ÉXODO 11 - Dios Rimashcata Quillcashcami

Punta churicunata huañuchinata huillashcamanta

¹ Mandac Diosca Moisestaca: —Faraontapish, Egiptopi causaccunatapish yallita llaquichinaracmi cani. Chashna llaquichicpimi cacharinga. Ashtahuanpish paillatacmi llucchishpa cachanga.

² Chaimanta israelcunataca vecinocunaman, vecinacunaman curimanta, cullquimanta ruhuashca alajacunata mañachun mandai— nirca.

³ Mandac Diosca israelcuna mañashcata cuchunmi, Egipto runacunamanca cuyac shunguta curca. Moisespish tucui Egipto llactapi alli nishcami carca. Faraonta serviccunapacpish, tucui gentecunapacpish alli nishcami carca.

⁴ Moisesca Faraontaca: —Mandac Diosca: “Chaupi tuta shinatami Egipto llacta chaupita pasasha.

⁵ Chashna pasacpica, Egipto llactapi tucui punta churicunami huañunga. Faraón tiyarinapi tiyac churimanta callarishpa, rumipi cutac huarmicunapac punta cari huahuacamanmi huañunga. Punta huacharishca animalcunapish huañungami.

⁶ Chaimantami tucui Egipto llactapi causaccuna caparishpa huacanga. Chashna llaquica jaicapi mana tiyashcachu, shinallatac quipamanpish mana tiyangachu.

⁷ Chashna cacpipish, israelcunapurapica allcullapish animalcunata, gentecunata sintishpa, mana ladrangachu. Chaica, Mandac Dios ñucaca Egipto runacunamanta israelcunata chicanyachic cashcata yachachunmi cashnaca tucunga” ninmi.

⁸ Chaimantami tucui canta serviccunaca ñucapac ñaupapi cungurishpa: “Canpish, tucui canta caticcunapish llucshishpa richic” ninga. Chai quipaca ñucapish rishallami— nirca. Shina nishpami, Moisesca yallita piñarishpa, Faraonpacmanta llucshirca.

⁹ Chaimantami Mandac Diosca Moisestaca: —Faraonca manatac uyangachu. Chaica, Egiptopi ñucaca ashtahuan mancharinacunata ruhuashpa ricuchichunmi cashnaca tucunga— nirca.

¹⁰ Moisespish, Aaronpish Faraonpac ñaupapi mancharinacunatami ruhuashpa ricuchirca. Mandac Diosllatac Faraonpac shunguta sinchiyachicpimi, israelcunataca chai llactamanta mana cacharirca.