ESTER 9 - Dios Rimashcata Quillcashcami

Judá gentecunaca, paicunata piñaccunata tucuchishcamanta

¹ Chunga ishcai Adar quilla chunga quimsa punzhapimi, jatun mandac mandashpa quillcashcata pactachina carca. Ashtahuanpish Judá gentecunata piñaccuna sinchita mandai callarina punzhapica Judá llacta gentecunami paicunata piñaccunata mandai callarirca.

² Judá gentecunaca paicunata llaquichigricuc gentecunahuan macanacungapacmi jatun mandac Asuero mandacuc tucui llactacunapi paicuna causacuc pueblocunapi tandanacurca. Tucui llactacunapi causaccunami paicunataca yallita mancharcacuna. Chaimantami paicunahuan macanacunataca pipish mana pudirca.

³ Llactacunapi tucui mandaccunapish, sátrapas nishca mandaccunapish, jatun mandacta serviccunapish Mardoqueota yallita manchashpami Judá gentecunata ayudarcacuna.

⁴ Jatun mandac mandana huasipica Mardoqueomi tucuimanta yalli alli mandac carca. Paica tucui llactacunapimi ricsishca carca. Punzhantami ashtahuan ashtahuan alli nishca tucurca.

⁵ Judá gentecunaca tucui paicunata piñaccunata espadahuan huañuchishpa, tucui tucuchishpami paicuna munashcata ruhuashpa llaquichircacuna.

⁶ Judá gentecunaca jatun mandac mandacuc Susa pueblopica pichca patsac runacunatami huañuchishpa tucuchirca.

⁷ Chaipica Parsandata, Dalfón, Aspata,

⁸ Porata, Adalía, Aridata,

⁹ Parmasta, Arisai, Aridai, Vaizata runacunami carca. Tucui paicunatami huañuchirca.

¹⁰ Chai chunga runacunaca Judá gentecunata piñac Amanpac churicunami carca. Amanca Hamedatapac churimi carca. Chashna huañuchishpapish paicuna ima charishcataca mana japircacunachu.

¹¹ Chai punzhallatacmi jatun mandac Asueroca pai mandacuc Susa pueblopi mashna huañushcata yachac chayarca.

¹² Chaita yachashpami jatun mandac Estertaca: —Judá gentecunaca ñuca mandacuc Susa jatun pueblopi pichca patsac runacunata, Amanpac chunga churicunatapish huañuchishpaca, ¡ñuca mandacuc caishuc llactacunapicarin imatachari ruhuarcacuna! Chaimanta ¿Imatatac mañangui? Imata mañacpipish cushallami. ¿Imatatac ashtahuan ruhuachun ningui? Imata ruhuachun nicpipish ruhuashallami— nirca.

¹³ Shina nicpimi Esterca: —Can jatun mandacman alli cacpica, cunan punzha mandashcata Susa pueblopi causac Judá gentecuna ruhuashca shinallatac cayaca Amanpac chunga churicunata caspipi huarcuchun mandai— nirca.

¹⁴ Shina nicpimi, jatun mandacca Susa jatun pueblopica chashna ruhuashca cachun nirca. Chaimantami chai chunga churicunataca huarcurcacuna.

¹⁵ Susa pueblopi causac Judá gentecunaca Adar quilla chunga chuscu punzhapimi cutin tandanacushpa Susa pueblopi causaccunataca quimsa patsac runacunata huañuchirca. Shina huañuchishpapish paicuna ima charishcacunataca mana japircacunachu.

Purim fiestamanta

¹⁶ Jatun mandac mandacuc llactapi causac caishuc Judá gentecunapish paicunata huañuchishun niccunahuan macanacungapacmi tandanacurca. Paicunata piñaccunataca canchis chunga pichca huarangatami huañuchirca. Chashna huañuchishpami pipish ashtahuan mana llaquichishca cushilla causarcacuna. Shina huañuchishpapish paicuna ima charishcacunataca mana japircacunachu.

¹⁷ Chai macanacuica Adar quilla chunga quimsa punzhapimi carca. Cayandi chunga chuscu punzhapica jatun micuita ruhuashpami cushicushpa samarircacuna.

