimi canga. Chaipimi varacunata satichishpa, mizata apanga.

²⁸ Mizata huanduna varacunataca acacia caspimanta ruhuashpa, jahuataca curihuan cahuingui. Chaihuanmi mizataca apangui.

²⁹ Shinallatac platocunatapish, jarrocunatapish, cucharacunatapish, vasocunatapish, alli curimanta ruhuangui.

³⁰ Chai miza jahuapica punzhanta ñucaman cushca tandata churangui. Ñucapac ñaupamantaca jaicapi mana illanachu can.

Curi candelerocunamanta

³¹ Shuc candelerotapish alli curita martillohuan huactashpa ruhuangui. Chai candelerotaca chaquitapish, chaquipi cactapish, copacunatapish, manzanacunatapish, sisacunatapish shucllata ruhuangui.

³² Candeleropac chaupi caspimantaca sucta rigracunami llucshinga. Shuc ladomanca quimsa, shuc ladomanca quimsami llucshinga.

³³ Shuc rigrapica quimsa almendro sisalaya vasocunami canga. Chaica, shuc manzanahuan shuc sisahuan canga. Cutin shuc lado rigrapica quimsa almendro sisalaya vasocunami canga. Chai manzanahuan shuc sisahuanmi canga.

³⁴ Candelero chaupi caspipica chuscu almendro sisalaya chuscu vasocunami manzanahuan, sisacunahuan tiyanga.

³⁵ Shinallatac ishcai rigra ucupitacmi manzanata charinga. Caishuc lado ishcai rigra ucupipish shuc manzanatami charinga. Chashnallatac shuctac ishcai rigracunapipish shuc manzanatami charinga. Chashnami candeleromanta llucshishca sucta maquipitac tiyanga.

³⁶ Chai manzanacunapish, rigracunapish mana pitishca shucllamanta martillohuan labrashca curillahuan ruhuashcami canga.

³⁷ Shinallatac canchis lamparacunata ruhuashpa, ñaupaman achicyachichun japichishpa churangui.

³⁸ Shinallatac mechacunata pitinatapish, uchupata tandanatapish alli curimanta ruhuangui.

³⁹ Chai candelerotapish, tucui chaipi imalla tiyaccunatapish quimsa chunga quimsa kilo curimantami ruhuana cangui.

⁴⁰ Tucui caicunataca urcupi ricuchishca shinallatac ruhuangui.