ESDRAS 7 - Dios Rimashcata Quillcashcami

Esdras Jerusalenman cutimushcamanta

¹ Jatun mandac Artajerjes, Persia llactata mandacui punzhacunami Seraiaspac churi Esdras curaca Babilonia llactamanta chayamurca. Seraiasca Azariaspac churi, Azariasca Hilciaspac churi

² Hilciasca Salumpac churi, Salumca Sadocpac churi, Sadocca Ahitobpac churi,

³ Ahitobca Amariaspac churi, Amariasca Azariaspac churi, Azariasca Meraiotpac churi,

⁴ Meraiotca Zeraiaspac churi, Zeraiasca Uzipac churi, Uzica Buquipac churi,

⁵ Buquica Abisuapac churi, Abisuaca Fineespac churi, Fineesca Eleazarpac, Eleazarca Aaronpac churimi carca. Aaronca punta curami carca.

⁶ Esdrasca israelcunata Mandac Dios Moisesman cushca mandashcata allita yachacmi carca. Jatun mandac Artajerjesca Esdras Mandac Diospac poderhuan cacpimi, pai ima mañashcata cuc carca.

⁷ Jatun mandac Artajerjes canchis huatata mandacucpimi, maijan israelcunapish, curacunapish, levitacunapish, cantaccunapish, pungupi cuidaccunapish, Diospac huasipi servishpa causaccunapish paihuan Jerusalenman cutircacuna.

⁸ Jatun mandac Artajerjes canchis huata pichca quillata mandacucpimi, Esdrasca Jerusalenman chayamurca.

⁹ Paicunaca callari quilla, callari punzhapimi Babiloniamanta llucshircacuna. Chai huata, pichca quilla callari punzhapimi Esdrasca Jerusalenman chayamurca. Diospac maquica paihuanmi carca.

¹⁰ Esdrasca Mandac Dios mandashcata allita yachacushpa, cazushpa imata ruhuachun mandashcata pactachichun cushca shimicunata, Israel llactapi yachachinatami tucui shunguhuan munarca.

Jatun mandac Artajerjes cartata quillcashcamanta

¹¹ Esdrasca Mandac Dios mandashcata, israelcunaman mandashcacunata, pactachichun cushca shimicunata alli yachac quillcacmi carca. Jatun mandac Artajerjes Esdras curaman quillcashpaca:

¹² «Jatun mandaccunata mandac Artajerjesmi: Jahua pachapi causac Dios mandashcata alli yachac quillcac Esdras curataca sumac causaita charingui nini.

¹³ Caitaca ñucami mandani. Ñuca mandana llactacunapi causac tucui israelcunapish, curacunapish, levitacunapish Jerusalenman canhuan risha nishpaca richunlla.

¹⁴ Cambac Dios mandashca shinallatac Judá llactapi, Jerusalenpi causaccunata ricugrichunmi ñucapish, ñucata canchis cunaccunapish mandanchic.

¹⁵ Ñucapish, ñucata cunaccunapish quiquin munaihuanmi Jerusalenpi israelcunapac Diosman cuchun cullquita cachanchic.

¹⁶ Tucui Babilonia llactapi japishca cullquita, curita, shinallatac israelcunapish, curacunapish quiquin munaihuan cushcata Jerusalenpi cac Diospac huasiman apangui.

¹⁷ Chai cullquihuanca Jerusalenpi cac cancunapac Diospac huasipi tiyac altarpi Diosman cushpa rupachingapac becicunata, cari ovejacunata, maltón ovejacunata, rupachina harinahuan, tallina vinohuan mana cungarishpa randingui.

¹⁸ Puchushca cullquita, curitaca cancunapac huauquicunahuan imata ruhuana alli cashcata cancunapac Dios munashca shina ruhuanguichic.

¹⁹ Cambac Diospac huasipi servichun canman cutichishca ima charinacunataca Diospac ñaupapi Jerusalenpi cutin cutichinguichic.

²⁰ Cambac Diospac huasipi ima minishtirishca faltacpica, jatun mandac ñucapac huasimanta ima yalli valishcacunata cunguilla.

²¹ Jatun mandac Artajerjes ñucami jatun yacu chimba ladopi ñuca tucui cullquita huacaichiccunataca jahua pachapi causac Dios mandashcata quillcac Esdras cura imata mañacpica, utca cunguichic.

²² Patsac talento cullquita, patsac coro trigota, patsac bato vinota, patsac bato aceiteta cunguichic. Cachitaca mashnata mañacpipish cunguichiclla nishpa mandani.

²³ Jahua pachapi causac Dios ruhuachun nishcataca jahua pachapi causacuc Diospac huasipi imatapish utca ruhuaichiclla. ¿Ima nishpatac jatun mandac ñuca mandacuc llactatapish, ñuca churicunatapish Dios piñashpa llaquichichunca saquishayari?

²⁴ Caitapish yachanami canguichic: Curacunata, levitacunata, mandaccunata, cantaccunata, pungupi cuidaccunata, Diospac huasipi serviccunata, chaipi imata ruhuaccunataca tributota, impuestota, imamanta cunacunatapish, ama mañanguichicchu.

²⁵ Shinallatac can Esdrasca cambac Diosmanta yachac cashca shinallatac, jatun yacu chimba ladopi causaccunata, Dios mandashcata tucui yachaccunata mandachun juezcunata, mandaccunata churangui. Chai mandashcacunata maijan mana yachacpica yachachingui.

²⁶ Cambac Dios mandashcata, jatun mandac ñuca mandashcata maijanpish mana cazucpica, huañuchina cacpi, llactamanta llucchishpa cachana cacpi, cullquita cobrana cacpi, mana cashpaca prezuna cacpica, chai shina llaquichishca cachun» nishpami quillcashca carca.

²⁷ ¡Ñucanchic taitacunata Mandac Diosca yallita alli nishca cachun! ¡Mandac Diosca paillatacmi paipac huasita alli nichun jatun mandacpac shungupi yuyaita cushca! ¡Paica Jerusalenpimi can!

²⁸ Shina alli yuyaita cucpimi, jatun mandacpish, paita cunaccunapish, paita servic sinchi mandaccunapish yallita ayudarca. Mandac Dios ñucahuan cacpimi, sinchiyashpa israelcunata mandaccunatapish Jerusalenman ñucahuan cutimuchun tandachircani.