¹⁸ Cutin Susa pueblopi causac Judá gentecunaca chai quillallapitac chunga quimsa punzha, chunga chuscu punzhacunapimi tandanacurca. Chai cayandi chunga pichca punzhapica jatun micuita ruhuashpami cushicushpa samarircacuna.

¹⁹ Chaimantami uchilla llactacunapi tiyac, muyundita mana pircashca uchilla pueblocunapi causac Judá gentecunaca Adar quilla chunga chuscu punzhapi jatun micuita ruhuashpa, ladollapi causaccunaman ima charishcacunata carashpa yallita cushicuncuna.

²⁰ Mardoqueoca tucui chaicunatami quillcashpa jatun mandac Asuero mandacuc tucui llactacunapi cuchullapi causac, carupi causac Judá gentecunaman cacharca.

²¹ Chai quillcacunapica Adar quilla chunga chuscu punzhapipish, chunga pichca punzhapipish huatanta fiestata ruhuachunmi mandashpa cacharca.

²² Chai punzhacunapimi Judá gentecunaca paicunata piñaccunamanta quishpirishpa samarirca. Chai quillapimi llaquilla caccunaca cushilla tucurca. Huacaihuan caccunaca cushicushpa fiestata ruhuarca. Chai punzhata yuyarishpa jatun micuita ruhuashpa cushicuchun, ladollapi causaccunaman, imata mana chariccunaman ima charishcacunata caranacuchunmi mandashpa cacharca.

²³ Judá gentecunaca Mardoqueo quillcashpa mandashcata cazushpa paicuna ruhuai callarishcata ruhuashpa catingapacmi ari nircacuna.

²⁴ Agageopac huahua huahuapuramanta Hamedatapac churi tucui Judá gentecunata piñac Amanmi Judá gentecunata ima punzha huañuchingapac Pur nishca suerteta ruhuashca carca.

²⁵ Shina cacpipish Ester jatun mandacpac ñaupaman ricpica Judá gentecunata llaquichishpa jatun llaquita ruhuachun saquinapac randica, chai llaqui paillamantac urmachunmi shuc quillcata cacharca. Shinallatac paitapish, paipac churicunatapish huarcushpa huañuchichunmi mandarca.

²⁶ Pur nishca suerteta ruhuashcamantami chai punzhacunataca Purim nishpa shutichirca. Chashnallatac ima shina quillcashpa cachashcamanta, caicunata paicuna yachashcamanta, paicuna causacushca punzhacunapi ima tucushcata ricushcamantami,

²⁷ Judá gentecunaca chai ishcai punzhacunapica paicunaman quillcashca shinallatac paicunapac huahua huahuacunamanpish, paicunapura tandanacushcamanpish, mana cungarishpa pactachingapac, shinallatac ima punzhacunapi ruhuana cashca shinallatac huatanta ruhuangapacmi ari nircacuna.

²⁸ Cai Purim punzhacunataca tucui huahua huahuacunapish, familiacunapish mai llactacunapi, mai pueblocunapi causaccunapish mana cungarishpami Judá llactapi causaccunaca huatanta yuyarishpa pactachina can.

²⁹ Abihailpac ushi jatun mandac Esterpish, Judá llactamanta Mardoqueopish Purim nishca punzhacunata mana cungarishpa yuyarichunmi cutin mandashpa cai quipa quillcata quillcarcacuna.

³⁰ Mardoqueoca jatun mandac Asuero mandacuc patsac ishcai chunga canchis llactacunapi causac Judá gentecunamanmi cushi causai tiyana shimicunahuan, cashcata nic rimaicunahuan sumacta quillcashpa cacharca.

³¹ Chai shinami quillcacunapica Judamanta Mardoqueopish, jatun mandac Esterpish mandashca shinallatac ima punzhacuna Purim nishca punzhacunata yuyarichunmi mandashpa quillcarca. Shinallatac mana micushpa, llaquilla cana punzhacunapi ima shina cana cashcata paicunapish, paicunapac huahua huahuacunapish yuyarachunmi mandarca.

³² Chashnami Esterca Purim nishca punzhata yuyarishpa causachun mandarca. Tucui caicunaca shuc libropimi quillcashca saquirirca.