ÉXODO 2 - Dios Rimashcata Quillcashcami

Moisés huacharishcamanta

¹ Levipac aillupuramanta shuc runami paipac aillumanta shuc huarmihuan cazararca.

² Chai huarmica huicsayuc tucushpami, shuc cari huahuata charirca. Chai huahua sumac cacpimi, quimsa quillata pacashpa charirca.

³ Ña mana ashtahuan pacashpa chari pudishpami, canashtata ruhuashpa, yacu ama yaicuchun breahuan, asfaltohuan jahuata cahuirca. Chaipi huahuata churashpami, Nilo yacupi tiyac carrizo ucupi churarca.

⁴ Cutin chai huahuapac panica carullamantami huahua ima tucucta ricucurca.

⁵ Chai yacumanmi Faraonpac ushica armangapac rirca. Pai chai yacupi armacucpica, paita servic solteracunaca yacu patapimi puricurca. Chashna armaricushpami, carrizo ucupi shuc canashtata ricurca. Chaimantami paita servic shuc solterata apamuchun cacharca.

⁶ Faraonpac ushi chai canashtata pascashpaca, shuc huahua huacacuctami ricurca. Chaimantami chai huahuata llaquishpaca: —Cai huahuaca israelpuramantami— nirca.

⁷ Chaimantami huahuapac panica Faraonpac ushitaca: —¿Chai huahuata huiñachichun, israelpuramanta shuc huarmita cayagrishachu?— nirca.

⁸ Shina nicpimi, Faraonpac ushica: —Rilla— nirca. Shina nicpimi, chai soltera rishpaca, huahuapac mamata pushamurca.

⁹ Faraonpac ushica chai huarmitaca: —Cai huahuata apashpa huiñachigri. Can huiñachishcamantaca pagashallami— nirca. Chashna nicpimi, chai huahuapac mamaca apashpa huiñachirca.

¹⁰ Chai huahua huiñacpica, Faraonpac ushiman cungapacmi apamurca. Paica chai huahuataca quiquin huahua shinatami charirca. Paica: «Cai huahuataca yacumantami llucchircani» nishpami, Moisesta shutichirca.

Moisés Egiptomanta miticushpa rishcamanta

¹¹ Moisés ña jatun cashpami, paipac huauqui israelcunata ricungapac rirca. Paica israelcuna yallita sinchi ruhuaicunata ruhuacuctapish, shinallatac Egipto runa shuc Israel runata macacuctapish ricurca.

¹² Chaimantami paica caita chaita ricushpa, pi mana ricucucpica, Egipto runata huañuchishpa, tiyupi pacarca.

¹³ Cayandi cutinllatac ricungapac llucshishpaca, israelcunapuramanta ishcai runacuna macanacucuctami ricurca. Shina ricushpami llaquichic runataca: —¿Ima nishpatac cancunapuramanta runata macacungui?— nirca.

¹⁴ Shina nicpimi, chai runaca: —¿Pitac cantaca ñucanchicta mandac cachun, juez cachun churarca? ¿Ñucatapish Egipto runata shinatachu huañuchisha ningui?— nirca. Chaimantami Moisesca: «Chai runata huañuchishcataca ñami yachac chayashca» nishpami, yalli manchaihuan carca.

¹⁵ Faraonca chashna tucushcata yachashpami, Moisesta huañuchinata yuyarirca. Chaimantami Moisesca Faraonpac ñaupamanta miticushpa, Madián llactapi causangapac rirca. Chaipi causacushpami, yacu jundu ladopi tiyacurca.

¹⁶ Madián llactapi causac curami canchis ushita charirca. Paicunaca yacuta llucchishpa, rumi bateacunapi jundachishpa, taitapac ovejacunaman ubiachingapacmi shamurca.

¹⁷ Ashtahuanpish shuctac michiccuna shamushpami, paicunataca chaimanta catishpa cacharca. Chashna ruhuacpimi, Moisesca misashpa solteracunapac ovejacunaman yacuta ubiachirca.

¹⁸ Chai solteracuna paipac taita Reuelpacman cutimucpi taitaca: —¿Ima nishpatac utca cutimunguichic?— nirca.

¹⁹ Shina nicpimi paicunaca: —Shuc Egipto runami shuctac michiccunamanta misashpa, ñucanchic ovejacunamanrac yacuta llucchishpa ubiachishpa cachan— nirca.

²⁰ Chashna nicpimi, Reuelca paipac ushicunataca: —¿Maipitac chai runaca? ¿Ima nishpatac mana pushamurcanguichic? Richic, micunata carangapac cayamugrichic— nirca.

²¹ Moisés Reuelpac huasipi causangapac saquisha nicpimi, paica paipac ushi Seforahuar cazarachirca.

²² Chai huarmica shuc cari huahuatami charirca. Chai huahuataca: «Shucpac llactapi pozashpa causacllami cani» nishpami, Gersonta shutichirca.

²³ Tauca huatacuna quipami Egipto llactata jatun mandacca huañurca. Israelcunaca sinchi ruhuaicunapi cashpami, caparishpa Diosta mañarca. Chashna caparishpa mañashcataca Diosca uyarcami.

²⁴ Diosca paicuna llaquilla cashpa, mañashcata uyashpami Abrahamhuan, Isaac-huan, Jacobohuan ari nishcata yuyarirca.

²⁵ Diosca paicuna ima shina causacushcata ricurcami. Chaimantami paicunata ayudasha nirca.