ÉXODO 16 - Dios Rimashcata Quillcashcami

Dios maná shuti tandata carashcamanta

¹ Israelcunaca tucui tandanacushpami, Elimmanta llucshishpaca, Sin shitashca pambaman chayarca. Chaica Elimhuan, Sinaihuan tupanacuipimi carca. Chaimanca Egiptomanta llucshishcamanta quilla chunga pichca punzhapimi chayarca.

² Tucui tandanacushca israelcuna shitashca pambapi cashpaca Moisestapish, Aarontapish piñashpa rimarircacunami.

³ Paicuna rimarishpaca: —¡Mandac Dios, cai tucui gentecunata cai shitashca pambaman apamushpa, huañuchinapac randica, Egiptollapitac huañuchishca cashpachari alli canman carca! Chaipica aicha mangacunahuan tiyarishpami, huicsa pactata micuc carcanchic— nirca.

⁴ Shina nicpimi, Mandac Diosca Moisestaca: —Israelcuna ñuca mandashcata cazushcata, mana cazushcata ricungapacca, jahua pachamantami tandata tamyachigrini. Paicunaca punzhantami micuna pactallata pallana can.

⁵ Ashtahuanpish suctaniqui punzhapica, punzha pallanamanta chaupi yallitami pallana can— nirca.

⁶ Chaimantami Moisespish, Aaronpish israelcunata rimashpaca: —Chishiyanatami Mandac Dios Egiptomanta llucchimushcataca ricunguichic.

⁷ Tutamantaca Mandac Diospac podertami ricunguichic. Mandac Diosca cancuna rimarishcataca uyashcami. Cancunaca ñucanchic pi cashcata mana yachashpami, chashna rimaricunguichic— nirca.

⁸ Moisés ashtahuan rimashpaca: —Cunan chishica aichata, caya tutamantaca tandatami huicsa pactata micuchun cunga. Mandac Diosca cancuna huashalla rimashcata uyashcami. Chashnaca mana ñucanchictachu rimashcanguichic, ashtahuanpish Mandac Diostami rimashcanguichic. Ñucanchicca, ¿pitac canchicyari?— nirca.

⁹ Chaimantami Moisesca Aarontaca: —Tucui tandanacushca israelcunataca: “Mandac Diospac cuchuman cuchuyaichic. Paica cancuna rimashcata uyashcami” ningui— nirca.

¹⁰ Tucui tandanacushca israelcunata Aarón rimacucpimi, paicunaca shitashca pambata chaparca. Chaipica Mandac Diospac sumaimana achicmi puyupi cungailla ricurirca.

¹¹ Mandac Diosca Moisestaca:

¹² —Ñucaca israelcuna rimarishcata uyarcanimi. Chaimanta paicunataca: “Cunan chishica aichata, tutamantaca tandatami huicsa pactata micunguichic. Chashnami ñucataca cancunata Mandac Dios cashcata yachanguichic” ninmi ningui— nirca.

¹³ Chishitaca codorniz animalcuna shamushpami, carpa huasicunata taparca. Cutin tutamantaca jamchi tamyami carpa huasi muyundita urmarca.

¹⁴ Jamchi tamya pasaricpica, shitashca pambapica rundu shina, ñuto nuyuclla murucunami ricurirca.

¹⁵ Israelcuna chaita ricushpa, caishuc chaishuc tapunacushpaca: —¿Imatac caica?— nircacuna. Paicunaca mana yachashcamantami chashna tapunacurca. Chaimantami Moisesca: —Caica, cancuna micuchun, Mandac Dios cushca micunami.

¹⁶ Caica, Mandac Dios cachashcami. Caitaca tucui mashna micuna pactallata pallanguichic. Carpa huasipi mashna cashcata ricushpa, cada shuc, shuc gomerta pallanguichic— nirca.

¹⁷ Moisés nishca shinallatacmi israelcunaca shuccunaca yallita, shuccunaca ashallata pallarca.

¹⁸ Gomer jundatami medishpa, cada shucman pallarca. Achcata pallacpish mana puchuchircachu, shinallatac ashallata pallacpish mana faltachircachu. Cada shucmi micuna pactallata pallarca.

¹⁹ Moisesca paicunataca: —Pipish puchutaca cayandipac ama huacaichichun— nirca.

²⁰ Ashtahuanpish maijanca Moisés nishcata mana cazushpami, puchuta cayandipac huacaichirca. Shina huacaichicpica, ashnacyashpa, curu jundashcami pacarishca carca. Chaimantami Moisesca paicunahuan piñarirca.

²¹ Micungapac pactashcallatami tucui tutamanta pallangapac llucshic carcacuna. Inti llucshishpa cunuchicpica, tucui nuyucmi carca.

²² Suctaniqui punzhapica ishcai gomer jundatami cada shucman pallarca. Chaitami maijan pushaccunaca Moisesman huillangapac shamurca.

²³ Shina huillacpimi Moisesca: —Mandac Diosca: “Cayaca Mandac Dios ñucapaclla chicanyachishca samana punzhami. Cusana tiyacpica, cunanllatac cusaichic. Imapish puchushcataca cayandipac huacaichichiclla” ninmi— nirca.

²⁴ Moisés mandashca shinallatacmi paicunaca puchushcata huacaichirca. Shina huacaichicpipish cayandi ricucpica, mana curushca, mana ashnacucchu pacarishca carca.

²⁵ Chaimantami Moisesca: —Cunanca, Mandac Diospaclla chicanyachishca samana punzhami, chaimanta micuichiclla. Cunanca imapish pambapica mana tiyangachu.

²⁶ Sucta punzhacamanmi pallai pudinguichic, ashtahuanpish canchisniqui punzhaca samana punzhami. Chai punzhapica imatapish mana taringuichicchu— nirca.

²⁷ Maijancunaca samana punzhapipish pallangapac llucshircami. Shina cashpapish, imata mana tarircachu.

²⁸ Chaimantami Mandac Diosca: —¿Ima horascamantac ñuca mandashcacunata, nishcacunataca mana cazunguichic?

²⁹ Riquichic, samana punzhataca ñuca Mandac Diosmi curcani. Chaimantami suctaniqui punzhapica ishcai punzhapac micunata curcani. Canchisniqui punzhapica pipish huasimanta mana llucshishpami, maipi tiyacushcallapitac saquirina canguichic— nirca.

³⁰ Shinami israelcunaca canchisniqui punzhapica samarirca.

³¹ Chai tandataca israelcunaca maná nishpami shutichirca. Chaica culantro muyu shina, yuracmi carca. Shinallatac abeja mishquita churashca galleta shina mishquimi carca.

³² Moisesca: —Mandac Diosca: “Ñuca Egipto llactamanta llucchishpa, shitashca pambapi carashca tandata shuc gomer jundata pallashpa, cancunapac huahua huahuacuna ricuchun huacaichichic” nishpami mandarca— nirca.

³³ Moisesca Aarontaca: —Quipa huiñaicunaman shuc gomer junda tandata puñupi pallashpa, Mandac Diospac ñaupapi huacaichichic— nirca.

³⁴ Aaronca Mandac Dios Moisesta mandashca shinallatacmi tandataca Mandac Dios mandashcata huacaichina cajón ñaupapi huacaichirca.

³⁵ Israelcuna causana llactaman chayangacamanmi chuscu chunga huatata maná shuti tandata micurca. Chaica Canaán llactaman yaicungacamanmi micurca.

³⁶ Gomer nishcaca efata chungapi chaupishcami.