ESTER 1 - Dios Rimashcata Quillcashcami

Jatun mandac Vasti huarmi jatun mandac Asuerota mana cazushcamanta

¹ Jatun mandac Asueroca India llactamanta, Etiopía llactacamanmi patsac ishcai chunga uchilla llactacunata mandacurca.

² Jatun mandac Asuero jatun mandaccuna causana Susa pueblopimi mandacurca.

³ Quimsa huatata mandacushpami paipac quipa mandaccunaman, paita serviccunaman shuc jatun micuita ruhuarca. Chaipica Persia llactamanta, Media llactamanta macanacuc sinchi runacuna, shuctac mandaccuna shinallatac, llactata mandaccunami paihuan carca.

⁴ Pai mandacuc llactaca sumac cashcata, pai sinchita mandacushcata ricuchingapacmi patsac pusac chunga punzhacunata jatun cushicuita ruhuarca.

⁵ Chai punzhacuna quipami pai mandana huasi canzhapi canchis punzhata Susa pueblopi causac alli nishca gentecunamanpish, yangalla gentecunamanpish jatun micuita ruhuarca.

⁶ Canzha pambaca yurac, verde, azul sumac pañocunahuan huarcushca, sumacta allichishcami carca. Chai pañotaca lino puchcahuan, yana puca puchcahuan, cullqui argollapi churachishpa mármol pilarcunapi huarcushcami carca. Curi tiyarinacunapish tiyarcami. Shinallatac pambapish sumac alabastro, jacinto yurac yana rumicunahuan ruhuashcami carca.

⁷ Jatun mandaccuna ima shina ubiac cashca shinallatacmi vinotaca chican chican curi vasocunapi mana misashpa yallita ubiachicurca.

⁸ Jatun mandacca chai serviccunataca: “Ubiachunca pitac ama mandanguichicchu, ashtahuanpish paicuna munashca shina saquinguichic” nishpami mandashca carca.

⁹ Cutin jatun mandac Vasti huarmipish jatun mandac Asuero mandana huasipimi chai mandaccunapac huarmicunaman, jatun micuita ruhuarca.

¹⁰ Ña canchis punzha tucucpimi, jatun mandac Asueroca vinota ubiashpa, shungupi yallita cushicuihuan cashpa, paipac ñaupapi servishpa causac eunuco runacunataca: Mehumanta, Biztata, Harbanata, Bigtata, Abagtata, Zetarta shinallatac Carcasta cayarca.

¹¹ Jatun mandac Vasti huarmita jatun mandacpac coronata churachishpa, paipac ñaupaman, chaipi cac gentecunapish, caishuc mandaccunapish pai sumac cashcata ricuchunmi pushamuchun cacharca. Chai huarmica alaja sumaimanami carca.

¹² Ashtahuanpish jatun mandac Vasti huarmica eunuco runacunata jatun mandac Asuero pushamuchun cachashca cacpipish mana risha nircachu. Chaimantami jatun mandacca yallita piñarirca.

¹³ Shina piñarishpami punzhacuna imalaya cagricucta ricuc alli yachaccunaman jatun mandac ruhuac cashca shinallatac jatun mandac mandashcacunatapish, ima ruhuanatapish tapuchun cacharca.

¹⁴ Jatun mandacpac yallita ricsishcacunaca Carsena, Setar, Admata, Tarsis, Meres, Marsená shinallatac Memucán canchis mandaccunami paipac ladopi carca. Paicunaca jatun mandacpac alli ricsishca, jatun mandana huasipipish alli nishca Persia, Media llactata mandaccunami carca.

¹⁵ Paicunatami Jatun mandacca: —Mandashcapi nishca shinaca eunuco runacunata jatun mandac Asuero pushamuchun cachacpipish Vasti huarmi mana cazushcamantaca ¿imatatac ruhuana can?— nishpami tapurca.

¹⁶ Chashna tapucpimi Memucanca jatun mandacpac ñaupapi, caishuc mandaccunapac ñaupapi rimashpaca: —Jatun mandac Vasti huarmica cai mana allita ruhuashpaca, mana jatun mandacllatacchu llaquichishca, ashtahuanpish tucui mandaccunatapish, jatun mandac Asuero mandacuc tucui llactacunapi causaccunatapish llaquichishcami.

¹⁷ Ashtahuanpish jatun mandac huarmi chashna ruhuashcaca tucui huarmicunamanmi yacharinga. Chashna yachashpaca paicunapish: “Jatun mandac Asuero jatun mandac huarmita pushamuchun cachacpipish paica mana cazushcachu” nishpami paicunapac cusacunataca yangapimi churanga.

¹⁸ Jatun mandac huarmi chashna ruhuashcata Persia, Media llactacunata mandaccunapac huarmicuna ima punzha yachashpaca jatun mandac churashca mandaccunatapish chashnallatacmi ningacuna. Chashna mana cazucpica yalli piñanacuimi tiyanga.

¹⁹ Chaimanta can jatun mandacman alli ricuricpica, can jatun mandac shuc mandashcata quillcashpa: “Jatun mandac Vasti huarmica jatun mandac Asueropac ñaupaman ama ashtahuan shamuchun” nishpa mandai. Shinallatac can jatun mandacca chai huarmipac randica shuc ashtahuan alli huarmita jatun mandac huarmi cachun churai. Chai mandashca ama yanga cachunca Persia, Media llactata mandaccunamanpish quillcangui.

²⁰ Jatun Mandac can mandashpa quillcashcataca can mandana tucui llactapimi uyangacuna. Can mandana llacta jatun cacpipish tucui llactapimi uyaringa. Shina cacpimi, tucui huarmicunaca paicunapac cusacunata alli nishca cacpipish, yangalla nishca cacpipish cazungacuna— nirca.

²¹ Jatun mandacpac yuyaipipish, caishuc mandaccunapac yuyaipipish Memucán nishcaca allimi carca. Chaimantami jatun mandacca Memucán nishca shinallatac ruhuarca.

²² Chashnami jatun mandacca pai tucui llactacunapi tiyac uchilla llactacunaman, pueblocunaman paicunapac quiquin quillcacunahuan quillcashca shinallatac quiquin rimaipi quillcashpa cacharca. Chai quillcapica, tucui cusaccunami cancunapac huasipica alli cazuchina canguichic. Chaitaca tucui llactacunapi causaccunapac rimaipimi huillana canguichic nishpami cacharca.