ESTER 4 - Dios Rimashcata Quillcashcami

Amán imata ruhuagricushcata Ester yachai chayashcamanta

¹ Mardoqueoca tucui chaicunata yachashpami, paipac churanata lliquishpa sharpa churanata churarishpa, uchupahuan cahuirishpa, yallita llaquirishpa, caparishpa huacashpa pueblopi puricurca.

² Chashnami Mardoqueoca jatun mandacpac pungucaman shamurca. Jatun mandacpac ucumanca sharpa churanata churarishcaca mana yaicunachu carca.

³ Jatun mandac imata ruhuachun nishpa quillcashca tucui llactacunaman chayacpimi, Judá llacta gentecunaca yallita llaquirishpa, mana micushpa, yallita huacarcacuna. Achcacunami sharpa churanata churarishpa, uchupata mandashpa siricurcacuna.

⁴ Esterta servic carihuan manarac chayarishca solteracunapish, paita cuidac eunuco runacunapish chaipi ima tucucushcatami shamushpa huillarcacuna. Shina huillacpimi, jatun mandac Esterca yallita llaquirishpa, Mardoqueo sharpa churanata llucchichishpa, allita churachichun cacharca. Ashtahuanpish Mardoqueoca mana uyarcachu.

⁵ Chaimantami Esterca, paita servichun jatun mandac churashca eunucopuramanta Hatacta cayarca. Chai runatami Esterca imamanta Mardoqueo chashna puricushcata tapuchun cacharca.

⁶ Shina cachacpimi, Hatacca jatun mandacpac huasi chimbapurapi cac plazapi Mardoqueo tiyacucpi tapungapac rirca.

⁷ Chaipimi, Mardoqueoca ima tucushcatapish, shinallatac Amán, Judá llacta gentecunata tucuchingapac, jatun mandacpac huacaichinapi huacaichichun cullquita pezashpa cusha nishcatapish huillarca.

⁸ Shinallatac Judá gentecunata tucuchichun Susa pueblopi quillcashpa tucuiman cushca copiatapish Esterman cushpa huillachunmi curca. Shinallatac Ester, jatun mandacpacman rishpa paipac llacta gentecunata ama huañuchichun, parlachunmi mañarca.

⁹ Hatac cutimushpaca, Mardoqueo nishcatami tucui Esterman huillarca.

¹⁰ Shina huillacpimi, Esterca Hatactaca Mardoqueopacman cutin rishpa:

¹¹ «Maijan cari cashpa, huarmi cashpa, jatun mandac manapish cayacpi jatun mandacta ricungapac ucuman yaicucpica, huañunami can nishpa mandashcami tiyan. Mana cashpaca, jatun mandac paipac curi varata ñaupaman chutashpa ricuchicpimi mana huañunga. Chaitaca jatun mandacta serviccunapish, jatun mandac mandacuc tucui llactacunapi causaccunapish yachanmi. Ñuca, pai jatun mandacta ricungapacca cai quillaca mana cayashcachu cani» nichunmi cacharca.

¹² Ester ima nishcata Mardoqueoman huillacpica,

¹³ Paica Estertaca: «Jatun mandacpac huasipi cashpaca Judá llacta gentecuna shina mana huañushachu nishpa pacta yuyacunguiman.

¹⁴ Can ñucanchicmanta cunan punzhacunapi imata mana ruhuashpa, upalla saquiricpica, maijan shucmi Judá llactapi causaccunataca quishpichinga. Shina cacpipish canca cambac taitapac huasi ucupurandimi huañunguichic. Canca cai llaquimanta ñucanchicta quishpichingapac jatun mandac tucushcataca ¿pitac yachanyari?» nichunmi cacharca.

¹⁵ Shina nicpimi, Esterca Mardoqueomanca:

¹⁶ «Cai Susa pueblopi causac Judá gentecunata tandachic. Shina tandanacushpa ñucamanta quimsa punzha, quimsa tutata mana micushpa mana ubiashpa ayunaichic. Ñucapish, ñucata servic carihuan manarac chayarishca solteracunapish chashnallatacmi ruhuashun. Chai quipami jatun mandac-huan parlangapac rigrini. Mandashcapi chaiman mana yaicunachu nicuchunpish, ñucata huañuchina cacpipish rigrinimi» nichunmi cacharca.

¹⁷ Shina nicpimi, Mardoqueo rishpaca, Ester mandashca shinallatac tucui ruhuarca.