ESTER 2 - Dios Rimashcata Quillcashcami

Esterta jatun mandac cachun churashcamanta

¹ Chashna ruhuashca quipami, jatun mandac Asueroca rabiata pasachishpa Vasti huarmita ima ruhuashcata, paita llaquichingapac quillcashcatapish yuyarirca.

² Chashna cacpimi, paipac huasipi serviccunaca: «Jatun mandacman carihuan manarac chayarishca shuc sumac ñahui solterata mashcachun.

³ Can mandacca tucui can mandacuc llactacunapi carihuan manarac chayarishca sumac ñahui tucui solteracunata apamuchun, shuc runacunata acllai. Chai runacunami can jatun mandac causacuc Susa pueblopi tiyac cambac huarmicuna causana huasiman pushamunga. Chaipica chai solteracunataca can jatun mandacpac huarmicunata cuidac Hegai eunucomi cuidashpa sumacta allichinga.

⁴ Carihuan manarac chayarishca maijan shuc soltera jatun mandacpac ñaupapi alli ricuric solterami Vasti huarmipac randi mandac tucunga» nircacuna. Paicuna cunashca alli cacpimi, jatun mandacca chashnallatac ruhuarca.

⁵ Jatun mandac causana Susa pueblopica Judá llactamanta Benjaminpac aillupuramanta Mardoqueomi causarca. Paica Jairpac churi, Jairca Semeipac churi, Semeica Cispac churimi carca.

⁶ Mardoqueoca Babilonia llactata jatun mandac Nabucodonosor Judá llacta Jerusalén pueblomanta prezu apashcapurami carca. Paitami Judá llactata jatun mandac Jeconias-huan pacta prezu apashca carca.

⁷ Mardoqueoca paipac tiopac ushi Hadasa nishca Estertami taita mama illac cacpi huiñachirca. Esterca cunan huiñai alli ñahui sumac solterami carca. Esterpac taita, mama huañucpimi, Mardoqueoca quiquin ushita shina huiñachirca.

⁸ Jatun mandac mandashpa quillcashca tucui llactacunapi uyaricpica, jatun mandac causana Susa pueblopimi carihuan manarac chayarishca achca solteracunata tandachirca. Paicunataca Hegaimi cuidacurca. Estertapish huarmicunata cuidac Hegai cuidachunmi jatun mandacpac huasiman pusharca.

⁹ Ester soltera Hegaipac ñaupapi alli ricuricpimi, yallita alli nishpa, sumac churanacunahuan paitarac allichishpa, micunatapish cararca. Shinallatac paita ricuchunca, carihuan manarac chayarishca ashtahuan alli canchis solteracunatami acllarca. Esterca carihuan manarac chayarishca solteracunahuanmi jatun mandacpac huarmicuna causana ashtahuan alli ucuman pusharca.

¹⁰ Esterca maimanta, cashcatapish maijan familia cashcatapish mana huillarcachu. Chaitaca Mardoqueomi ama huillanguichu nishpa mandashca carca.

¹¹ Mardoqueoca Ester ima shina cacta, ima tucucta ricungapacmi punzhanta huarmicuna causana huasi pungu pambapi puricurca.

¹² Chai tucui huarmicunatami mandashcapi nishca shinallatac shuc huatacaman sumacta allichina carca. Sucta quillataca mirrahuan, aceitehuan, caishuc sucta quillataca mishquilla ashnacuc jambicunahuan, huarmicuna churarina mishquilla ashnacuc-huanmi allichina carca. Ña huata tucucpica, jatun mandac Asueropac ñaupamanmi cada shuc solteracuna ric carca.

¹³ Chashnami carihuan manarac chayarishca solteracunaca huarmicuna causana huasimanta jatun mandacpac huasiman ric carcacuna. Chaiman ringapacca chai soltera allichiringapac imata mañashcatami cuc carca.

¹⁴ Jatun mandacpac huasiman chishi shamushpaca, cayandi tutamantami huarmicuna tiyacuc huasiman cutic carca. Jatun mandacta alli servic, mandacpac caishuc huarmicunata cuidac Saagazmi pushashpa ric carca. Chashna rishpaca mana ashtahuan jatun mandacpacman cuti pudicchu carca. Jatun mandac maijanta shamuchun nicllapimi, shutipi cayashpa pushamuc carca.

¹⁵ Esterca Mardoqueopac tio Abihailpac ushimi carca. Mardoqueomi paipac ushita shina huiñachirca. Esterca jatun mandacpacman rina chayacpica, imata mana ruhuarcachu, ashtahuanpish jatun mandacpac huarmicunata cuidac Hegai eunuco mandashcallatacmi ruhuarca. Esterca tucui paita ricuccunapac ñaupapica tucuita atishpa allimi ricurirca.

¹⁶ Jatun mandac Asuero canchis huatata mandacucpimi, Tebet nishca chunga quillapi Estertaca jatun mandacpacman pushamurca.

¹⁷ Jatun mandacca Estertaca tucui huarmicunamanta yallimi ashtahuan cuyarca. Esterca carihuan manarac chayarishca, tucui solteracunamanta yalli allimi jatun mandacpac ñaupapica ricurirca. Chaimantami paitaca jatun mandaccuna churarina coronata paipac umapi churachishpa, Vasti huarmipac randi jatun mandac cachun churarca.

¹⁸ Chai quipami jatun mandacca Esterta alli nishpa pai churashca tucui mandaccunamanpish, paita serviccunamanpish jatun micuita ruhuarca. Shinallatac llactacunapica impuestotami ashallata pagachun nirca. Jatun mandac cashcamantami ima allicunatapish mana llaquirishpa achcata paicunaman curca.

Mardoqueo jatun mandacpac causaita quishpichishcamanta

¹⁹ Carihuan manarac chayarishca solteracunata cutin tandachicpimi, Mardoqueoca jatun mandacpac huasi pungupi tiyacurca.

²⁰ Esterca Mardoqueo mandashca shinallatacmi maimanta cashcatapish, maijan familiamanta cashcatapish mana huillarca. Esterca Mardoqueo alli yachachishca cashpami pai nishca shinallatac ruhuarca.

²¹ Chai punzhacunapi jatun mandacpac pungupi Mardoqueo tiyacushpami pungupi cuidac Bigtán, shinallatac Teres eunuco runacuna yallita piñarishpa, jatun mandac Asuerota huañuchingapac huashalla parlanacucta uyarca.

²² Chaita Mardoqueo uyashpami jatun mandac Esterman huillarca. Cutin Esterca Mardoqueomi huillan nishpami jatun mandac Asueroman huillarca.

²³ Chaita huillacpimi, jatun mandacca paita ciertotac huañuchisha nicushcata alli tapurca. Chai quipaca huañuchisha nicushca chashnatac cacpimi, chai ishcai eunuco runacunataca sipishpa huañuchirca. Chashna tucushcataca jatun mandac imata ruhuashcata quillcashca libropimi quillcashca saquirirca.