ÉXODO 15 - Dios Rimashcata Quillcashcami

Moisés Mandac Diosta cantashcamanta

¹ Chaimanta Moisespish, israelcunapish Mandac Diosta cantashpaca: «Mandac Diosca caballocunatapish, caballopi ric soldadocunatapish, cuchapi shitashpami paipac poderta ricuchishca. ¡Chaimantami paita alli nisha!

² Mandac Diosca ñucata sinchiyachicmi. Ñuca cantana Diosmi. Paimi ñucata quishpichirca. ¡Paimi ñuca Dios, paitami cantasha! ¡Paimi ñuca taitapac Dios! ¡Paitami jatunyachisha!

³ Mandac Diosca jatun macanacucmi. ¡Paipac shutica Mandac Diosmi!

⁴ Faraonpac alli soldadocunatapish, carretacunatapish cuchapi shitarcami. Puca Cuchapi ucuyachircami.

⁵ ¡Rumi shinami cuchapi ucuyarca! Achca ucu yacumi paicunata taparca.

⁶ Mandac Dioslla, cambac alli maquica jatun poderyuc sinchi maquimi. Mandac Dioslla, cambac maquihuanmi piñaccunataca tucuchircangui.

⁷ Cambac poderhuanmi canta piñaccunata tucuchircangui. Can piñarishpaca chaquishca pangata shinami tucuchircangui.

⁸ Can pucushca samaihuanmi yacuca ishcai ladoman tandarirca. Huacyacuc mama cuchaca mana cuyurishpami casilla saquirirca. Ucu cuchaca rumi shinami saquirirca.

⁹ Ñucanchicta piñaccunaca: “Cati rishpa japishunmi, paicunamanta quichushpa, chaupinacushpa cushicushunmi. Espadata llucchishpami, ñucanchic maquihuan tucuchishun” nircami.

¹⁰ Mama cuchata pucushpami, paicunata tucuita taparcangui. ¡Llashac plomo shinami, timbucuc yacupica ucuyarca!

¹¹ Mandac Dioslla, ¿pitac can shinaca tiyanyari? Can shina jucha illac Dios shinaca, ¿pitac tiyanyari? Mancharinacunata ruhuashcamanta alli nina Diosca, ¿pitac tiyanyari? Canca sumaimanata ruhuacmi cangui.

¹² Cambac alli maquita chutacpica, allpapish millpurcami.

¹³ Can llucchishca gentecunata cuyaihuanmi pushangui. Cambac jucha illac llactamanmi cambac poderhuan pushangui.

¹⁴ Gentecunaca chaita uyashpaca chucchungami. Filisteocunaca yallita manchangami.

¹⁵ Edom llactata mandaccunaca yuyai illacmi tucunga. Sinchi Moab gentecunapish manchaihuan chucchungami. Canaanpi causaccunaca mancharishpami imata mana ruhuai pudinga.

¹⁶ Mandac Dioslla, paicunataca manchaipish, chucchuipish japingami. Cambac sinchi maquihuan ruhuashcata ricushpa rumi shina upami saquiringa. Chashnami can acllashcacuna pasangacaman saquiringa.

¹⁷ Mandac Dioslla, can cushca urcuman chayachishpami, tarpuc shina churangui. Can causangapac allichishca llactamanmi chayachingui. Cambac maquihuan shayachishca sumac huasimanmi pushangui.

¹⁸ Mandac Diosca huiñaita mandacungallami» nirca.

Moisespac pani María cantashcamanta

¹⁹ Jatun mandac Faraón carretacunahuan, caballopi ric soldadocunahuan yacuta pasacucpimi, Mandac Diosca cucha yacuta cutichimushpa, tucuita ucuyachirca. Cutin israelcunaca cucha chaupitami chaquishca allpata shina pasarca.

²⁰ Chaimantami Aaronpac pani, Dios ima nishcata huillac Mariaca panderota japishpa, huactai callarirca. Shina huactacpica, shuctac huarmicunapish cantashpa, danzashpami catirca.

²¹ Chashna cantashpami Mariaca: «¡Mandac Diosta cantaichic! ¡Paipac poderta ricuchishpami, carretacunapish, caballocunapi ric soldadocunatapish, cuchapi ucuyachirca!» nirca.

Jayac yacumanta

²² Moisés israelcunata Puca Cuchamanta pushacpica, shitashca Shur pambamanmi rirca. Chaipi quimsa punzhata, maipi yacuta mana tarishpa puricushpami, Mara pambaman chayarca.

²³ Chaiman chayashpapish Mara yacu jayac cashcamanta, mana ubiai pudishpami, Marata shutichirca.

²⁴ Chaimantami israelcuna piñarishpa, Moisestaca: —¿Ima yacutatac ubiashun?— nishpa rimarirca.

²⁵ Chaimantami Moisesca Mandac Diosta caparishpa mañarca. Shina mañacpica, Mandac Diosca shuc yuratami ricuchirca. Moisés chai yurata yacupi shitacpica, yacuca mishquiyarcami. Chaipimi Mandac Diosca pai mandashcacunatapish, quillcashcacunatapish curca. Shinallatac cazucta, mana cazuctapish ricurcami.

²⁶ Chaimantami paica: —Cancunapac Mandac Dios ñuca nishcata alli uyashpa, ñucapac ñaupapi imatapish cashcata ruhuashpa, mandashcacunata tucui shunguhuan uyashpa, tucuita ruhuacpica, Egiptoman cachashca shina ungüitaca cancunapacmanca manatac cachashachu. Ñucaca cancunata jambic Mandac Diosmi cani— nirca.

²⁷ Chaimantaca Elim pambamanmi chayarca. Chaipica chunga ishcai tucyac yacupish, canchis chunga ramos yurapishmi tiyarca. Chai yacu ladopimi carpacunata shayachishpa tiyarca.