ESDRAS 3 - Dios Rimashcata Quillcashcami

Altarta cutin ruhuashpa Diosta mañai callarishcamanta

¹ Israelcuna utcapi causashca pueblocunaman cutimushpa, canchis quillata causacucpimi, tucui gentecuna Jerusalenpi shuc shinalla tandanacurca.

² Chashna tandanacushpami, Josadacpac churi Jesúa curaca caishuc curacunahuan, Salatielpac churi Zorobabelhuan, paipac huauquicunahuan, Diosta servic Moisés quillcashpa mandashca shinallatac animalcunata Diosman cushpa, tucui rupachingapac israelcunapac Diospac altarta ruhuanata callarirca.

³ Chai llactapi causaccunata manchashpami, chai altartaca utcapi cashcallapitac shayachirca. Chai altarpimi animalcunata Diosman cushpa tutamantapish, chishipish tucui rupachirca.

⁴ Mandashpa quillcashcapi nishca shinallatacmi chucllacunata ruhuashpa, jatun fiestata ruhuarcacuna. Ima shina mandashca shinallatacmi animalcunata cada punzhapi mashnata cuna cashca shinallatac punzhanta Diosman cushpa tucui rupachirca. Ima ruhuana cacpipish, chai punzhallatacmi ruhuarcacuna.

⁵ Chai quipaca punzhantami animalta Diosman cushpa Llullu quilla punzhacunapi, Mandac Diosta yuyarina fiesta punzhacunapi Diosman cushpa tucui rupachirca. Quiquin munaihuan animalcunata Diosman cushpapish rupachircami.

⁶ Canchis quilla callari punzhallatacmi Mandac Diospac huasita ruhuangapac callari rumicunata manarac churacpipish, Mandac Diosman animalcunata cushpa tucui rupachi callarircacuna.

⁷ Huasita ruhuaccunamanpish, carpinterocunamanpish cullquita curcacunami. Shinallatac Sidón, Tiro pueblocunapi causaccunamanpish Persia llactata jatun mandac Ciro munashca shinallatacmi Líbano urcumanta cedro caspicunata mama cuchata huambuchishpa, Jope puebloman apamuchun micunata, ubianata, aceiteta curcacuna.

Diospac huasita shayachi callarishcamanta

⁸ Jerusalenpi causac Diospac huasiman cutimushca ishcai huata callari ishcai quilla tucucpimi, Salatielpac churi Zorobabelpish, Josadacpac churi Jesuapish, caishuc huauquicunapish, curacunapish, levitacunapish, tucui prezu cashcamanta Jerusalenman cutimushcacunapish Mandac Diospac huasita shayachi callarircacuna. Diospac huasita shayachiccunata pushachunca ishcai chunga huata yallita charic levitacunatami churarca.

⁹ Chashnallatac Jesuapish, paipac churicunapish, paipac huauquicunapish, Cadmielpish, paipac churicunapish, Judapac huahua huahuacunapish, shinallatac Henadadpish, paipac churicunapish, paipac huauqui levitacunapish tandarishpami shuc shinalla tucushpa Diospac huasi shayachinata pushai callarircacuna.

¹⁰ Mandac Diospac huasi ruhuaccuna callari rumicunata churai callaricpimi, curacunaca paicunapac churanata churarishpa, trompetapi tocai callarirca. Shinallatac levitacunapuramanta Asafpac huahua huahua levitacunatapish, israelcunata jatun mandac David mandashca shinallatacmi platillocunapi huactashpa, Mandac Diosta alli nicurca.

¹¹ Mandac Diosta pagui nishpa, alli nishpa cantashpaca: «¡Paica allimari, israelcunataca huiñaitami llaquicun!» nircacuna. Mandac Diospac huasi callari rumita churai callarishcamantami tucui gentecuna yallita cushicushpa, caparishpa Mandac Diosta alli nircacuna.

¹² Utcapi Diospac huasi shayacucta ricuc curacuna, levitacuna, taitacunapac huasi ucupurata mandaccuna, israelcunata pushac yuyaccunaca Diospac huasi callari rumicunata churai callaricpimi caparishpa huacarcacuna. Cutin shuccunaca yallita cushicushpami caparircacuna.

¹³ Chashna yallita cushicushpa caparicushcatapish, caparishpa huacashcatapish gentecuna uyashpaca imamanta chashna cashcataca mana entendircachu. Gentecunaca yallita cushicushpami caparicurca. Chaimantami paicuna caparishcaca carucaman uyarirca.