ESTER 3 - Dios Rimashcata Quillcashcami

Amán Judá llactapi causaccunata huañuchisha nishcamanta

¹ Chai tucushca quipaca jatun mandac Asueroca Agageopac huahua huahuapuramanta Hamedatapac churi Amantami alli nishpa tucui mandaccunamanta ashtahuan yalli mandanapi churarca.

² Jatun mandacpac huasi pungupi cuidac tucui serviccunami Amanpac ñaupapi cungurishpa cumurircacuna. Chaitaca jatun mandacllatacmi mandashca carca. Ashtahuanpish Mardoqueoca cai mandashcataca mana cazurcachu.

³ Chaimantami jatun mandacta servishpa, pungupi cuidaccunaca Mardoqueotaca: «¿Ima nishpatac jatun mandac mandashcata mana cazungui?» nishpa tapurca.

⁴ Punzhanta chashna rimacucpipish Mardoqueoca mana cazurcachu. Paica Judá llactamanta cashcataca ñami huillashca carca. Chaimantami, Mardoqueoca pai nishcata pactachinchu imami nishpa Amanman huillarcacuna.

⁵ Amanca paipac ñaupapi mana cunguricta, mana llaquiricta ricushpami, Mardoqueohuanca yallita piñarirca.

⁶ Shina piñarishpapish Mardoqueollatac llaquichinataca mana munarcachu. Ashtahuanpish jatun mandac Asuero mandacuc llactacunapi causac tucui Judío gentecunatami huañuchinata yuyarirca.

⁷ Nisán nishca callari quillapi jatun mandac Asuero chunga ishcai huatata mandacucpimi, Pur nishca suerteta ruhuarca. Chaica Judá llacta gentecunata ima punzha, ima quilla, ima huata Amanpac ñaupapi huañuchinata yachangapacmi chashna suerteta ruhuarca. Chai suerteca Adar nishca chunga ishcai quillapimi urmarca.

⁸ Chaimantami Amanca jatun mandac Asuerotaca: —Can mandacuc tucui llactacunapi causaccunapurapimi cacpi, chaipi chican chican causac gentecuna tiyan. Shinallatac paicunapac mandashcacunapish shuctac llactacunahuan ricucpica, chicanmi. Jatun mandac mandashcacunatapish mana cazuncunachu. Can jatun mandac paicunata causachun saquishpaca ima allita mana ruhuanguichu.

⁹ Can jatun mandacman alli cacpica, tucui paicunata tucuchichun shuc mandashcata quillcai. Chashna ruhuacpica, ñucaca jatun mandacpac mandana huasipi huacaichichunmi chunga huaranga talento cullquita cusha— nirca.

¹⁰ Shina nicpimi, jatun mandacca paipac sortejasta llucchishpa, Judá gentecunata piñac Agageopac huahua huahuapuramanta Hamedatapac churi Amanman curca.

¹¹ Paitaca: —Ñucaman cusha nicushca cullquitaca canllatac japilla. Shinallatac gentecunatapish can munashcata ruhuailla— nirca.

¹² Shina nicpimi, Amanca huata callari quilla chunga quimsa punzhapi jatun mandacpac quillcaccunata cayarca. Jatun mandac churashca sátrapas nishca mandaccunata, tucui llactapi soldadocunata mandaccunata, tucui gentecunata mandaccunata Amán mandashca shinallatacmi tucui llactapi ima shina quillcanata yachashca shinallatac tucui gentecunapac rimaipi quillcachirca. Jatun mandac Asueropac shutipi quillcashpami, jatun mandacpac sortejas-huan sellarca.

¹³ Chai quillcacunataca jatun mandac mandacuc tucui llactacunamanmi quillcata apaccunaman cushpa cacharca. Chai quillcapica cunan huiñaicunata, yuyaccunata, huahuacunata, huarmicunatapish shuc punzhallapi tucuita huañuchishpa, paicunapac charishcata apamuchunmi mandashca carca. Chaitaca Adar nishca chunga ishcai quilla chunga quimsa punzhapi chashna ruhuachunmi mandashca carca.

¹⁴ Utcashpa allichirishca cachunmi tucui llactacunapi chai mandashcacunata gentecunaman huillachun cacharca.

¹⁵ Jatun mandac mandacpimi, quillcata apaccunaca utca llucshirca. Chai mandashcataca llactata mandana Susa pueblopimi quillcarca. Chai quipami jatun mandac-huan, Amanhuanca ubiangapac tiyarirca. Ashtahuanpish Susa pueblopi causaccunaca yallitami mancharirca.