ÉXODO 23 - Dios Rimashcata Quillcashcami

¹ Ama llullashpa rimanguichu. Ñucata mana cazuccunata ayudangaraicu ama llullanguichu.

² Taucacuna millaita ruhuashun nicpipish, ama paicunata catinguichu. Ama taucacuna llullashcallamanta pitapish llaquichinguichu.

³ Shinallatac huaccha cashcallamantapish, ama paipac parte tucunguichu.

⁴ Canta piñac runapac chingarishca huagrata, burrota chingarishpaca cutichingui.

⁵ Canta piñac runapac carga burro tigrashcata ricushpaca, ama pasanguillachu, ashtahuanpish ayudangui.

⁶ Maipi imata quichunacui tiyacpica, ama huacchapac cashcata quichushpa, shucman cunguichu.

⁷ Ama llullashpa rimanguichu. Cashcata ruhuac, mana faltayuc runata ama huañuchinguichu. Ñucata mana manchac runataca mana cashcata ruhuacmi nishachu.

⁸ Ama agradota japinguichu. Chai agradoca cashcata ruhuac runatapish, alli runatapish ñahuita quillpac shinatami ruhuan.

⁹ Cambac llactapi pozashpa causaccunata ama llaquichinguichu. Cancunaca shucpac llactapi cuyailla causanataca yachanguichicmi. Egiptopica cancunaca pozashpallami causarcanguichic.

Gentecunapish, allpapish samarina cashcamanta

¹⁰ Sucta huatatami allpapica tarpushpa, cosechana cangui.

¹¹ Canchisniqui huatapica cambac llactamanta huacchacuna, sacha animalcuna micuchunmi saquina cangui. Chashnami uvas chagratapish, olivos yuracunatapish ruhuana cangui.

¹² Sucta punzhallatac trabajangui. Ashtahuanpish canchisniqui punzhapica samaringui. Chashnami cambac huagratapish, burrotapish, canta servicpac churitapish, pozashpalla caccunatapish samachingui.

¹³ Tucui ñuca nishcacunata pactachingui. Ruhuashcalla dioscunata ama mañanguichu, paicunapac shutitapish ama rimanguichu.

Huatapi quimsa fiestata ruhuachun mandashcamanta

¹⁴ Huatapi quimsa cutin ñucata yuyarina fiestata ruhuangui.

¹⁵ Levadura illac tandata micuna fiestata ruhuangui. Ñuca mandashca shina Abib quillapica levadura illac tandataca canchis punzhacunata micungui. Chai quillapimi Egiptomanta llucshircangui. Pipish ñucapac ñaupamanca mana chushac maquilla shamungachu.

¹⁶ Punta pucushca granota cosechana fiestata ruhuangui. Tucui tarpushcata huata tucuripi tandachishpapish fiestata ruhuangui.

¹⁷ Huatapica quimsa cutinmi tucui caricuna Mandac Dios ñucapac ñaupapi ricurina can.

¹⁸ Ñucaman cushpa, huañuchishca animal yahuartaca ama levadurahuan ruhuashca tandahuan cunguichu. Animal huiratapish ama cayapac huacaichinguichu.

¹⁹ Cambac allpapi punta tarpushca granota canta Mandac Dios ñuca huasiman apamungui. Malta chivota huañuchishpapish ama paipac mamapac lechellapitac yanunguichu.

Mandac Diospac ángel israelcunata pushashcamanta

²⁰ Ñuca allichishca llactaman cuidashpa, ñanta pushachunmi, ñuca angelta ñaupata cachani.

²¹ Paita cazushpa, pai nishcata uyangui. Can mana cazucpica, paica mana perdonangachu. Ñucallatacmi paihuanca cani.

²² Ashtahuanpish pai nishcata uyashpa, tucui ñuca nishcata ruhuacpica, canta piñaccunataca piñashami, shinallatac canta llaquichiccunataca llaquichishami.

²³ Ñuca angelmi ñaupata rishpa amorreocunapac, heteocunapac, ferezeocunapac, cananeocunapac, heveocunapac shinallatac jebuseocunapac llactaman apanga. Paicunataca ñucami tucuchisha.

²⁴ Paicunapac dioscunapac ñaupapi ama cumuringuichu. Shinallatac ama servinguichu, ama paicuna shina mana allita ruhuanguichu. Ashtahuanpish diosman riccha rumicunataca ñutuchishpami chingachina cangui.

²⁵ Canta Mandac Diosta servingui. Ñucami tandatapish, yacutapish bendiciasha. Shinallatac ñucami tucui ungüicunata canmanta anchuchisha.

²⁶ Cambac llactapica huahuata mana chari pudic huarmipish, shulluc huarmipish mana tiyangachu. Can causana huatacunatapish yapachishami.

²⁷ Mai llactapi can yaicucpica, ñucami chai llactapi manchaita churashpa, chai llactapi causaccunataca callpachisha. Piñaccunaca manchaihuanmi cancunapac ñaupamanta miticushpa callpanga.

²⁸ Cancunapac ñaupata piña avispacunata cachashpami, heveocunatapish, cananeocunatapish, heteocunatapish paicunapac llactamanta llucchishpa cachasha.

²⁹ Allpa shitashca pamba saquiricpi, sacha animalcuna jundashpa, cancunata ama llaquichichunca paicunataca shuc huatallapica mana llucchishpa cachashachu.

³⁰ Ashtahuanpish cancuna mirarishpa, tucui allpata japingacamanmi paicunataca ashacaman llucchishpa cachasha.

³¹ Cambac llacta linderoca Puca Cuchamanta filisteocunapac cuchacaman, shinallatac shitashca pambamanta Eufrates yacucamanmi canga. Chai llactapi causaccunataca cancunapac maquipimi churasha. Canmi paicunataca llucchishpa cachangui.

³² Paicunahuanpish, paicunapac dioscunahuanpish imata ruhuangapac ama ari ninacunguichu.

³³ Cambac llactapi causachunpish ama saquinguichu. Paicunaca canta pandachishpa, ñucata piñachingami. Paicuna mitcachishpa pandachicpimi, canca yanga dioscunata servingui» nirca.