ÉXODO 22 - Dios Rimashcata Quillcashcami

Shuhuashcata cutichinamanta

¹ Maijanpish huagrata, ovejata shuhuashpa huañuchic, mana cashpaca catucca shuc huagramantaca pichca huagratami cutichina can. Cutin shuc ovejamantaca chuscu ovejatami cutichina can.

² Maijan huasipi shuhuacucta japishpa, huañuchishpaca, mana juchanchishcachu canga.

³ Ashtahuanpish punzha shuhuacucta japishpa, huañuchishpaca, juchanchishcami canga. Shuc shuhuacca chai shuhuashca mashna valishcatami cutichina can. Cullquita mana charishpaca, shuhuashcamanta cutichingapacca paillatacmi caturina can.

⁴ Shuhuacpac maquipi ima animal japi tucucpica, cada shucmantami ishcaita cutichina can. Chashnami huagramantapish, ovejamantapish, burromantapish cutichina can.

⁵ Maijanpish shucpac michina pambaman, mana cashpaca uvas chagraman animalta pasachishpa carashpaca, paipac mai alli michina pambata, mana cashpaca uvas chagratami cutichina can.

⁶ Maijanpish pucuc yurata, mana cashpaca cosechana chagrata, mana cashpaca gavillata rupachishpaca, rupachishcamantaca cutichinami can.

⁷ Maijanpish cullquita, mana cashpaca ima valishcacunata mingashpa charicucpi, shuc shuhuac yaicushpa, huasi ucupi japi tucushpaca, chai shuhuacmi cada shucmanta ishcaita cutichina can.

⁸ Ashtahuanpish shuhuac mana japi tucucpica, chai mingai tucuc runami, pai mana shuhuac cashcataca juezpacman huillagringa.

⁹ Maijanpish chingarishca huagrata, burrota, ovejata, churanata, mana cashpaca imapish chingarishcata: “Caica ñucapacmi” nicpi, cutin caishucpish: “Ñucapacmi” nicpica, ishcaitami juezpacman nina can. Juez maijantami juchanchin, chaimi cada shucmanta ishcaita cutichina can.

¹⁰ Maijanpish burrota, huagrata, mana cashpaca ovejata, mingacpi, chai animal huañucpi, chugriricpi, mana cashpaca pi mana ricucpi shuhuaricpica,

¹¹ chai mingai tucuc runami Diospac ñaupapi: “Mana shuhuarcanichu” nishpa huillana can. Shina nicpimi, chai animalyuc runaca paipac nishcata crishpa, mana cobranga.

¹² Ashtahuanpish shuhuacucta ricushpaca, animalyucman paganami can.

¹³ Chai animalta ima sacha animal polvoshca cacpica, chai huañushca puchutami animalyucman ricuchigrina can. Chashnami chai animalyucman mana cutichina can.

¹⁴ Maijanpish ima animalta mañashpa charicucpi, chai animalyuc mana ricucucpi, chugriricpi, mana cashpaca huañucpica, cutichinami can.

¹⁵ Ashtahuanpish animalyuc ricucucpi, imapish tucucpica, mana imata cutichichu can. Fletashca animal cacpica, animalyucmanca fletashca cullquillatatacmi cutichina can.

Gentecuna alli causachun mandashcamanta

¹⁶ Maijanpish cazarangapac manarac ari nishca, carihuan manarac chayarishca solterata inquitashpa sueñushpaca, mashnata pagana cashcata pagashpami paihuan cazarana can.

¹⁷ Solterapac taita mama cazarachun munacpica, carihuan manarac chayarishca solteramanta mashnata pagana cashcatami pagana can.

¹⁸ Brujacuna huañunami can.

¹⁹ Maijanpish animalhuan chayaricca huañunami can.

²⁰ Maijanpish Mandac Diosman animalcunata huañuchishpa, mana cushpa, shuctac dioscunaman cucca huañunami can.

²¹ Egiptopica pozashpallami causarcangui. Chaimanta cancunapac llactapi pozashpalla causactaca ama umanguichu, ama llaquichinguichu.

²² Viuda huarmitapish, taita mama illac huahuacunatapish ama llaquichinguichu.

²³ Paicunata llaquichicpi, paicuna ñucata mañacpica, ñucaca uyashami.

²⁴ Ñucaca nina japiric shina piñarishpami, espadahuan huañuchisha. Cancunapac huarmicunaca viuda, cutin huahuacunaca taita mama illacmi saquiringa.

²⁵ Maijan ñuca acllashcapura runaman, cancunahuan causac huaccha runaman cullquita mañachishpaca, ama cullquita mañachiccuna shina interesta cobranguichu.

²⁶ Cullquita mañac runa churanata saquicpica, manarac inti tigracpi cutichingui.

²⁷ Chai churanaca paipac tapallinami, chirimanta jarcarinami. ¿Ima shinatac churana illacca sueñungayari? Chashna mana cutichicpi, pai ñucata mañacpica, ñucaca uyashami. Ñucaca llaquicmi cani. Chaimanta paita ayudangapac rishami.

²⁸ Cancunapac llactapi mandaccunatapish, jueztapish ama llaquichinguichu.

²⁹ Cambac punta pucushca granotapish, vinotapish, ama unayashpa, utca ñucaman cungui. Cambac punta cari huahuatapish ñucaman cungui.

³⁰ Punta huacharishca cari huagratapish, ovejatapish ñucaman cungui. Chai punta huacharishca animalca canchis punzhatami mamahuan canga. Pusac punzhaca ñucaman cungui.

³¹ Cancunaca ñucapaclla acllashcami canguichic. Chaimanta sacha animal polvoshpa huañuchishca aichataca ama micunguichicchu, ashtahuanpish allcucunaman shitanguichic.