ÉXODO 18 - Dios Rimashcata Quillcashcami

Jetro Moisesta ricungapac rishcamanta

¹ Moisespac suegro Jetroca Madianpimi cura carca. Paica Mandac Dios Moisestapish, Dios acllashca israelcunatapish imata ruhuashcata, shinallatac Egiptomanta israelcunata ima shina llucchishcatami yachac chayarca.

² Moisesca paipac huarmi Seforataca paipac taita Jetropacman cachacpimi, Jetroca cushilla Seforatapish,

³ Moisespac ishcai churitapish chasquirca. Moisesca: «Cai llactapica pozashpallami causacuni» nishpami, shuc churitaca Gersonta shutichirca.

⁴ Cutin Shuc churitaca: «Ñuca taitapac Diosmari Faraón espadahuan huañuchinamanta quishpichirca» nishpami Eliezerta shutichirca.

⁵ Moisesca shitashca pambapimi Mandac Diospac urcu ladollapi carpata shayachishpa tiyacurca. Chaimanmi Moisespac suegro Jetroca Moisespac huarmindi, Moisespac churicunandi chayarca.

⁶ Chaipimi Moisestaca: “Ñucaca cambac suegro Jetromi cani. Ñucami cambac huarmindi, cambac ishcai churicunandi cambacman shamunchic” nirca.

⁷ Shina nicpimi, Moisesca paipac suegrota tupangapac llucshishpa, cumurishpa mucharca. Shinallatac caishuc chaishuc “Allillachu canguichic” ninacushpami, carpa huasiman yaicurca.

⁸ Moisesca Mandac Dios israelcunaman allita ruhuashpa, Faraontapish, Egipto runacunatapish imata ruhuashcatapish, ñanpi llaquicunata apashcatapish, Mandac Dios ima shina Egiptomanta llucchishcatapish paipac suegroman tucui parlarcami.

⁹ Jetroca Mandac Dios israelcunaman allitami ruhuashpa, Egiptomanta llucchishcata yachashpami yallita cushicurca.

¹⁰ Chaimantami Jetroca: —¡Mandac Diosca alli nishca cachun! Paimi cancunataca Egipto runacunapac maquimantapish, Faraonpac maquimantapish llucchirca. Paimi Egipto runacunapac maquimanta cacharichishca.

¹¹ Cunanmi, Mandac Diosca tucui dioscunamanta ashtahuan jatun cashcata yachani. Jatun tucushpa, cancunata llaquichiccunatami llaquichishca— nirca.

¹² Quipaca Moisespac suegro Jetroca animalta huañuchishpa, Diosman cushpa, tucui rupachishpami, shuctac ofrendatapish curca. Aaronpish, tucui israelcunata pushaccunapish Moisespac suegro Jetrohuan Diospac ñaupapi micungapacmi rirca.

Moisés juezcunata churashcamanta

¹³ Cayandi punzhaca Moisesca israelcunapac llaquicunata allichingapacmi tiyarirca. Israelcunaca tutamantamanta chishicaman Moisespac ñaupapi shayacurca.

¹⁴ Chashna Moisés israelcunahuan tucui imata ruhuacucta ricushpami, paipac suegroca: —Cai tucui gentecunahuanca, ¿imatatac ruhuacungui? ¿Ima nishpatac canlla cai tucuita ruhuacungui? Cai tucui gentecunaca tutamantamanta chishicamanmi cambac ñaupapi shayacun— nirca.

¹⁵ Chashna nicpimi, Moisesca paipac suegrotaca: —Cai gentecunaca Diosman tapungapacmari ñucapacman shamun.

¹⁶ Paicunaca ima llaquita charishpapish ñucaman huillangapacmi shamun. Chaimantami caishucman chaishucman Dios mandashcatapish, yachachishcatapish ricuchishpa, allichini— nirca.

¹⁷ Shina nicpimi, Moisespac suegroca: —Mana chashnachu ruhuana cangui.

¹⁸ Canpish, canhuan cac gentecunapish shaicunguichicmi. Cai ruhuanacunaca canmanca achca sinchimi. Chaimanta mana canlla ruhuai pudinguichu.

¹⁹ Ñuca cunashcata uyai. Diospish canta ayudangami. Canca israelcunamanta Dios-huan parlacmi cana cangui. Paicunapac ima llaquitaca Diosman huillai.

²⁰ Dios mandashcacunatapish, pai yachachishcacunatapish yachachishpa, ima shina causanata shinallatac imata ruhuanata yachachi.

²¹ Israelcunapuramanta Diostapish manchac, cashcata ruhuac, cullquita japinata mana yalli munac runacunata acllai. Paicunamanta shuccunataca huaranga runata, shuccunataca patsac runata, shuccunataca pichca chunga runata, shuccunataca chunga runata ricuchun churai.

²² Paicunami punzhanta ima mana alli tiyacpica allichinga. Ashtahuanpish jatun llaquicuna tiyacpimi, canman huillanga.

²³ Ñuca nishcata Dios ruhuachun nicpica, canpish samaringuimi, shinallatac israelcunapish cushicushpa paicunapac huasiman ringacunami— nirca.

²⁴ Moisesca paipac suegro nishcata uyashpami, pai nishca shinallatac tucuita ruhuarca.

²⁵ Moisesca israelcunapuramanta maijan allita ruhuac runacunata acllashpami, shuccunataca huarangata, shuccunataca patsacta, shuccunataca pichca chungata, shuccunataca chungata runata ricuchun churarca.

²⁶ Paicunami uchilla llaquicunataca punzhanta allichic carca. Cutin mana allichipac llaquicunatami Moisesman huillagric carca. Cutin uchilla llaquicunataca paicunallatacmi allichic carca.

²⁷ Moisés paita “Caya minchacaman” nicpimi, suegroca paipac llactaman cutirca.