ÉXODO 24 - Dios Rimashcata Quillcashcami

Sinaí urcupi Dios israelcunahuan ari nishcamanta

¹ Mandac Diosca Moisestaca: —Ñuca maipi cashcaman Aaronhuan, Nadabhuan, Abiuhuan, canchis chunga israelcunata pushac yuyaccunahuan huichai shamushpa, carullapi cumuri.

² Shina cacpipish, can Moisesllami ñucapacman cuchuyana cangui. Paicunapish, israelcunapish mana cuchuyanachu can— nirca.

³ Moisés cutishpaca, Mandac Dios nishcacunatapish, tucui mandashcacunatapishmi israelcunaman huillarca. Shina huillacpimi, israelcuna shuc shinalla tucushpaca: —Mandac Dios tucui imata nishcacunataca pactachishunllami— nirca.

⁴ Moisesca Mandac Dios tucui nishcacunata quillcashpami, cayandi tutamanta utca jatarishpa, urcu chaquipi shuc altarta ruhuarca. Chai altartaca chunga ishcai Israel aillucunata catishpami, chunga ishcai rumita japishpa shayachirca.

⁵ Chai quipaca israelpuramanta maijan mosocunatami Mandac Dios-huan alli tucungapac shuc maltón huagrata huañuchishpa, rupachichun cacharca.

⁶ Moisesca chai yahuarta japishpami, chaupitaca shuc lavacarapi churashpa, shuc chaupitaca altar jahuapi chiraparca.

⁷ Chaimantaca Mandac Dios-huan ari nishca librota japishpami, tucui israelcunaman rezashpa uyachirca. Chaita uyashpami paicunaca: —Mandac Dios tucui nishcacunata cazushpa pactachishunllami— nirca.

⁸ Shina nicpimi, Moisesca yahuarta japishpa, tucui israelcunapac jahuapi chirapashpaca: —Cai yahuarca Mandac Dios-huan ari nishcata ricuchicmi— nirca.

⁹ Quipaca Moisespish, Aaronpish, Nadabpish, Abiupish, canchis chunga israelcunata pushac yuyaccunapish huichaiman rishpami,

¹⁰ israelcunata Mandac Diosta ricurca. Paipac chaqui ucupica jahua pacha achic nicuc shina, zafiro rumihuan allichishcami carca.

¹¹ Shina israelcunata pushac yuyaccuna Diosta ricucpipish, Diosca mana llaquichircachu. Chaimantami paicunaca micushpapish, ubiashpapish carcacuna.

Moisesca Sinaí urcupi cashcamanta

¹² Mandac Diosca Moisestaca: —Ñucahuan tupangapac urcuman shamushpa, chaipi shuyai. Chaipimi tabla rumipi ñuca mandashcacunatapish, israelcunata yachachishcacunatapish cusha— nirca.

¹³ Chashna nicpimi, Moisesca paita ayudac Josuehuan Diospac urcuman huichai rirca.

¹⁴ Chaimantami pushac yuyaccunataca: —Ñucanchic cutingacaman cancunaca caillapi shuyacuichic. Aaronpish, Hurpish cancunahuanmi saquirin. Ima llaqui tiyacpica, paicunaman huillanguichic— nishpami saquirca.

¹⁵ Shina nishpa, Moisés urcuman huichai ricpica, puyumi tucui chai urcutaca taparca.

¹⁶ Mandac Diospac sumaimana achicmi Sinaí urcu jahuapi carca. Sucta punzhatami puyuca chai urcuta taparca. Canchisniqui punzhapimi Mandac Diosca Moisesta puyu chaupimanta cayarca.

¹⁷ Mandac Diospac sumaimana achicca israelcunapac ñahuipica nina pillurishpa rupacuc shinami, urcu jahuapica ricurirca.

¹⁸ Moisés puyu ucuman yacushpa, urcu jahuaman huichai rishpaca, chuscu chunga punzhata shinallatac chuscu chunga tutatami chaipi carca.