ESDRAS 5 - Dios Rimashcata Quillcashcami

Diospac huasita cutin shayachishcamanta

¹ Hageohuan, Iddopac churi Zacarias-huanmi Dios ima nishcataca Judá llactapi, Jerusalenpi causaccunaman israelcunapac Diospac shutipi huillarca. Diosca paicunahuanmi carca.

² Shina huillacpimi, Salatielpac churi Zorobabelpish, Josadacpac churi Jesuapish Diospac huasita Jerusalenpi cutin shayachi callarirca. Shinallatac Dios ima nishcata huillaccunapish paicunata ayudarcacunami.

³ Chai punzhacunami jatun yacu chimba lado llactacunata mandac Tatnaica Setar-boznaihuan, caishuc huauquicunahuan Jerusalenman shamushpaca: «¿Pitac cai huasita shayachichun, muyundi pircata ruhuachunca mandarcayari?» nishpa tapurca.

⁴ Shinallatac caitapish tapushpaca: «¿Cai huasita shayachic runacunaca ima shuticunatac?» nircacuna.

⁵ Ashtahuanpish Diosllatac Judá llacta pushaccunata cuidacucpimi, Persia llactata jatun mandac Darioman huillacpi, pai imatapish quillcangacaman mana jarcai pudircacuna.

⁶ Tatnaipish, jatun yacu chimba lado llactata mandacpish, Setar-boznaipish, jatun yacu chimba lado llactata mandaccunapac huauquicunapish jatun mandac Dariomanmi quillcata cacharcacuna.

⁷ Chai quillcapica: «Can jatun mandac Darío alli causachunmi munanchic.

⁸ Can jatun mandac caita yachachunmi munanchic. Ñucanchicca Judea llactamanmi Mandac Diospac huasita rumicunahuan shayachiccunapacman rircanchic. Chai pirca jahuapica ñami caspicunata churashca. Chaicunataca utcami sumacta ruhuacuncuna.

⁹ Chaimantami mandaccunataca: “¿Cancunataca pitac cai huasita shayachichun, muyundi pircacunata allichichunca mandarca?” nishpami tapurcanchic.

¹⁰ Shinallatac paicunapac mandacpac shutitapish quillcashpa canman huillangapac tapurcanchicmi.

¹¹ Shina tapucpimi paicunaca: “Ñucanchicca jahua pachata, cai pachata ruhuac Diosta serviccunami canchic. Ñucanchicca tigrachishca huasitami cutin shayachicunchic. Cai huasitaca israelcunata jatun mandacmi ñaupa huatacunapi shayachishca carca.

¹² Ashtahuanpish ñucanchic ñaupa taitacuna jahua pachapi causac Diosta yallita piñachishcamantami paica Babilonia llactata jatun mandac caldeocunapuramanta Nabuconodosorpac maquipi churashca. Shina churacpimi, cai huasitaca tucui urmachishpa, gentecunataca Babilonia llactaman prezu apashca.

¹³ Shina cacpipish, Babilonia llactata jatun mandac Ciro punta huatata mandacushpami Diospac huasita cutin shayachichun, mandarca.

¹⁴ Shinallatac Jerusalenpi cac Diospac huasimanta jatun mandac Nabuconodosor apashca curimanta, cullquimanta ruhuashca ima charishcacunatapish Babilonia llacta dioscunapac huasimantami jatun mandac Ciroca llucchishpa, Sesbasarman cushpa cacharca. Paitaca mandac cachunmi churashca carca.

¹⁵ Shina cushpaca: ‘Cai charishcacunataca Jerusalenpi cac Diospac huasiman apailla. Diospac huasitaca punta maipi cashca pushtullapitac shayachinguichic’ nirca.

¹⁶ Shina nicpimi, Sesbasarca Jerusalenpi causac Diospac huasita shayachingapac shamushpa callari rumita churarca. Chaimanta cunancamanmi shayachicunchic. Shina cashpapish manarac tucurinchu” nirca.

¹⁷ Cunanca, jatun mandacman alli cacpica, Babilonia llactapi tiyac can jatun mandacpac huasipi tiyac quillcashcacunapi mashcaichic. Ciertota Jerusalenpi causac Diospac huasita shayachichun jatun mandac Ciro mandashcatapish, can jatun mandac imata yuyarishcatapish ñucanchicman huillangui» nishpami quillcata cacharca.