ÉXODO 19 - Dios Rimashcata Quillcashcami

Israelcuna Sinaiman chayashcamanta

¹ Israelcunaca Egiptomanta llucshishpaca, quimsa quillapimi shitashca pamba Sinaiman chayarca.

² Refidim pambamanta rishpaca, Sinaí shitashca pambaman chayashpami, Sinaí urcu chimbapurapi carpa huasita shayachishpa tiyarirca.

³ Dios-huan Moisés parlangapac huichai ricpimi, chai urcu jahuamanta Mandac Dios cayashpaca: —Jacobopac huasi ucupura israelcunataca:

⁴ “Cunanmi Egipto runacunata ñuca imata ruhuashcatapish, chaimanta cancunata jatun angapac alaspi churac shina, pushamushcatapish ricunguichic.

⁵ Cancuna ñuca nishcata cazushpa, ñucahuan ari nishcata pactachishpaca, tucuimanta yalli valishca ñucapaclla gentecunami canguichic.

⁶ Cancunaca mandac curacuna, shinallatac jucha illac gentecunami canguichic. Tucui cai llactaca ñucapacmi” ninmi ningui— nirca.

⁷ Shina nicpimi, Moisés shamushpaca, israelcunata pushac yuyaccunata cayashpa, Mandac Dios mandashcacunata paicunapac ñaupapi huillarca.

⁸ Shina huillacpimi, tucui israelcunaca: —¡Mandac Dios tucui nishcataca pactachishunllami!— nirca. Israelcunapac nishcacunataca Moisesca Mandac Diosmanmi huillarca.

⁹ Shina huillacpimi, Mandac Diosca Moisestaca: —Ñucami amsa puyupi cambacman shamusha. Chashna shamushpa, canhuan parlacta israelcuna uyashpami, cantaca tucui causaipi cringa— nirca. Cutin israelcuna ima nishcataca Moisesca Mandac Diosmanmi huillarca.

¹⁰ Chaimantami Mandac Dios Moisestaca: —Israelcunapacman rishpa cunanpish, cayapish ñucapaclla cachun, shinallatac paicunapac churanatapish tacshachun mandai.

¹¹ Quimsa punzhacamanca allichirishca cachun mandangui. Chai punzhami Sinaí urcu jahuaman tucui israelcuna ricucucpi shamusha.

¹² Canca israelcuna maicaman chayarina cashcataca urcu muyundita unanchishpa: “Cai señalashcamantaca ama huichaiman ringuichicchu. Cai señalashcallapipish ama tuparinguichicchu. Maijanpish chai urcuman chayarishpaca huañungatacmi.

¹³ Pipish chaipica mana tupari pudinchu. Maijanpish tuparicca rumihuan shitashpa, mana cashpaca arcohuan shitashpa huañuchishcami canga. Shinami gente cashpa, animal cashpa huañunga. Corneta unaicaman tocashca uyaricllapimi urcumanca huichicunga” ningui— nirca.

¹⁴ Moisés urcumanta urai shamushpaca, tucui israelcunatami Diospacllata ruhuarca. Paicunaca churanacunatapish tacsharcami.

¹⁵ Moisesca israelcunataca: —Cancunaca quimsa punzhapacca allichirishca caichic. Shinallatac huarmicunapipish mana chayarinachu canguichic— nirca.

¹⁶ Ña quimsa punzha pacarimucucpica, tulun nishpa, relampa jaguin nishpa, shinallatac amsa puyupish urcuta taparcami. Cutin corneta sinchita tocashcapish uyarircami. Shina uyaricpimi, carpa ucupi tiyac israelcunaca mancharishpa chucchurca.

¹⁷ Chaimantami Moisesca carpa huasicunamanta tucui israelcunata llucchishpa, Dios-huan tupangapac urcu chaquipi shuyarca.

¹⁸ Mandac Dios nina chaupita urcuman urai shamushcamantami chai urcuca hornota cushni tapashca shina carca. Tucui chai urcumi yallita chucchucurca.

¹⁹ Cornetapi tocashcaca ashtahuan sinchitami uyarishpa catirca. Moisés Dios-huan parlacpica, relampa tulun nicuc shinami, rimashpa cutichirca.

²⁰ Mandac Diosca Sinaí urcu jahuaman shamushpami, Moisesta cayarca. Chashna cayacpimi, Moisesca chai urcu jahuaman huichai rirca.

²¹ Mandac Diosca Moisestaca: —Gentecuna Mandac Dios ñucata ricungapac maicaman chayana cashcata pasashpa, pacta huañunman. Chaiman ama pasachun cutishpa rimagri.

²² Mandac Dios ñucapacman cuchuyaccunata ñucapaclla tucuchun nigri. Mana cashna tucucpica, paicunataca llaquichishami— nirca.

²³ Moisesca Mandac Diostaca: —Israelcunaca Sinaí urcumanca mana huichai ri pudingachu. Canllatacmi: “Maicaman chayarinata urcu muyundita señalangui, shinallatac ñucapacllata ruhuangui” nishpa mandarcangui— nirca.

²⁴ Mandac Diosca: —Uraiman shamushpa, Aaronta huichai pushamugri. Shina cacpipish curacunapish, israelcunapish Mandac Dios ñucahuan tupangapac maicaman rinata señalashcata mana pasanachu can. Mana cazushpa pasacpica, Mandac Dios ñucaca llaquichishami— nirca.

²⁵ Chaimantami Moisesca uraiman shamushpa, tucui chai nishcacunata israelcunaman huillarca.