ÉXODO 20 - Dios Rimashcata Quillcashcami

Chunga mandashcacunamanta

¹ Dios tucui cai mandashcacunata rimashpaca:

² «Ñucaca Mandac Diosmi cani. Ñucami cancunataca Egipto llactapi huatashca shina llaquita causacushcamanta llucchircani.

³ Ñuca ñaupapica ama shuctac dioscunata charinguichu.

⁴ Jahua pachapi, cai pachapi, yacu ucupi, allpa ucupi tiyaccunaman ricchacunatapish ama ruhuanguichu.

⁵ Chaicunapac ñaupapica ama cumuringuichu, ama servinguichu. Ñucaca cancunata Mandac Diosmi cani. Shuctac diosta charichunca manatac munanichu. Taitacuna ñucata piñashpa, millaita ruhuashcamantaca paicunapac huahuacunacaman, nietocunacaman shinallatac bisnietocunacamanmi llaquichisha.

⁶ Ashtahuanpish ñucata cuyashpa, ñuca mandashcata cazuccunataca huaranga huaranga miraicamanmi cuyasha.

⁷ Mandac Dios ñucapac shutipi ama yanga ari ninguichu. Maijanpish ñuca shutipi yanga ari nicca llaquichishcami canga.

⁸ Ñucapaclla samana punzhata yuyaringui.

⁹ Sucta punzhacaman trabajangui.

¹⁰ Ashtahuanpish canchisniqui punzhaca Mandac Dios ñucapaclla chicanyachishca punzhami. Chai punzhapica canpish, cambac churicunapish, cambac ushicunapish, canta servic caricunapish, servic huarmicunapish, cambac animalcunapish, shuctac llactamanta shamushpa, canhuan causaccunapish ama imata ruhuanguichicchu.

¹¹ Ñucaca Mandac Diosmi cani. Ñucaca sucta punzhapimi jahua pachatapish, cai pachatapish, mama cuchatapish, chaipi tucui ima tiyashcatapish ruhuarcani. Ashtahuanpish canchisniqui punzhapica samarircanimi. Chaimantami ñucaca chai punzhataca bendiciashpa, ñucapacllata ruhuarcani.

¹² Mandac Dios ñuca cushca llactapi unai huatata causangapac cambac taita mamata cazungui.

¹³ Ama huañuchingui.

¹⁴ Ama huainayangui.

¹⁵ Ama shuhuangui.

¹⁶ Ama yanga pitapish juchanchishpa llaquichingui.

¹⁷ Ama shucpac huasita munangui. Shucpac huarmitapish, servicpac huarmitapish, canta servic huarmitapish, shucpac huagratapish, shucpac burrotapish, ima shuctac charishcatapish ama munangui» nishpami mandarca.

Israelcuna Mandac Diosta manchashcamanta

¹⁸ Tucui israelcunamami tulun nishcatapish, corneta tocashcatapish uyarca. Shinallatac relampa jaguin nishcatapish, Sinaí urcu cushni tapashcatapish ricurca. Chaimantami manchaihuan chucchushpa caruyarca.

¹⁹ Shina cacpimi Moisestaca: —Canlla parlailla. Ñucanchicca uyashunllami. Mandac Diosca ama ashtahuan rimachun. Pai rimacpica, huañushunmi— nirca.

²⁰ Shina nicpimi Moisesca: —Ama manchaichicchu. Diosca cancuna paita manchac cashcata ricungapacmi shamurca. Paica cancuna punzhanta paita manchashpa, ama juchallichunmi munan— nirca.

²¹ Tucui israelcuna carupi cacpimi, Moisesca Dios rimacuc amsa puyuman cuchuyarca.

Altarta ruhuachun mandashcamanta

²² Mandac Diosca Moisestaca: «Israelcunataca: “Jahua pachamanta ñuca shamushpa, cancunahuan parlashcatami ricushcanguichic.

²³ Chaimanta ñucapac randi, cullquimanta, curimanta yanga dioscunata ama ruhuanguichicchu.

²⁴ Ñucamanca allpamanta shuc altarta ruhuanguichic. Chai jahuapi ovejacunata, vacacunata ñucahuan alli tucungapac ñucaman cushca tucui ofrendata rupachichic. Maipi cacpipish, ñucaca yuyarishpami, cancunapacman shamushpa bendiciasha.

²⁵ Chai altarta ama labrashca rumicunahuan ruhuanguichicchu. Fierrocunahuan allichishpaca mapayachinguichicmi.

²⁶ Shinallatac ñucaman altarta ruhuashpaca ama gradacunahuan ruhuanguichicchu. Cancuna chaiman huichai rishpaca, cancunapac lluchulla aichata ricuchinguichicmi” ningui.