ÉXODO 17 - Dios Rimashcata Quillcashcami

Rumimanta yacuta llucchishcamanta

¹ Mandac Dios mandashca shinallatacmi tandanacushca israelcunaca Sin shitashca pambamanta allimanta llucshirca. Shina llucshishpaca, Refidim shitashca pambaman chayashpa, carpa huasita shayachirca. Chaipica, ima yacu mana tiyarcachu.

² Chaimanta israelcunaca Moisesta rimarishpaca: —¡Ñucanchicman yacuta ubiangapac cui!— nirca. Shina nicpimi Moisesca: —¿Ima nishpatac ñucahuanca piñaringuichicyari? ¿Mandac Dios ñucanchic-huan cashcata, mana cashcatachu ricusha ninguichic?— nirca.

³ Israelcunaca yacunayaihuan cashpa, Moisesta rimashpaca: —Ñucanchicpish, huahuacunapish, animalcunapish yacunayaihuan huañuchunca, ¿imapactac Egiptomanta llucchimurcangui?— nirca.

⁴ Moisés Mandac Diosta mañashpaca: —Cai gentecunahuanca, ¿imatatac ruhuashayari? Ñucataca ñallami rumihuan shitagrin— nirca.

⁵ Chashna nicpimi, Mandac Diosca Moisestaca: —Israelcunapac ladota pasashpa, paicunata pushaccunata pushashpa, Nilo yacupi huactashca varahuan ñaupai.

⁶ Ñucaca Horeb urcu jahuapimi cambac ñaupapi casha. Can rumipi varahuan huactacpica, chaimanta yacuca llucshingami. Chaipica ubiangallami— nirca. Moisesca israelcunata pushaccunapac ñaupapimi chashna ruhuashpa ricuchirca.

⁷ Chaipi israelcuna piñarishcamantami chai pambataca «Masata» shutichirca. Shinallatac Mandac Diosta rimashpa: «¿Mandac Diosca ñucanchic-huanchu? ¿Manachu ñucanchic-huan?» nishcamantami “Meribata” shutichirca.

Amalecitacuna israelcunahuan macanacushcamanta

⁸ Refidim pambapimi amalecitacunaca israelcunahuan macanacungapac shamurca.

⁹ Chaimantami Moisesca Josuetaca: —Israelcunamanta maijancunata acllashpa amalecitacunahuan macanacungapac llucshi. Ñucaca Mandac Diospac varahuanmi caya tutamanta urcu jahuapi shuyacusha— nirca.

¹⁰ Moisés mandashca shinallatacmi Josueca amalecitacunahuan macanacungapac llucshirca. Shinallatac Moisespish, Aaronpish, Hurpish urcu jahuamanmi rirca.

¹¹ Chaipica, Moisés maquita alzacpica, israelcunami macanacushpa ati callarirca. Cutin maquita urai churacpica, amalecitacunami ati callarirca.

¹² Moisespac maqui shaicucpica, rumita churashpa, chai jahuapi tiyachishpami, Aaronca shuc maquimanta, Hurca shuc maquimanta huichaiman charicurca. Chashnami inti tigrangacaman charicurca.

¹³ Shinami Josueca amalecitacunatapish, paicunapac soldadocunatapish atishpa, espadahuan huañuchishpa tucuchirca.

¹⁴ Chaimantami Mandac Diosca Moisestaca: —Caipi ima tucushcata yuyaringapac shuc libropi quillcai. Shinallatac Josuemanca: “Amalecitacunataca tucuimi cai pachapica tucuchigrini” nishpa allita huillangui— nirca.

¹⁵ Chai quipaca Moisesca chaipi shuc altarta ruhuashpami “Mandac Diosca ñuca banderami” nishpa shutichirca.

¹⁶ Shinallatac: «Amalecitacuna Mandac Dios-huan piñarishcamantami Mandac Diosca paicunapac huahua huahuacunahuanca tucui causaipi macanacucungalla» nirca.