ESDRAS 1 - Dios Rimashcata Quillcashcami

Jatun mandac Ciro Jerusalenman cutimuchun mandashcamanta

¹ Jatun mandac Ciro Persia llactata shuc huatata mandacucpimi, Mandac Diosca Jeremiasman huillachishca pactachun, Persia llactata jatun mandac Ciroman yuyaita curca. Chashna yuyaita cucpimi, jatun mandac Ciroca huillashpapish, quillcaccunata cachashpapish pai mandacuc tucui llactacunapi causaccunaman huillachishpaca:

² Persia llactata jatun mandac Ciroca: «Jahua pachata Mandac Diosmi tucui cai pachapi tiyac llactacunata mandachunpish, shinallatac Judá llactapi cac Jerusalenpi Diospac huasita shayachichunpish mandarca.

³ Shina cashcamanta cancunapurapi, Pai acllashca, Mandac Diosta caticcuna caipi tiyashpaca, Judá llactapi cac Jerusalenman huichai rishpa israelcunata mandac Diospac huasita shayachichuncuna. Paicunata Mandac Diosca paicunahuan cachun.

⁴ Shinallatac maijan llactapi saquirishca runacunaca cullquitapish, curitapish, ima charishcacunatapish, animalcunatapish cuchun. Shinallatac quiquin munaihuan cushca ofrendahuanpish Jerusalenpi causac Diospac huasita shayachichun ayudaichic» nirca.

Diospac huasipi ima charishcacunata jatun mandac Ciro cutichishcamanta

⁵ Chaimantami Judapac, Benjaminpac ñaupa taitacunapac huasi ucupuracunata mandaccunapish, curacunapish, levitacunapish Mandac Dios yuyaita cushcacunaca, Jerusalenman rishpa Diospac huasita shayachingapac allichirircacuna.

⁶ Cuchullapi causaccunapish cullquimanta, curimanta ruhuashca imallacunatapish, imalla charishcacunatapish, animalcunatapish, sumac charishcacunatapish, shinallatac quiquin munaihuan cuna ofrendacunatapish cushpami ayudarca.

⁷ Shinallatac jatun mandac Ciropish Nabuconodosor Jerusalenpi cac Mandac Diospac huasimanta aparishcacunatapish cutichircami. Chaicunataca paicunapac dioscunapac ñaupapimi charicurca.

⁸ Persia llactata jatun mandac Ciroca chai charinacunataca paipac cullquita huacaichic Mitridatestami apachun cacharca. Paica Judá llactata mandac Sesbasarmanmi tucui yupashpa curca.

⁹ Tucui chai apashcacunaca: Quimsa chunga curi jatun vaso, huaranga cullqui jatun vaso, ishcai chunga iscun cuchillo,

¹⁰ Quimsa chunga curi vaso, chuscu patsac chunga yangalla cullqui vaso, shinallatac shuc huaranga imalla charinacunatami curca.

¹¹ Tucui curimanta, cullquimanta ruhuashca imalla charinacunaca pichca huaranga chuscu patsacmi carca. Tucui chaicunataca Sesbasarmi Babiloniapi prezu caccunata Jerusalenman apachirca.