ÉXODO 21 - Dios Rimashcata Quillcashcami

Serviccunata ima shina charinamanta

¹ Caicunatami israelcunataca mandana cangui:

² Israelpuramanta shuc servicta randishpaca, sucta huatata servichingui. Ashtahuanpish canchisniqui huatapica cacharinguilla.

³ Chai servic pailla yaicushca cashpaca, paillami llucshina can. Huarmindi yaicushca cashpaca, huarmindimi llucshina can.

⁴ Paipac amo cazarachishca cacpi, chai huarmipi huahuacunata charishca cacpica, huarmipish, huahuacunapish amohuanmi saquirina can. Ashtahuanpish servicllami llucshinga.

⁵ Shina cashpapish servicllatac: “Ñuca amotapish, ñuca huarmitapish, huahuacunatapish cuyanimi, mana risha ninichu” nicpica,

⁶ amoca juezcunapacman pushashpa, mana cashpaca caspi pilar cuchupi cuchuyachishpami, fierrohuan ringrita jutcuna can. Chashna ruhuacpica, huañungacamanmi servishpa causana can.

⁷ Maijan servichun ushita catucpica, chai ushica mana cari servic shinachu llucshina can.

⁸ Amo servic huarmihuan cazarasha nicushpapish, chai huarmi mana alli cacpica, mana chican gentecunaman catui pudinchu. Ashtahuanpish paipac familiacunamanmi cutichina can.

⁹ Cutin amo chai servic huarmita paipac churihuan cazarachishpaca, quiquin ushita shinami charina can.

¹⁰ Churi shuctac huarmihuan cazarashpapish punta huarmimanca micunatapish, churanatapishmi cuna can. Shinallatac quiquin huarmihuan shinami sueñuna can.

¹¹ Cai quimsa nishcacunata mana pactachicpica, chai servic huarmica imata mana pagashpa llucshinallami can.

Huañuchiccunata llaquichinamanta mandashcacunamanta

¹² Maijanpish chugrichishpa huañuchicca, huañuchishcami cana can.

¹³ Maijanpish mana huañuchinamanta, ashtahuanpish Dios munashcamanta huañuchicca, maipi ñuca miticugrinapi miticugrina can.

¹⁴ Maijanpish shuctac runata piñashpa, cungailla huañuchicca, ñuca altarmanta llucchishpa, huañuchishcami cana can.

¹⁵ Maijanpish quiquin taita mamata macashpa, chugrichicca huañungatacmi.

¹⁶ Maijanpish shuc runata shuhuashpa, catushca cashpa, mana cashpaca paipac maquipi charicushpaca, chai runaca huañunami can.

¹⁷ Maijanpish quiquin taita mamata mana alli nicca huañunami can.

¹⁸ Maijan macanacushpa, shuc runata huactashpa, mana cashpaca rumihuan chugrichishpa, mana huañuchishpapish camayachishpaca,

¹⁹ camamanta jatarishpa, taunallahuan puricucpica, chai chugrichic runaca mana juchanchishcachu canga. Ashtahuanpish jambirishcamanta, camapi cashpa mana trabajai pudishcallamantami pagana can.

²⁰ Maijan amo paita servic carita, servic huarmita caspihuan huactashpa, huañuchicca llaquichishcami canga.

²¹ Ashtahuanpish shuc punzhata, mana cashpaca ishcai punzhata causacushpa huañucpica, paipac servic cashcamanta mana llaquichishcachu canga.

²² Caricuna macanacushpa, shuc huicsayuc huarmita chugrichishpa, shulluchishpaca huarmipac cusa mashna mañashcata, shinallatac juez nishcatami pagana can.

²³ Ashtahuanpish sinchita chugrichishca cacpi, chai huarmipish huañucpica, chai chugrichic runaca huañuchishcami cana can.

²⁴ Ñahuimantaca ñahuihuan, quirumantaca quiruhuan, maquimantaca maquihuan, chaquimantaca chaquihuan pagachun.

²⁵ Rupachicca rupachishcami cana can. Chugrichicca chugrichishcami cana can. Huactacca huactashcami cana can.

Shuc animal shuc runata huañuchicpi, imata ruhuana cashcamanta

²⁶ Maijanpish paita servic carita, servic huarmita ñahuipi huactashpa tucyachicca chai ñahuimanta servicta cacharishpa cachanami can.

²⁷ Maijanpish paipac servic caripac, servic huarmipac quiruta llucchicca chai quirumanta cacharishpa cachanami can.

²⁸ Shuc huagra carita cashpa, huarmita cashpa, sacmashpa huañuchicpica, chai huagrataca rumihuan shitashpa huañuchinami can. Chai aichataca mana micunachu. Shina cacpipish, huagrayuctaca mana imata ruhuanachu.

²⁹ Huagra sacmac cashcata yachashca jahua, mana huillashpa, shuc carita cashpa, huarmita cashpa sacmashpa huañuchicpica, chai huagrataca rumihuan shitashpami huañuchina can. Shinallatac huagrayuctapish huañuchinami can.

³⁰ Ashtahuanpish huagra huañuchishcamanta huagrayuc runata mana huañuchingapacca, juez mashna cullquita cuchun nishcatami pagana can.

³¹ Shuc cari huahuata, mana cashpaca huarmi huahuata huagra sacmashpa huañuchicpica, chai mandashca shinallatacmi huagrayuc runataca llaquichina can.

³² Shuc servic carita, mana cashpaca servic huarmita huagra sacmacpica, quimsa chunga siclos cullquitami servicpac amoman cuna can. Cutin huagrataca rumihuan shitashpami huañuchina.

³³ Maijanpish yacuta jundachingapac jutcuta allashpa, mana cashpaca jutcumanta pichashpa, jutcucunata ruhuashpa saquicpi, chaipi huagra, mana cashpaca burro urmacpica,

³⁴ chai jutcu dueñomi chai animalmantaca mashna valishcata pagashpa, chai huañushca animaltaca japina can.

³⁵ Maijanpac huagra shucpac huagrata sacmashpa huañuchicpica, huañuchic huagrata catushpami, cullquitapish, shinallatac chai huañushca huagratapish chaupinacuna can.

³⁶ Ashtahuanpish chai huagra sacmac cashcata yachashca jahua, mana alli cuidashpa, shuctac huagrata sacmachishpa huañuchicpica, huañuchic huagrayucmi shuc huagrata cutichina can. Shinallatac huañushca huagrataca paimi japina can.